Sīsū Ko ʻEne Moʻuí mo ʻEne Ngāue Fakafaifekau

Naʻe Hoko ha Fakakikihi

KI MUʻA ange ʻi he efiafi ko iá, naʻe akoʻi ai ʻe Sīsū ha lēsoni fakaʻofoʻofa ʻi he ngāue anga-fakatōkilaló ʻaki ʻene fufulu ʻa e vaʻe ʻo ʻene kau ʻaposetoló. Ki mui ai, naʻá ne fokotuʻu ʻa e Fakamanatu ʻo ʻene pekia naʻe tuʻunuku atú. ʻI he taimi ko ʻení, tautautefito ki he meʻa ko ia kuo toki hokó, naʻe hoko ha meʻa fakaʻohovale. Naʻe fakakikihi mālohi ʻa ʻene kau ʻaposetoló pe ko hai ʻoku ngalingali ko e lahi tahá! ʻOku ngalingali, ko ha fakakikihi naʻe fuoloa ʻenau faí.

Manatuʻi ʻi he hili ʻo e fakakehe ʻa Sīsū ʻi he moʻungá, naʻe fakakikihi ʻa e kau ʻaposetoló ʻiate kinautolu pē pe ko hai ʻoku lahi tahá. ʻIkai ko ia pē, naʻe kole ʻe Sēmisi mo Sione ha ongo tuʻunga mahuʻinga ʻi he Puleʻangá, ʻo iku ke toe lahi ange ai ʻa e fekīhiaki ʻi he lotolotonga ʻo e kau ʻaposetoló. ʻI he taimi ko ʻení, ʻi hono pō fakaʻosi mo kinautolú, kuo pau naʻe fakalotomamahi kia Sīsū ʻi heʻene vakai atu ē kiate kinautolu naʻa nau toe fekeʻikeʻi pē! Ko e hā naʻá ne faí?

ʻI he ʻikai ke ne tafuluʻi ʻa e kau ʻaposetoló koeʻuhi ko honau ʻulungaangá, naʻe toe fakaʻuhinga anga-kātaki ʻa Sīsū mo kinautolu: “Ko e ngaahi tuʻi ʻo e Senitaile ʻoku nau puleʻi kinautolu; pea ko kinautolu ʻoku faʻiteliha kiate kinautolu ʻoku lau ko e kau Ngāuemālo. Ka ʻe ʻikai te mou pehē kimoutolu: . . . He ko hai ʻoku māʻolunga, ko ia ʻoku nofo ʻi he kai, pe ko ia ʻoku sevaniti? ʻikai ko ia ʻoku nofo ʻi he kai?” Pea ʻi heʻene fakamanatuʻi leva kiate kinautolu ʻa ʻene faʻifaʻitakiʻangá, naʻá ne pehē: “Ka ko au ʻoku ou ʻi homou lotolotonga ʻo hange ko e sevaniti.”

Neongo ʻa ʻenau ngaahi taʻehaohaoá, naʻe nofo maʻu pē ʻa e kau ʻaposetoló mo Sīsū lolotonga ʻa hono ngaahi ʻahiʻahí. Ko ia naʻá ne pehē: “ʻOku ou fuakava mo kimoutolu, hangē ko e fuakava ʻa e Tamai kiate au, ki ha puleʻanga.” Ko e fuakava fakaekinautolu ko ʻeni ʻi he vahaʻa ʻo Sīsū mo hono kau muimui mateakí kuo fakahoko ai kinautolu kiate ia ke kau ʻi heʻene pule fakatuʻí. Ko ha tokolahi fakangatangata pē ko e toko 144,000 ʻoku kau ki he fuakava ko ʻeni ki ha Puleʻangá.

Neongo kuo tuku ki he kau ʻaposetoló ʻa e ʻamanaki fakaofo ko ʻeni ke kaungāpule mo Kalaisi ʻi he Puleʻangá, ka naʻa nau vaivai fakalaumālie ʻi he taimi ko iá. Naʻe pehē ʻe Sīsū: “Te mou tūkia kotoa pe ʻiate au he poo ni.” ʻI heʻene tala kia Pita kuó Ne lotu koeʻuhi ko iá, naʻe naʻinaʻi ange ʻa Sīsū: “Pea ʻo ka ke ka toki foki mai, ke ke poupou ʻe koe ho ngaahi tokoua.”

Naʻe fakamatala ange ʻe Sīsū ʻo pehē: “Siʻi fanau, ʻoku kei toe siʻi ʻeku ʻiate kimoutolu. Te mou kumi au: kae hangē ko ʻeku lea ki haʻa Siu, ʻo pehe, Ko e potu ʻoku ou ʻalu ki ai, ʻe ʻikai te mou lava ke aʻu ki ai; ʻoku pehe foki ʻeku lea ni kiate kimoutolu. Ko e tuʻutuʻuni foʻou ʻoku ou tuku kiate kimoutolu, ke mou feʻofaʻaki: hange ā ko ʻeku ʻofaʻi kimoutolu, ke pehē foki hoʻomou feʻofaʻaki. Ko e meʻa kó é ʻe ʻilo ai ʻe he kakai kotoa pē ko e kau ako kimoutolu aʻaku, ʻo kapau ʻe ai haʻamou feʻofaʻaki.”

Naʻe ʻeke ʻe Pita: “ʻEiki, ko hoʻo meʻa ki fe?”

Naʻe tali ange ʻe Sīsū: “Ko e potu ʻoku ou ʻalu ki ai ʻe ʻikai te ke lava ke muimui mai ki ai ʻi he taimi ni; ka te ke muimui ki ai ʻamui.”

Naʻe fie ʻilo ʻa Pita: “ʻEiki, ko e ʻikai te u lava ke muimui atu ki ai ʻi he taimi ni, ko e hā? Naʻa mo ʻeku moʻui te u liʻaki ia maʻau.”

Naʻe ʻeke ange ʻe Sīsū: “Te ke liʻaki koā hoʻo moʻui koeʻuhi ko au, ʻo? Ko au e, ko au e, ʻoku ou tala atu, ʻE ʻikai ʻaupito uʻua ʻa e moa, kaeʻoua ke ke fakafisinga au, ʻo tuʻo tolu mālō.”

Naʻe lea fakamatematē ange ʻa Pita: “ʻE ʻikai ʻaupito te u fakafisinga koe; neongo ʻe iku pe ki haʻaku mate mo koe.” Pea lolotonga ʻa e kau mo e kau ʻaposetolo kehé ʻi he leaʻaki ʻa e meʻa tatau pē, naʻe pōlepole ʻa Pita: “Neongo ʻe tūkia kotoa pe ʻiate koe, ka ko au ʻe ʻikai te u tūkia ʻo taʻengata”!

ʻI he lave ki he taimi naʻá ne fekau ai ʻa e kau ʻaposetoló ki ha fononga ngāue fakamalanga ʻi Kāleli ʻo ʻikai ke ʻi ai ha kato paʻanga pe kato meʻakaí, naʻe ʻeke ange ʻe Sīsū: “Naʻa mou masiva ʻi ha meʻa?”

Naʻa nau tali: “ʻIkai”!

Naʻá ne pehē: “Ka ʻi he taimi ni, ʻilonga ha taha ʻoku ne maʻu ha kato paʻanga, ke ne toʻo ia, pehē foki mo ha kato ʻoho; pea ko ia ʻoku ʻikai ke maʻu ha meʻa pehē, ke ne fakatau atu hono kofu ke maʻu ʻaki ha heletā. He ʻoku ou pehē atu kiate kimoutolu, kuo pau ke fakamoʻoni ʻiate au ʻa e meʻa ko eni ne tohi, Pea naʻe fakakau ia mo e kau maumau lao: he ko eni ʻoku fakaaʻau ke iku ʻa e meʻa naʻe tohi kiate au.”

Naʻe lave ʻa Sīsū ki he taimi ʻa ia ʻe tutuki ai ia mo e kau kaihaʻakaú, pe kau maumau laó. Hili iá, naʻá ne toe fakahā foki ko hono kau muimuí te nau fehangahangai mo e fakatanga mamafa. Naʻa nau pehē ange: “ʻEiki, vakai ko e heletā ʻeni ʻe ua.”

Naʻá ne tali ange: “ʻOku lahi pē ia.” Hangē ko ia te tau sio ki aí, ko ʻenau ʻalu mo e ngaahi heletaá ʻe toki lava ai ʻe Sīsū ke akoʻi ha lēsoni mahuʻinga ʻaupito ʻe taha. Mātiu 26:​31-35; Maʻake 14:​27-31; Luke 22:​24-38; Sione 13:​31-38; Fakahā 14:​1-3.

◆ Ko e hā ko ha meʻa fakaofo ai ʻa e fakakikihi ʻa e kau ʻaposetoló?

◆ Naʻe anga-fēfē hono fakaleleiʻi ʻe Sīsū ʻa e fakakikihí?

◆ Ko e hā ʻoku fakahoko ʻe he fuakava naʻe fai ʻe Sīsū mo ʻene kau ākongá?

◆ Ko e hā ʻa e fekau foʻou naʻe tuku mai ʻe Sīsuú, pea ʻoku mahuʻinga fēfē ia?

◆ Ko e hā ʻa e fuʻu pōlepole naʻe fakahāhā ʻe Pitá, pea ko e hā naʻe leaʻaki ʻe Sīsū?

◆ Ko e hā ʻoku kehekehe ai ʻa e ngaahi fekau ʻa Sīsū ʻo kau ki hono ʻave ʻo e kato paʻangá mo e kato meʻakaí mei he ngaahi fekau naʻá ne ʻuluaki fai ki muʻa atu aí?