Poto ki he Foʻi Matá

● Ko e foʻi mata ʻo e tangatá ko ha foʻi ngāue fakaʻofoʻofa ia. Ka ʻoku mahulu hake ia ʻi he fakaʻofoʻofá. ʻOku toe mālohi foki ia. ʻOku pehē ʻe he tohi ko e Visual Impact, Visual Teaching ko e “pēseti ʻe 40 ʻo e ngaahi faipa neave kotoa pē ʻoku fakafehokotaki ki he ʻutó ʻoku fakahoko ia ki he lētiná,” ko ha tīsiu manifi mo fihi ʻi he tafaʻaki ʻi loto ʻo e foʻi matá.

Naʻe totonu ai ʻa hono ui ʻe Sīsū Kalaisi ʻa e foʻi matá “ko e maama ʻo e sinó.” ʻI hono fakamatalaʻi ʻa e meʻa naʻá ne ʻuhinga ki aí, naʻá ne hoko atu: “Ka huʻufataha [totonu, fakahangataha ki he leleí] . . . ho matá, ʻe maamangia ho sinó kotoa. Ka ʻo kapau ʻoku kovi ho matá, ʻe fakapoʻuli ho sinó kotoa.” (Mātiu 6:22, 23) ʻI he ngaahi lea ko ení, naʻe fakamanatu mai ai kia kitautolu ʻe Sīsū ʻa e mālohi ʻo e foʻi matá, ʻi he ʻuhinga fakaefakatātā, ke fakaʻaiʻai ʻa e ngaahi fakakaukaú, ngaahi ongoʻí, mo e ngaahi ngāué. ʻOku fakamaama ʻe he ngaahi fakakaukau leleí ʻa e moʻui ʻa ha taha; ko e ngaahi fakakaukau koví ʻokú ne ʻai ai ia ke fakapoʻuli.

Ko e fakatātaá, fakakaukau ki he ngaahi lea ʻa Sīsū ʻoku maʻu ʻi he Mātiu 5:28, 29: “Ko e tokotaha kotoa ʻoku hanganaki fakasio ki ha fefine ke tafunaki ki ai ʻene holí kuó ne ʻosi tonoʻi ia ʻi hono lotó. Kapau leva ko ho mata toʻomataʻú ʻokú ne ʻai koe ke ke tūkiá, kapeʻi ia [ʻi ha ʻuhinga fakaefakatātā].” Ko e hā ʻene ʻuhingá? Ko ha foʻi mata ʻoku hila takai holo ʻe lava ke ne tafunaki ha ngaahi holi fehālaaki ʻo aʻu ki he tuʻunga ʻa ia, ʻi he ʻi ai ha faingamālié, ʻe fakahoko nai ai ʻe ha taha ha ngaahi tōʻonga taʻetaau pea mole ai ʻa e hōifua ʻa e ʻOtuá.—Sēmisi 1:14, 15.

He lelei lahi ange ē ke mapuleʻi-kita, naʻa mo ʻene faingataʻa ʻa e fai peheé ʻo hangē ko hano kapeʻi ʻo ha foʻi matá! He ko ē, ʻoku taau nai ke feilaulauʻi ʻa e moʻui taʻengatá koeʻuhí pē ko ha ngaahi foʻi mōmeniti taimi nounou ʻo e fiefia fakakakanó?

Ko e meʻa ʻoku tau fafangaʻaki ʻa e foʻi matá ʻe lava ke ne toe fakaʻaiʻai foki ʻa e mānumanú. Ko ia ai, ʻoku fakatokanga mai kia kitautolu ʻa e Tohi Tapú ko e “holi [siokita] ʻo e matá . . . ʻoku ʻikai tupu ia mei he Tamaí, ka ʻoku tupu ia mei he māmaní. ʻIkai ko ia pē, ʻoku fakaʻaʻau ke mole atu ʻa e māmaní pea pehē ki he holi ʻaʻaná, ka ko ia ʻokú ne fai ʻa e finangalo ʻo e ʻOtuá ʻokú ne nofo maʻu ʻo taʻengata.”—1 Sione 2:16, 17.

ʻOku fuʻu fakangatangata tōtuʻa ʻa e Tohi Tapú? ʻIkai ʻaupito! Ke taʻetokangaʻi ʻene ngaahi tuʻungá ʻoku fakaafeʻi mai ai ʻa e ngaahi palopalemá mo e mamahí. (Kalētia 6:7, 8) Ke talangofua ki he Folofola ʻa e ʻOtuá, ʻo kau ai ʻa e poto ki hotau foʻi mata fakaefakatātaá, te tau utu ai ʻa e fiefiá. “He fiefia ē ko e faʻahinga ʻoku fanongo ki he folofola ʻa e ʻOtuá pea tauhi iá,” ko e lau ia ʻa Sīsuú. (Luke 11:28) Ko e toe meʻa lahi angé, ʻoku nau maʻu ʻa e ʻamanaki ʻo e nofo maʻu ʻo taʻengata ʻi he māmaní, lolotonga iá ko e faʻahinga ʻoku nau fakatupulekina ha foʻi mata taʻetaau pe mānumanú ʻe mole meia kinautolu ʻa e fiefiá mo e moʻuí fakatouʻosi.