MOʻUI KO HA KALISITIANE

Tafaʻaki Foʻou ʻo e Fakataha Lolotonga ʻo e Uiké

Kamata ʻi Sanuali 2018, ʻe fakakau ʻi he fakataha lolotonga ʻo e uiké ha nouti ako mo e mītia mei he pulusinga ako ʻo e Liliu Tohi Tapu ʻo e Māmani Foʻoú ʻo e Tohi Tapu Māʻoniʻoní (nwtsty), neongo kapau ʻoku teʻeki ke ala maʻu ʻa e pulusinga akó ni ʻi hoʻo leá. ʻOku ʻikai ha veiveiua ʻe fakalahi ʻe he fakamatalá ni hoʻo teuteu ki he fakatahá. Ko e meʻa ʻoku mahuʻinga angé, ʻofa ke ne tohoakiʻi koe ke ke toe ofi ange ki heʻetau Tamai ʻofa ko Sihová!

NOUTI AKO

ʻOku ʻomai ʻe he nouti akó ʻa e mahino fakaetalatukufakaholo, fakasiokālafi mo e fakaelea ki he ngaahi veesi Tohi Tapu lahi.

Mātiu 12:20

Vavae maama: Ko ha maama anga-maheni ʻi he ʻapí ʻa ia ko ha kiʻi maama ʻumea naʻe fakafonuʻaki ʻa e lolo ʻōlive. Naʻe mimisi hake ʻe ha vavae falakesi ʻa e loló ke tokoni ki heʻene uló. Ko e kupuʻi lea faka-Kalisi ki he “vavae maama” ʻoku ʻuhinga nai ia ki ha vavae ʻoku kohu koeʻuhi ʻoku kei moʻui ʻa e muiʻi vavae ʻuliʻulí ka ʻoku tamatemate atu ʻene uló. Ko e kikite ʻa e ʻAisea 42:3 naʻe tomuʻa tala ai ʻa e manavaʻofa ʻa Sīsuú; heʻikai ʻaupito te ne tāmateʻi ʻa e kiʻi foʻi ulo fakaʻosi ʻo e ʻamanaki ʻa e kakai anga-fakatōkilalo mo ngaohikoviá.

Mātiu 26:13

Moʻoni: Ko e foʻi lea faka-Kalisi ko e a·menʹ, ko ha liliu fakahangatonu ia ʻo e foʻi lea faka-Hepelū ʼa·menʹ, ʻoku ʻuhinga ko e “ko ia tofu pē,” pe “moʻoni ia.” ʻOku faʻa ngāueʻaki maʻu pē ʻe Sīsū ʻa e kupuʻi leá ni ke kamataʻaki ha lea, ha talaʻofa, pe ha kikite, ʻo fakamamafaʻi ai ʻa e moʻoni mo e falalaʻanga fakaʻaufuli ʻa e meʻa ko iá. Ko hono ngāueʻaki ʻe Sīsū ʻa e “moʻoni,” pe ʻēmení, ʻi he founga ko ení ʻoku pehē ʻoku makehe ʻi he ʻū tohi toputapú. ʻI hono toutou ngāueʻaki hokohoko (a·menʹ a·menʹ), hangē ko ia ʻi he kotoa ʻo e Kōsipeli ʻa Sioné, ʻoku liliu ai ʻa e lea ʻa Sīsuú ko e ‘mātuʻaki moʻoni.’—Sione 1:51.

MĪTIA

Ko ha ngaahi tā, fakatātā, mo e ngaahi vitiō mo e ngaahi ʻata fakalongolongo ʻoku nau fakahāhaaʻi mai ha ngaahi fakaikiiki kehekehe ʻoku lēkooti ʻi he Tohi Tapú.

Petefesi, ko e Moʻunga ʻŌlivé mo Selusalema

Ko e vitiō nounou ko ení ʻoku ʻomai ai ha hala ʻoku aʻu ai ki Selusalema mei he hahaké, mei he kolo ko et-Tur ʻo onopōní—ʻoku ʻi ai ʻa e fakakaukau ʻoku fehoanaki eni mo Petefesi ʻi he Tohi Tapú—ko e taha ʻo e ngaahi tumutumu māʻolunga ʻo e Moʻunga ʻŌlivé. ʻOku tuʻu ʻa Pētani ʻi he hahake ʻo Petefesí ʻi he tahifo fakahahake ʻo e Moʻunga ʻŌlivé. ʻI he ʻi Selusalema ʻa Sīsū mo ʻene kau ākongá naʻa nau faʻa mohe ʻi Pētani, ʻa ia ʻoku fakaʻilongaʻi ko e kolo ia ko el-ʽAzariyeh (El ʽEizariya), ʻi he ʻaho ní, ko ha hingoa faka-ʻAlepea ʻoku ʻuhingá “Ko e Feituʻu ʻo Lāsalosi.” ʻOku ʻikai ha veiveiua naʻe nofo ʻa Sīsū ʻi he ʻapi ʻo Māʻata, Mele, mo Lāsalosí. (Māt. 21:17; Mk. 11:11; Luke 21:37; Sione 11:1) ʻI he fononga mei honau ʻapí ki Selusalemá, naʻe ʻalu nai ʻa Sīsū ʻi he hala meimei tatau mo ia naʻe hā ʻi he vitioó. ʻI Nīsani 9, 33 T.S., ʻi he heka ʻa Sīsū ʻi he ʻuhiki ʻo ha ʻasi ʻo fononga mei he Moʻunga ʻŌlivé ki Selusalemá, naʻá ne fononga mai nai mei Petefesi, ʻo ʻalu ʻi he hala ki Selusalemá.

Hala mei Pētani ki Petefesí
Petefesi
Moʻunga ʻŌlive
Teleʻa Kitilone
Tuʻuʻanga Māʻolunga ʻo e Temipalé

Foʻi Faʻo ʻi he Hui Muivaʻe

Ko e laʻi tā eni ʻo e tatau ʻo ha hui muivaʻe ʻo ha tangata naʻe hokaʻi ai ha foʻi faʻo ukamea naʻe senitimita ʻe 11.5 (ʻinisi ʻe 4.5) hono lōloá. Naʻe maʻu ʻa e meʻa totonu ko ení ʻi he 1968, lolotonga ʻo e keli fakatotolo ʻi he tafaʻaki fakatokelau ʻo Selusalemá, pea ʻoku fakaʻaho ki he kuonga ʻo Lomá. ʻOkú ne ʻomai ʻa e fakamoʻoni fakaʻākeolosia ʻoku ngalingali naʻe ngāueʻaki ʻa e faʻó ʻi he tautea maté ke tuki fakamaʻuʻaki ʻa e tokotahá ki ha fuʻu pou ʻakau. ʻOku meimei tatau nai ʻa e foʻi faʻó ni mo e ngaahi foʻi faʻo naʻe ngāueʻaki ʻe he kau sōtia Lomá ke tutukiʻaki ʻa Sīsū Kalaisi ki he ʻakaú. Naʻe maʻu ʻa e meʻa fakahisitōliá ni ʻi ha puha maka, naʻe ui ko ha tauhiʻanga-hui, ʻa ia naʻe tuku ki ai ha ngaahi hui mōmoa ʻo ha tokotaha mate ʻi he hili ʻa e ʻauʻaunga ʻa e kakanó. ʻOku fakahaaʻi ʻe he meʻá ni ko ha taha naʻe tautea mate ʻi he ʻakaú naʻe lava ke tanu ia.—Māt. 27:35.