Vahe 24

ʻUhinga Naʻe Haʻu Ai ʻa Sīsū ki Māmaní

NAʻE femoʻuekina ʻa e ʻaho naʻe ʻi Kāpaneume ai ʻa Sīsū mo ʻene kau ākonga ʻe toko faá, pea naʻe fakaʻosiʻaki ʻa e ʻaho ko iá ʻi hono ʻomai ʻi he taimi efiafí ʻe he kakai ʻo Kāpaneumé honau faʻahinga kotoa pē naʻe mahamahakí ke ne fakamoʻui kinautolu. Naʻe ʻikai ha taimi ke ne nofo toko taha ai.

Ko e pongipongi ʻeni hono hokó. ʻI he lolotonga ʻene kei poʻulí, naʻe mālanga hake ʻa Sīsū ʻo ne hū ki tuʻa. Naʻá ne ʻalu ki ha potu lala ʻa ia naʻe malava ke ne lotu ai ki heʻene Tamaí ʻi he lilo. Ka naʻe taimi siʻi pē ʻa e nofo toko taha ko ʻeni ʻa Sīsuú koeʻuhi ʻi he fakatokangaʻi ʻe Pita mo e niʻihi kehé kuó ne puliá, naʻa nau ō ʻo fekumi kiate ia.

ʻI heʻenau ʻilo ʻa Sīsuú, naʻe pehē atu ʻe Pita: “ʻOku fiemaʻu koe ʻe he kakaí kotoa.” Naʻe fiemaʻu ʻe he kakai ʻo Kāpaneumé ʻa Sīsū ke ne nofo mo kinautolu. He naʻa nau houngaʻia moʻoni ʻi he meʻa naʻe fai ʻe Sīsū maʻanautolú! Ka naʻe fakatefito ʻa e haʻu ʻa Sīsū ki māmaní ke fakahoko pē ha ngaahi mana fakamoʻui pehē? Ko e hā ʻene fakamatala ʻo fekauʻaki mo e meʻá ni?

Fakatatau ki he fakamatala ʻe taha ʻi he Tohitapú, naʻe tali ʻe Sīsū ki heʻene kau ākongá ʻo pehē: “Tau ō ki ha potu kehe, ki he ngaahi vilisi ofi maí, koeʻuhi ke u malanga ki ai foki, he ko ia ia naʻá ku haʻu aí.” Neongo naʻe vili ʻa e kakaí kia Sīsū ke nofo, ka naʻá ne tala ange kiate kinautolu: “Kuo pau ke u ʻave ʻa e ongoongo leleí ki he ngaahi kolo kehé foki, ʻo tala ʻa e puleʻanga ʻo e ʻOtuá, he naʻe fekau mai au ki he meʻa ko iá.”

ʻIo, naʻe tautefito ʻa e haʻu ʻa Sīsū ki māmaní ke malanga ʻo fekauʻaki mo e Puleʻanga ʻo e ʻOtuá, ko e meʻa ia te ne fakatonuhiaʻi ʻa e huafa ʻo ʻene Tamaí pea mo fakaleleiʻi ʻo taʻengata ʻa e ngaahi faingataʻaʻia kotoa ʻo e faʻahinga ʻo e tangatá. Kae kehe, naʻe fai ʻe Sīsū ʻa e ngaahi fakamoʻui ʻi he maná ke fakamoʻoniʻi naʻe fekauʻi mai ia ʻe he ʻOtuá. ʻI he founga tatau pē mo ia, ʻi he laui senituli ki muʻá, naʻe fai ʻe Mōsese ʻa e ngaahi mana ke fakamoʻoniʻi ko e sevāniti ia ʻa e ʻOtuá.

ʻI he mavahe ko ia ʻa Sīsū mei Kāpaneume ke malanga ki he ngaahi kolo kehé, naʻá ne ʻalu fakataha pē mo ʻene kau ākonga ʻe toko faá. Ko e toko fā ko ʻení ko Pita mo hono tokoua ko ʻAniteluú, mo Sione mo hono tokoua ko Sēmisí. Te ke manatuʻi, ʻi he uike pē ʻe taha ki muʻá, naʻe fakaafeʻi ai kinautolu ke nau hoko ko e ʻuluaki kaungāngāue fefonongaʻaki ʻo Sīsū.

Naʻe lavameʻa ʻaupito ʻa e fononga holo ʻa Sīsū mo ʻene kau ākonga ʻe toko faá ʻo malanga ʻi Kālelí! Ko hono moʻoní, naʻa mo Sīlia kotoa naʻe aʻu ki ai ʻa e fakamatala ʻo fekauʻaki mo ʻene ngaahi ngāué. Ko e fuʻu kakai tokolahi mei Kāleli, Siutea, pea mei he tafaʻaki ʻe taha ʻo e Vaitafe Sioataní naʻa nau muimui ʻia Sīsū mo ʻene kau ākongá. Maake 1:​35-39; Luke 4:​42, 43; Mātiu 4:​23-25; Ekisoto 4:​1-9, 30, 31.

▪ Ko e hā naʻe hoko ʻi he pongipongi hono hoko ʻi he hili ʻo e ʻaho femoʻuekina ʻo Sīsū ʻi Kāpaneumé?

▪ Ko e hā naʻe fekauʻi mai ai ʻa Sīsū ki māmaní, pea ko e hā ʻa e taumuʻa naʻe fakahoko ai ʻa e ngaahi mana naʻá ne faí?

▪ Ko hai naʻe ʻalu mo Sīsū ʻi heʻene fononga holo he malanga ʻi Kālelí, pea ko e hā ʻa e tali ki he ngaahi ngāue ʻa Sīsuú?