Kau Kalisitiané—Sivi Hangē ha Uité
TAIMI nounou ki muʻa heʻene pekiá, naʻe fakatokanga ʻa Sīsū ki heʻene kau ākongá: “Ta kuo tala kimoutolu ʻe Setane, ke ne sivi kimoutolu ʻo hange ko e uite.” (Luke 22:31) Ko e hā ʻene ʻuhinga?
ʻI he ʻaho ʻo Sīsuú, ko e utu-taʻu uité naʻe fiemaʻu ki ai ʻa e ngāue he taimi lahi mo e feinga mālohi. ʻUluakí, ʻoku tānaki ʻe he kau ngāué ʻa e kauʻi uité mei he manafá. ʻOku nau haha leva ʻa e kauʻi uité ʻi ha meʻa fefeka pe ngāueʻaki ha fanga monumanu ke toho ha saliote taʻeveʻeteka ʻi he kauʻi uité ke movetevete. Ko e founga ʻeni ke homo mai ai ʻa e foʻi uité mei he kaú mo e kafukafú. Hokó, ko hono laku ʻe he kau fāmá ki he ʻataá ʻa e fefiohi ko ʻeni ʻo e uité, kaú mo e kafukafú. ʻOku puhi ʻe he matangí ʻa e kafukafú kae ngangana ʻa e foʻi uité ki he hahaʻangá. Fakaʻosí, ʻoku toki sivi fakalelei leva ʻa e uité kae liʻaki ʻa ia ʻoku ʻikai fiemaʻú.
ʻI he moʻoni ʻa e ngaahi lea ʻa Sīsuú, naʻe ʻohofi taʻetuku ʻe Sētane ʻa ʻene kau ākongá ʻi he taimi ko iá pea ʻokú ne ʻohofi kitautolu he ʻahó ni. (Ef. 6:11) Ko e moʻoni, ʻoku ʻikai ko e faingataʻa kotoa pē ʻoku tau fehangahangai ʻi he moʻuí ʻoku fakatupunga fakahangatonu ʻe Sētane. (Koh. 9:11) Ka, ʻoku vēkeveke ʻa Sētane ke ngāueʻaki ha faʻahinga meʻa pē te ne malavá ke maumauʻi ʻetau anga-tonú. Ko e fakatātaá, te ne fakataueleʻi nai kitautolu ke fou ʻi ha founga moʻui tuli ki he meʻa fakamatelié, ke fili ki ha fakafiefia fakatupu maumau, pe kau ki he tōʻonga fakaefehokotaki fakasino taʻetaau. Te ne toe ngāueʻaki ʻa e kaungāako ʻi he ʻapiakó pe ʻi he ngāueʻangá mo e kāinga ʻoku ʻikai ko e Fakamoʻoni ʻa Sihová ke tenge kitautolu ke tau tuli ke maʻu kakato ʻa e meʻa kotoa ʻoku tuʻuaki mai ʻe he māmani ko ʻení ʻi he ʻapiakó mo e ngāueʻangá. Tānaki atu ki ai, ʻe ngāueʻaki nai ʻe Sētane ʻa e fakatanga fakahangatonú ʻi heʻene feinga ke maumauʻi ʻetau anga-tonu ki he ʻOtuá. Ko e moʻoni, ʻoku lahi ʻa e ngaahi founga kehe ʻoku ngāueʻaki ʻe Sētane ke ne sivi kitautolu hangē ko ia kuó ne faí.
ʻE lava fēfē ke tau talitekeʻi ʻa e fili mālohi ko ʻení? ʻE ʻikai te tau malava ia ʻi hotau mālohí pē. ʻOku mālohi ange ʻa Sētane ʻia kitautolu; kae kehe, ʻoku tau ʻiloʻi ʻoku mālohi taʻehanotatau ange ʻa Sihova ʻia Sētane. Kapau te tau falala kakato kia Sihova, lotu fakamākukanga ki ha poto mo e loto-toʻa ke kātaki, mo falala kakato ki heʻene tatakí, te ne fakaivimālohiʻi kitautolu ke talitekeʻi ʻa e ngaahi ʻoho ʻa Sētané.—Sāme 25:4, 5.
ʻI he lotolotonga ʻo e ʻahiʻahí, ʻoku fiemaʻu ke tau maʻu ʻa e malava ke “sivi ʻa e lelei mo e kovi” pea fakaʻehiʻehi ai mei he takihalaʻi ʻe he filioʻi ʻa Sētané. (Hep. 5:13, 14) ʻE tokoniʻi kitautolu ʻe Sihova ke fakatupulekina ʻa e malava ko iá. Tatau ai pē pe ko e hā ʻe hokó ʻoku fiemaʻu leva ke tau pipiki ki he founga totonú. Kapau te tau muimui ki he tataki ʻa Sihová te ne poupouʻi taʻetoeveiveiua ʻetau fakapapau loto-toʻa ke fai ʻa e meʻa ʻoku totonú.—Ef. 6:10.
ʻE feinga nai ʻa Sētane ke sivi kitautolu hangē ha uité. Ka ʻi he mālohi ʻo Sihová, te tau lava ke talitekeʻi ia ʻi he tuʻu maʻumaʻuluta ʻi he tuí. (1 Pita 5:9) ʻIo, ʻoku fakapapauʻi mai ʻe he Folofola ʻa Sihová: “Tali tekeʻi ʻa e Tevolo, pea te ne hola meiate kimoutolu.”—Sem. 4:7.