• Te Ke ʻAʻeva mo e ʻOtuá?
    Ko e Taua Leʻo—2005 | Nōvema 1

    • 5. Ko e hā naʻe lea ai ʻa Sīsū ʻo fekauʻaki mo hono toloiʻi atu ʻaki ha hanga ʻe taha ki he lōloa ʻo e moʻui ʻa ha tahá?

      5 ʻOku faʻa fakatatau ʻe he Tohi Tapú ʻa e moʻuí ki ha fononga pe ko ha ʻaʻeva. ʻI he ngaahi tuʻunga ʻe niʻihi, ko e fakahoa ko iá ʻoku hangatonu, ka ʻi he ngaahi tuʻunga kehé, ʻoku fakahuʻuhuʻunga ia. Hangē ko ení, naʻe pehē ʻe Sīsū: “Talaʻehai ʻe lava ai ʻe ha taha ke toloʻi atu hono taʻu ko ha momoʻi hanga pe ʻe taha.” (Mātiu 6:27) Te ke puputuʻu nai ʻi he niʻihi ʻo e ngaahi lea ko iá. Ko e hā naʻe lea ai ʻa Sīsū fekauʻaki mo hono toloiʻi atu ʻi he “hanga ʻe taha,” ʻa ia ko ha fua ia ʻo e mamaʻó, ki ha “taʻu” ʻo e moʻui ʻa ha taha, ʻa ia ʻoku fua ia ʻi he tuʻunga ʻo e taimí?a ʻOku hā mahino naʻe sioloto atu ʻa Sīsū ki he moʻuí ko ha fononga. Ko hono moʻoní, naʻá ne akoʻi ko e hohaʻá ʻe ʻikai te ne tokoniʻi koe ke ke toloiʻi atu naʻa mo ha kiʻi foʻi laka siʻisiʻi ki he fononga ʻi hoʻo moʻuí. Ko ia ai, ʻoku totonu ke tau fakaʻosiʻaki, ʻoku ʻikai ha meʻa ʻe lava ke tau fai fekauʻaki mo e lōloa ʻo e ʻaʻeva ko iá? Mole ke mamaʻo! ʻOku ʻomai heni kitautolu ki heʻetau fehuʻi hono uá, Ko e hā ʻoku fiemaʻu ai ke tau ʻaʻeva mo e ʻOtuá?

  • Te Ke ʻAʻeva mo e ʻOtuá?
    Ko e Taua Leʻo—2005 | Nōvema 1

    • a ʻOku fetongi ʻe he ngaahi liliu Tohi Tapu ʻe niʻihi ʻa e “hanga” ʻi he veesi ko ení ki ha fua ʻo e taimí, hangē ko e “mōmeniti ʻe taha” (The Emphatic Diaglott) pe “ko ha miniti ʻe taha” (A Translation in the Language of the People, ʻa Charles B. Williams). Kae kehe, ko e foʻi lea naʻe ngāueʻaki ʻi he muʻaki konga tohí ʻoku ʻuhinga papau ia ki ha hanga, ʻa ia naʻe senitimita nai ʻe 45 hono lōloá.