“Muimui Iate Au”
1 ʻOku fakatefito ʻe he kakai tokolahi ʻenau moʻuí ʻi hono fakafiefiaʻi pē kinautolú, ka neongo iá ʻoku faʻa lahi ange pē ʻa e ʻikai ke nau fiefiá. ʻI hono kehé, naʻe fakaongoongoleleiʻi mai ʻe Sīsū ha ʻalunga ʻo e foaki taʻesiokitá ʻa ia ʻoku maʻu ai ʻa e fiefia moʻoní. (Ng. 20:35) Naʻá ne pehē: “Ko ia ia oku loto ke muimui iate au, ke ne jiaki eia ia . . . o muimui [maʻu pē] iate au.” (Mk. 8:34, PM) ʻOku ʻikai ke kau pē heni ʻa hono faʻa toutou taʻofi kita mei ha ngaahi fakafiefia pau. ʻOku ʻuhinga iá ko e moʻui he ʻaho taki taha ke fakafiefiaʻi, ʻikai ʻa kitautolu, ka ko Sihova.—Loma 14:8; 15:3.
2 Fakakaukau angé ki he faʻifaʻitakiʻanga ʻa e ʻapositolo ko Paulá. Koeʻuhi “ko ʻene fungani ʻa e ʻiloʻi ʻo Kalaisi Sīsū,” naʻe taʻofi ai ʻe Paula ʻene tuli ki he ngaahi holi fakafoʻituituí kae līʻoa atu ia ki hono fakalahi ʻa e ngaahi meʻa ʻo e Puleʻangá. (Fili. 3:7, 8) “Ka ko au,” naʻá ne pehē, “ʻoku ou matuʻaki loto ke mahomo atu ʻeku meʻa, ʻio, ke ʻosi atu mo au foki” ʻi hono tokoniʻi ʻa e niʻihi kehé. (2 Kol. 12:15) ʻOku totonu ke tau ʻeke hifo taki taha: ‘ʻOku ou ngāueʻaki fēfē hoku taimí, iví, malavá mo e koloá? ʻOku ou tokangataha ki hono fakalahi ʻa e ngaahi meʻa pē ʻaʻakú, pe ʻoku ou kumi ke fakafiefiaʻi ʻa Sihova?’
3 Ngaahi Faingamālie ke Foaki: ʻI he taʻu taki taha, ʻoku līʻoa atu ai ʻe he kakai ʻa e ʻOtuá ʻa e ngaahi houa laka hake he pilioná ki he ngāue fakaefakahaofi moʻui ko hono malangaʻi ʻa e Puleʻangá. ʻI he fakatahaʻangá, ʻoku fakahoko fakatouʻosi ai ʻe he fānaú mo e kau taʻumotuʻá ha ngaahi ngāue kehekehe ʻa ia ʻoku ʻaonga ki he niʻihi kehé. ʻOku kei lahi foki mo e ngāue ke fakahoko ʻi he fekauʻaki mo e ngaahi ʻasemipilií mo e ngaahi fakataha-lahí pea pehē foki ki he ngāue langa mo hono monomono ʻo e ngaahi falé ʻa ia ʻoku tokoni ke fakalahi atu ai ʻa e lotu moʻoní. Pea fakakaukau atu ki he tokoni anga-ʻofa ʻoku fai ʻe he fanga tokoua ʻoku nau ngāue ʻi he Ngaahi Kōmiti Fetuʻutaki Fakafalemahakí mo e Ngaahi Kulupu ʻAʻahi Mahakí. Ko e kotoa ʻo e ngaahi ngāue feilaulauʻi-kitá ni ko ha tāpuaki ia ki heʻetau fetokouaʻaki faka-Kalisitiané!—Sāme 110:3.
4 Ko e ngaahi faingamālie ko ia ke fai ai ha foaki ʻi he ngaahi founga kehekehé ʻe lava ke fai ia ʻi ha hoko ha fakatamaki pe ko ha meʻa fakavavevave. Ka, ʻoku tau faʻa ʻiloʻi pē nai ha kaungā Kalisitiane ʻokú ne fiemaʻu ha tokoni pe fakalototoʻa. (Pal. 17:17) ʻI heʻetau mateuteu ke tokoniʻi ʻa e niʻihi kehé pea fakalahi ʻa e ngaahi meʻa ʻo e Puleʻangá, ʻoku tau muimui ai ʻi he faʻifaʻitakiʻanga ʻa Sīsuú. (Fili. 2:5-8) ʻOfa ke tau feinga ke fai maʻu pē ia.