“Tali Tekeʻi ʻa e Tevolo” ʻo Hangē ko Ia Naʻe Fai ʻe Sīsuú
“Tali tekeʻi ʻa e Tevolo, pea te ne hola meiate kimoutolu.”—SEM. 4:7.
1. Ko e hā ʻa e fakafepaki naʻe ʻiloʻi ʻe Sīsū te ne fehangahangai mo ia ʻi he māmaní, pea ko e hā leva hono olá?
NAʻE ʻiloʻi ʻe Sīsū Kalaisi te ne fehangahangai mo e fakafepaki mei he Tēvoló. Naʻe hā mahino ʻa e moʻoniʻi meʻa ko ení mei he meʻa naʻe folofolaʻaki ʻe he ʻOtuá ki he ngatá ʻa ia naʻe fakataumuʻa moʻoni ki he laumālie fulikivanu angatuʻu naʻe lea mai aí: “Te u ʻai ke mo fetāufehiʻa ʻaki, ʻa koe mo e fefine [ko e konga fakahēvani ʻo e kautaha ʻa Sihová], pea ko ho hako mo hono hako; ʻe laiki ʻe ia [Sīsū Kalaisi] ho ʻulu, pea te ke laiki ʻe koe ʻa hono muivaʻe.” (Sen. 3:14, 15; Fkh. 12:9) Ko hono laiki ʻa e muiʻi vaʻe ʻo Sīsuú naʻe ʻuhinga iá te ne tofanga ʻi ha foʻi tā fakataimi ʻi hono tāmateʻi ia lolotonga ʻene ʻi māmaní, he ʻe fokotuʻu hake ia ʻe Sihova ki he lāngilangi fakahēvaní. Ka ko hono laiki ʻo e ngatá ʻi hono ʻulú ʻe ʻuhinga ia ʻe maʻu ʻe he Tēvoló ha foʻi tā ko e mate ʻa ia heʻikai ʻaupito te ne toe ake mei ai.—Lau ʻa e Ngāue 2:31, 32; Hepelu 2:14.
2. Ko e hā naʻe falala ai ʻa Sihova ʻe talitekeʻi lavameʻa ʻe Sīsū ʻa e Tēvoló?
2 Naʻe falala ʻa Sihova ʻe fakahoko lavameʻa ʻe Sīsū ʻa ʻene ngāué pea talitekeʻi ʻa e Tēvoló lolotonga ʻene ʻi he māmaní. Ko e hā naʻe lava ai ke mātuʻaki fakapapauʻi ʻe Sihova ʻa e meʻa ko ení? Koeʻuhi naʻá ne fakatupu ʻa Sīsū ʻi hēvani ʻi he ngaahi laui kuonga ki muʻa, naʻá ne siofi ia, pea naʻá ne ʻiloʻi ko e “tufunga lahi” ko ení mo e ‘ʻuluaki ʻo e fakatupú’ naʻá ne talangofua mo faitōnunga. (Pal. 8:22-31; Kol. 1:15) Ko ia ʻi he taimi naʻe fekauʻi mai ai ʻa Sīsū ki he māmaní pea fakaʻatā ʻa e Tēvoló ke ne ʻahiʻahiʻi ia ʻo aʻu ki he tuʻunga ʻo e maté, naʻe falala ʻa e ʻOtuá ko Hono ʻAlo tofu-pē-taha-ne-fakatupú te ne ikuna.—Sione 3:16.
Fakahaofi ʻe Sihova ʻa ʻEne Kau Sevānití
3. Ko e hā e fakafeangai ʻa e Tēvoló ki he kau sevāniti ʻa Sihová?
3 Naʻe lave ʻa Sīsū ki he Tēvoló ko e “ʻeiki ʻo e maama ko eni” peá ne fakatokanga ki Heʻene kau ākongá ʻe fakatangaʻi kinautolu, ʻo hangē pē ko iá. (Sione 12:31; 15:20) Ko e māmaní ʻa ia ʻoku ʻi he nima ʻo Sētane ko e Tēvoló, ʻokú ne fehiʻa ʻi he kau Kalisitiane moʻoní koeʻuhi ko ʻenau tauhi kia Sihová mo ʻenau hoko ko e kau malangaʻi ʻo e māʻoniʻoní. (Mt. 24:9; 1 Sione 5:19) ʻOku tāketi ʻa e Tēvoló tautefito ki he toenga ʻo e kau paní ʻa ia ʻe faifai pē pea nau pule fakataha mo Kalaisi ʻi hono Puleʻanga fakahēvaní. ʻOku toe tāketi ʻa Sētane ki he Kau Fakamoʻoni ʻa Sihova tokolahi ʻa ia ʻoku nau maʻu ʻa e ʻamanaki ko e moʻui taʻengata ʻi ha māmani palataisi. ʻOku fakatokanga mai ʻa e Folofola ʻa e ʻOtuá: “Ko homou fili ko e Tevolo ʻoku ne ʻalu fano ʻo hange ko ha laione ngungulu, heʻene kumi ha taha ke ne matuʻaki folo.”—1 Pita 5:8.
4. Ko e hā ʻokú ne fakamoʻoniʻi kuo fakafepakiʻi lavameʻa ʻe he kakai ʻa e ʻOtuá ʻa e Tēvoló ʻi hotau taimí?
4 ʻI he tuʻunga ko ha kautaha ʻoku nau maʻu ʻa e poupou ʻa Sihova ko e ʻOtuá, ʻoku tau talitekeʻi lavameʻa ʻa e Tēvoló. Fakakaukau angé ki he ngaahi moʻoniʻi meʻa ko ení: ʻI he taʻu ʻe 100 kuohilí, ko e niʻihi ʻo e kau pule fakatikitato anga-fītaʻa taha ʻi he hisitōliá kuo nau feinga ke fakaʻauha ʻosi ʻa e Kau Fakamoʻoni ʻa Sihová. Ka ko e tokolahi ʻo e Kau Fakamoʻoní ʻoku hokohoko atu ʻa ʻene tupú pea kuo aʻu he taimí ni ki he meimei toko 7,000,000 ʻi he ngaahi fakatahaʻanga laka hake he 100,000 ʻi he māmaní kotoa. Ko e kau pule fakatikitato anga-fakamamahi naʻa nau fakatangaʻi ʻa e kakai ʻa Sihová, ko kinautolu ia kuo nau ʻauha ʻosí!
5. Kuo anga-fēfē hono fakamoʻoniʻi ʻa e Aisea 54:17 ʻi he tuʻunga ʻo e kau sevāniti ʻa Sihová?
5 ʻI he lave ki he fakatahaʻanga ʻo ʻIsileli ʻi he kuonga muʻá ko ʻene “fefine,” naʻe talaʻofa ʻa e ʻOtuá: “ʻIlonga ha mahafu ʻoku faʻu ke fai ʻaki ha kovi kiate koe, ʻe ʻikai siaʻa; pea ʻilonga ha ʻelelo ʻoku hopo mo koe ʻi he fakamaau, te ke fakahalaia. Ko e ʻinasi eni ʻo e kau tamaioʻeiki ʻa Sihova, pea ko ʻenau fakatonuhia meiate au.” (Ai. 54:11, 17) Kuo fakamoʻoniʻi ʻa e alafalalaʻanga ʻa e talaʻofa ko iá ʻi he tuʻunga ʻo e kakai ʻa Sihová ʻi he māmaní kotoa lolotonga ʻa e “kuonga fakamui” ko ení. (2 Tim. 3:1-5, 13) ʻOku tau hokohoko atu hono talitekeʻi ʻa e Tēvoló, pea ʻoku ʻikai ha mahafu ʻokú ne feinga ke ngāueʻaki ke tafiʻi ʻosi ʻa e kakai ʻa e ʻOtuá ʻe siaʻa, he ʻoku tau kau fakataha kitautolu mo Sihova.—Sāme 118:6, 7.
6. Ko e hā ʻoku tala mai kiate kitautolu ʻe he kikite ʻa Tanielá ʻo fekauʻaki mo e kahaʻu ʻo e pule ʻa e Tēvoló?
6 ʻI he tuʻunuku vave mai ʻa e ngataʻanga ʻo e fokotuʻutuʻu fulikivanu kotoa ko ení, ʻe laiki ʻosi ʻa e ngaahi tafaʻaki kotoa pē ʻo e pule ʻa Sētané. ʻI he tohi ʻe he palōfita ko Tanielá ʻi he malumalu ʻo e fakamānavaʻi fakaʻotuá, naʻá ne tomuʻa tala: “ʻI he taimi ʻo e ngaahi tuʻi ko ia, ko e ʻOtua ʻo Langi te ne fokotuʻu ha puleʻanga ʻe ʻikai fulihi ʻo taʻengata; pea ko hono pule ʻe ʻikai tuku ki ha kakai kehe: ka te ne laiki mo fakaʻauha ʻa e ngaahi puleʻanga ko ia, kae tuʻu pe ia ʻo taʻengata.” (Tan. 2:44) ʻI he hoko ʻa e meʻa ko iá, ʻe fakatou mole ai ʻa e pule fakasētané mo e pule ʻa e faʻahinga taʻehaohaoa ʻo e tangatá. Ko e tafaʻaki kotoa pē ʻo e fokotuʻutuʻu ʻo e ngaahi meʻa ʻa e Tēvoló ʻe mole atu ʻo taʻengata, pea ʻe pule taʻealafakafepakiʻi ʻa e Puleʻanga ʻo e ʻOtuá ki he māmaní kotoa.—Lau ʻa e 2 Pita 3:7, 13.
7. ʻOku anga-fēfē ʻetau ʻiloʻi ko e kau sevāniti ʻa Sihová ʻi honau tuʻunga tāutahá te nau lava ʻo talitekeʻi lavameʻa ʻa e Tēvoló?
7 ʻOku ʻikai ha veiveiua ʻe fakahaofi ʻa e kautaha ʻa Sihová pea ʻe lakalakaimonū fakalaumālie. (Lau ʻa e Sāme 125:1, 2.) Fēfē kitautolu? ʻOku tala mai ʻe he Tohi Tapú ʻe lava ke tau lavameʻa ʻi hono talitekeʻi ʻa e Tēvoló, ʻo hangē ko ia naʻe fai ʻe Sīsuú. Ko e moʻoni, ko e kikite naʻe fakahaaʻi ʻe Kalaisi fakafou ʻi he ʻapositolo ko Sioné ʻoku fakahaaʻi ai neongo ʻa e fakafepaki fakasētané, “ko e fuʻu kakai lahi” ʻo e faʻahinga ʻoku nau maʻu ha ʻamanaki fakaemāmaní te nau hao ʻi he ngataʻanga ʻo e fokotuʻutuʻu ko ení. Fakatatau ki he Tohi Tapú, ʻoku nau kalanga: “Ko hotau fakamoʻui ʻoku mei hotau ʻOtua, ʻa ia ʻoku ʻafio ʻi he taloni, pea mei he Lami [ʻa Sīsū Kalaisi].” (Fkh. 7:9-14) Ko e faʻahinga paní ʻoku lau ʻo pehē te nau ikunaʻi ʻa Sētane, pea ko honau takangá, ʻa e “fanga sipi kehe” ʻoku nau toe lavameʻa ʻi hono talitekeʻi iá. (Sione 10:16; Fkh. 12:10, 11) Ka ʻoku fiemaʻu ki he meʻá ni ʻa e feinga tōtōivi mo e lotu fakamātoato ke ‘fakahaofi mei he Filí.’—Mt. 6:13.
Faʻifaʻitakiʻanga Haohaoa ʻi Hono Talitekeʻi ʻa e Tēvoló
8. Ko e hā ʻa e ʻahiʻahi ne ʻuluaki lēkooti naʻe ngāueʻaki ʻe he Tēvoló kia Sīsū ʻi he toafá, pea naʻe anga-fēfē ʻa e tali ki ai ʻa Kalaisí?
8 Naʻe feinga ʻa e Tēvoló ke maumauʻi ʻa e anga-tonu ʻa Sīsuú. ʻI he toafá, naʻe ngāueʻaki ai ʻe Sētane ʻa e ngaahi ʻahiʻahi ʻi ha feinga ke ʻai ʻa Sīsū ke ne fakangaloku ʻa ʻEne talangofua kia Sihová. Kae kehe, naʻe fokotuʻu ʻe Sīsū ha faʻifaʻitakiʻanga haohaoa ʻi hono fakafepakiʻi ʻa Sētané. Hili ʻene ʻaukai ʻi he ʻaho ʻe 40 mo e pō ʻe 40, ʻoku ngalingali naʻe maʻu ʻe Sīsū ha holi mālohi ke kai. “Kapau ko e ʻAlo koe ʻo e ʻOtua,” ko e lea ia ʻa Sētané, “fekau ke hoko ʻa e ngāhi foʻi maka ni ko e ngāhi foʻi ma.” Ka naʻe fakafisi ʻa Sīsū ke ngāueʻaki ʻa hono mālohi kuo ʻoange ʻe he ʻOtuá ki haʻane lelei fakafoʻituitui. ʻI hono kehé, naʻe pehē ʻe Sīsū: “Kuo tohi, Oku ikai moʻui ʻa e tangata ʻi he ma pe, ka ʻi he ngāhi folofola kotoa pe ʻoku ʻalu atu mei he fofonga ʻo e ʻOtua.”—Mt. 4:1-4; Teu. 8:3.
9. Ko e hā kuo pau ai ke tau talitekeʻi ʻa e ngaahi feinga ʻa e Tēvoló ke ngāueʻaki ʻa ʻetau ngaahi holi fakanatula fakaesinó?
9 ʻI he ʻahó ni, ʻoku feinga ai ʻa e Tēvoló ke ngāueʻaki ʻa e ngaahi holi fakanatula fakaesino ʻa e kau sevāniti ʻa Sihová. Ko ia kuo pau ai ke tau fakapapauʻi ʻa hono talitekeʻi ʻa e ngaahi ʻahiʻahi fakaefehokotaki fakaesino taʻetotonú, ʻa ia ʻoku tautefito ʻene hokolahia ʻi he māmani ʻulungāanga taʻetaau ko ení. ʻOku fakahaaʻi papau ʻe he Folofola ʻa e ʻOtuá: “Ta ʻoku ʻikai te mou ʻilo ʻapē, ka ʻilonga ha niʻihi ʻoku ngaue taʻetotonu, ʻe ʻikai hanau tofiʻa ʻi he Puleʻanga ʻo e ʻOtua? ʻOua naʻa tuku ke kākāʻi kimoutolu: ʻoku ʻikai ha feʻauaki, pe ha lotu ki he aitoli, pe ha tono ʻunoho, pe ha moʻui fakapelepele, pe ha fai faka-Sotoma, . . . te ne maʻu tofiʻa ʻi he Puleʻanga ʻo e ʻOtua.” (1 Kol. 6:9, 10) ʻOku hā mahino leva, ko e kakai ʻoku nau moʻuiʻaki ʻa e ʻulungāanga taʻetāú pea fakafisi ke liliú heʻikai fakaʻatā ke nau moʻui ʻi he māmani foʻou ʻa e ʻOtuá.
10. Fakatatau ki he Mātiu 4:5, 6, ko e hā ʻa e toe ʻahiʻahi naʻe ngāueʻaki ʻe Sētane ʻi ha feinga ke maumauʻi ʻa e anga-tonu ʻa Sīsuú?
10 ʻI he fekauʻaki mo e taha ʻo e ngaahi ʻahiʻahi naʻe hokosia ʻe Sīsū ʻi he toafá, ʻoku fakahaaʻi ʻe he Tohi Tapú: “Pea toki ʻave ia ʻe he Tevolo ki he Kolo Tapu, ʻo ne fokotuʻu ia ki he tuʻahivi ʻo e Temipale, mo ne pehe ki ai, Kapau ko e ʻAlo koe ʻo e ʻOtua, hopo ki lalo; he kuo tohi, He kouna ʻe ia ʻene kau angelo telia ʻa koe; pea te nau fataki nima koe naʻa pākia ho vaʻe ʻi ha maka.” (Mt. 4:5, 6) Naʻá ne fakahuʻunga ʻe iku eni ki hano fakahāhā anga-kehe ʻo e tuʻunga Mīsaia ʻo Sīsuú. Kae kehe, ko hono moʻoní, naʻe mei hoko eni ko ha ngāue taʻetotonu mo hīkisia, ʻa ia naʻe ʻikai mei fakahōifua mo poupouʻi ia ʻe he ʻOtuá. Naʻe toe tauhi maʻu ai ʻe Sīsū ʻa ʻene anga-tonu kia Sihová peá ne tali ki ai ʻaki ʻene lave ki ha konga Tohi Tapu. Naʻá ne pehē: “Kuo tohi foki, ʻE ʻikai te ke haʻaki ʻahiʻahiʻi ʻa e ʻEiki ko ho ʻOtua.”—Mt. 4:7; Teu. 6:16.
11. ʻE fēfē nai hano ʻahiʻahiʻi kitautolu ʻe Sētane, pea ko e hā ʻa e ola ʻe lava ke hokó?
11 ʻE ʻahiʻahiʻi nai kitautolu ʻe Sētane ke tau kumi lāngilangi ʻi he ngaahi founga kehekehe. Te ne feinga nai ke fakaʻaiʻai kitautolu ke tau faʻifaʻitaki ki he ngaahi ākenga fakamāmaní ʻi he valá mo e teuteú pe ke tau kau ʻi ha fakafiefia ʻoku ala fehuʻia. Ka ʻo kapau te tau tukunoaʻi ʻa e akonaki ʻa e Tohi Tapú pea faʻifaʻitaki ki he māmaní, ʻe lava ke tau ʻamanekina ʻe maluʻi kitautolu ʻe he kau ʻāngeló mei he ngaahi nunuʻa kovi ʻo ha ʻalunga pehē? Neongo naʻe fakatomala ʻa Tuʻi Tēvita ʻi heʻene ngaahi angahala fekauʻaki mo Patisepá, naʻe ʻikai ke maluʻi ai ia mei he ngaahi nunuʻa ʻo ʻene tōʻongá. (2 Sam. 12:9-12) ʻAi ke ʻoua te tau ʻahiʻahiʻi ʻa Sihova ʻi ha ngaahi founga taʻetotonu, ʻaki hono fakatupulekina nai ʻa e tuʻunga ko e kaumeʻa mo e māmaní.—Lau ʻa e Semisi 4:4; 1 Sione 2:15-17.
12. Ko e hā ʻa e ʻahiʻahi ʻoku lave ki ai ʻi he Mātiu 4:8, 9, pea naʻe anga-fēfē ʻa e tali ʻa e ʻAlo ʻo e ʻOtuá?
12 Ko e toe ʻahiʻahi ʻe taha naʻe ngāueʻaki ʻe he Tēvoló ʻi he toafá naʻe kau ki ai ha tuʻuaki ke ʻoange kia Sīsū ʻa e mafai fakapolitikale. Naʻe fakahaaʻi ʻe Sētane kia Sīsū ʻa e ngaahi puleʻanga kotoa pē ʻo e māmaní mo honau lāngilangí peá ne pehē: “Koe ngāhi meʻa ni kotoa pe te u ʻatu moʻou, ʻo kapau te ke fakatomapeʻe ʻo lotu kiate au.” (Mt. 4:8, 9) Ko ha feinga taʻefaitotonu moʻoni ia ke maʻu ʻa e lotu ʻoku fai kia Sihová pea ke fakaʻaiʻai ʻa Sīsū ke ne taʻefaitōnunga moʻoni ki he ʻOtuá! ʻI he fakalaulauloto ʻi he holi ke lotu ange kiate iá, ko e ʻāngelo mateaki ko ia ki muʻá naʻá ne hoko ai ko e tokotaha ʻahiʻahi angahalaʻia, mānumanu mo kovi ange fau ko Sētane ko e Tēvoló. (Sem. 1:14, 15) Kae kehe, ʻi hono kehe ʻaupitó, naʻe fakapapauʻi ʻe Sīsū ke hanganaki faitōnunga ki heʻene Tamai fakahēvaní peá ne fakahaaʻi ange ai: “Setane, fei mo ʻalu! he kuo tohi, Ko e ʻEiki ko ho ʻOtua te ke lotu ki ai, pea ko ia pe toko taha te ke ʻotuaʻaki.” Ko ia naʻe toe fakafepakiʻi ai ʻe Sīsū ʻa e Tēvoló ʻi ha ngaahi kupuʻi lea mahino mo papau. Naʻe ʻikai ke loto ʻa e ʻAlo ʻo e ʻOtuá ke ʻi ai haʻane pīkinga ʻe taha ki he māmani ʻo Sētané pea ʻe ʻikai ʻaupito ke ne lotu ki he tokotaha fulikivanu ko iá.—Mt. 4:10; Teu. 6:13; 10:20.
“Tali Tekeʻi ʻa e Tevolo, pea Te Ne Hola Meiate Kimoutolu”
13, 14. (a) ʻI hono fakaʻaliʻali kia Sīsū ʻa e ngaahi puleʻanga kotoa ʻo e māmaní, ko e hā naʻe tuʻuaki ange kiate ia ʻe he Tēvoló? (e) ʻOku anga-fēfē ʻa e feinga ʻa Sētane ke fakameleʻi kitautolú?
13 ʻI hono fakahāhā kia Sīsū ʻa e ngaahi puleʻanga kotoa ʻo e māmaní, naʻe tuʻuaki ange ai ʻe he Tēvoló kiate ia ha mafai fakaetangata taʻehanotatau. Naʻe ʻamanaki ʻa Sētane ko e meʻa ʻe sio ki ai ʻa Sīsuú ʻe fakamānako kiate ia pea fakatuipauʻi ai kiate ia ʻe lava ke ne hoko ko e taki fakapolitikale mālohi taha ia ʻi he māmaní. ʻI he ʻahó ni, ʻoku ʻikai ke tuʻuaki mai ʻe he Tēvoló ia kiate kitautolu ha ngaahi puleʻanga, ka ʻokú ne feinga ke fakameleʻi ʻa hotau lotó fakafou ʻi hotau matá, telingá mo e ʻatamaí.
14 ʻOku puleʻi ʻe he Tēvoló ʻa e māmani ko ení. Ko ia ai, ʻokú ne puleʻi ʻa e mītiá. ʻI heʻene peheé, ʻoku ʻikai fakaʻohovale ʻa e hūhū ʻa e ʻulungāanga taʻetāú mo e fakamālohí ʻi he meʻa ʻoku lautohi fekauʻaki mo ia, mamata, mo fanongo ki ai ʻa ia ʻoku tokonaki ʻe he māmaní. ʻOku feinga ʻa e ngaahi tuʻuaki ʻa e māmani ko ení ke langaʻi ʻiate kitautolu ha holi ke fakatau mai ʻa e meʻa lahi fakaʻulia ʻa ia ʻoku ʻikai te tau fiemaʻu. ʻI he ngaahi founga peheé, ʻoku toutou fakataueleʻi ai kitautolu ʻe he Tēvoló ʻaki ʻa e ngaahi meʻa fakamānako fakamatelie ʻa ia ʻe lava ke ne tohoakiʻi ʻa hotau matá, telingá mo hotau ʻatamaí. Ka ʻi he taimi ʻoku tau fakafisi ai ke lau, mamata, mo fanongo ki he ngaahi meʻa ʻoku ʻikai ala tali Fakatohitapú, ko hono moʻoní ʻoku tau pehē ai: “Setane, fei mo ʻalu!” ʻOku tau faʻifaʻitaki ai kia Sīsū ʻi he tuʻumaʻu mo fakapapauʻi ʻa ʻetau talitekeʻi ʻa e māmani taʻemaʻa ʻo Sētané. Ko e moʻoniʻi meʻa ko ia ʻo e ʻikai ke tau hoko ko e konga ʻo e māmani ʻo Sētané ʻoku toe hā ia ʻi he anga ʻo ʻetau fakahaaʻi loto-toʻa ko e Kau Fakamoʻoni ʻa Sihova mo e kau muimui ʻo Kalaisi ʻa kitautolu ʻi he ngāué, ʻi he ʻapiakó, ʻi hotau feituʻú pea ʻi he lotolotonga ʻo hotau ngaahi kāingá.—Lau ʻa e Maake 8:38.
15. Ko e hā ʻoku fiemaʻu ai ʻa e hokohoko ʻāʻā ʻi hono talitekeʻi ʻa Sētané?
15 Hili ʻa e feinga taʻelavameʻa hono tolu ʻa e Tēvoló ke ʻai ke fakangaloku ʻe Sīsū ʻa ʻEne anga-tonu ki he ʻOtuá, naʻe “toki tukuange ia ʻe he Tevolo.” (Mt. 4:11) Kae kehe, naʻe ʻikai taumuʻa ʻa Sētane ia ke tuku ʻene ʻahiʻahiʻi ʻa Sīsuú, he ʻoku tala mai kia kitautolu: “Pea kuo fakaʻosi ʻe he Tēvolo ʻa e ʻahiʻahi kotoa pē [ʻi he toafá], pea ne ʻalu meiate ia ʻo tali faingamālie.” (Luke 4:13) ʻI he taimi ʻoku tau lavameʻa ai ʻi hono talitekeʻi ʻa e Tēvoló, ʻoku totonu ke tau fakamālō kia Sihova. Ka ʻoku totonu ke tau toe kumi ki he tokoni hokohoko ʻa e ʻOtuá, he ʻe toe foki mai ʻa e Tēvoló ke ʻahiʻahiʻi kitautolu ʻi ha toe taimi ʻe faingamālie ai kiate iá—ʻo ʻikai ʻi he taimi ʻoku tau ʻamanekina nai ai ha ʻahiʻahí. Ko ia ai, kuo pau ke tau ʻāʻā ai pē ʻi he taimi kotoa, ʻo mateuteu ke kītaki ʻi hono fai ʻa e ngāue toputapu kia Sihová neongo ʻa e ngaahi ʻahiʻahi kuo pau ke tau fehangahangai mo iá.
16. Ko e hā ʻa e ivi mālohi ʻoku ʻomai ʻe Sihova kia kitautolú, pea ko e hā ʻoku totonu ai ke tau lotu ʻo kole iá?
16 Ke tokoniʻi kitautolu ʻi heʻetau ngaahi feinga ke talitekeʻi ʻa e Tēvoló, ʻoku totonu ke tau lotu ʻo kole pea te tau maʻu ai ʻa e ivi mālohi taha ʻi he ʻunivēsí—ko e laumālie māʻoniʻoni ʻo e ʻOtuá. Te ne ʻai kitautolu ke tau malava ʻo fai ʻa e ngaahi meʻa ʻa ia ʻe ʻikai lava ke tau fai ʻi he mālohi pē ʻo kitautolú. Naʻe fakapapauʻi ʻe Sīsū ki hono kau muimuí ʻa e ala maʻu ʻo e laumālie ʻo e ʻOtuá ʻaki ʻene pehē: “Kapau ʻoku mou ʻilo ke foaki meʻaʻofa lelei ki hoʻomou fanau, neongo ko e faʻahinga [taʻehaohaoa mo] kovi kimoutolu: huanoa ʻa e Tamai ʻi he langi ʻene foaki ʻa e Laumālie Māʻoniʻoni kiate kinautolu ʻoku kole kiate ia.” (Luke 11:13) Tau hokohoko atu ʻa e lotu kia Sihova ʻo kole hono laumālie māʻoniʻoní. ʻI hono poupouʻi kitautolu ʻe he ivi mālohi taha ko ení ʻi heʻetau fakapapauʻi ke talitekeʻi ʻa e Tēvoló, te tau malava ai ke hoko ʻo ikuna. Tānaki atu ki he lotu tuʻumaʻu mo tōtōiví, ʻoku fiemaʻu ke tau ʻai ʻa e teunga tau fakalaumālie kakato mei he ʻOtuá koeʻuhi ‘ke tau lava ke tuʻu ki he ngaahi tuʻutuʻuni kākā ʻa e Tevoló.’—Ef. 6:11-18.
17. Ko e hā ʻa e fiefia naʻá ne tokoniʻi ʻa Sīsū ke ne talitekeʻi ʻa e Tēvoló?
17 Naʻe toe tokoniʻi ʻe ha meʻa kehe ʻa Sīsū ke ne talitekeʻi ʻa e Tēvoló, pea ʻe lava ke ne tokoniʻi mo kitautolu foki. ʻOku pehē ʻe he Tohi Tapú: “Ne ne kataki ae bekia i he akau, mo ne [Sīsū] taetokaga ki he fakama, koe mea i he fiefia nae tuku i hono ao, bea kuo nofo eni i he nima toomatau oe afioaga oe Otua.” (Hep. 12:2, PM) ʻE lava ke tau maʻu ʻa e fiefia meimei tatau ʻi hono pouaki ʻa e tuʻunga-hau ʻo Sihová, fakalāngilangiʻi ʻa hono huafa māʻoniʻoní, pea tauhi ʻi heʻetau fakakaukaú ʻa e pale ʻo e moʻui taʻengatá. Ko ha fiefia ē te tau hokosia ʻi he taimi ʻe fakangata ʻosi ai ʻa Sētane mo e kotoa ʻo ʻene ngaahi ngāué ʻo taʻengata pea ‘maʻu ʻa e fonuá ʻe he faʻa katakí; pea nau fefiefiaʻi ʻi he melino lahi’! (Sāme 37:11) Ko ia ai, hanganaki talitekeʻi ʻa e Tēvoló ʻo hangē ko ia naʻe fai ʻe Sīsuú.—Lau ʻa e Semisi 4:7, 8.
ʻE Fēfē Haʻo Tali?
• Ko e hā ʻa e fakamoʻoni ʻoku hā ai ʻa hono fakahaofi ʻe Sihova ʻa hono kakaí?
• Naʻe anga-fēfē hono fokotuʻu ʻe Sīsū ha faʻifaʻitakiʻanga ʻi hono talitekeʻi ʻo Sētané?
• ʻI he ngaahi founga fē ʻe lava ke ke talitekeʻi ai ʻa e Tēvoló?
[Fakatātā ʻi he peesi 29]
Ko e kaumeʻa mo e māmaní ʻoku tau hoko ai ko e fili ʻo e ʻOtuá
[Fakatātā ʻi he peesi 31]
Naʻe talitekeʻi ʻe Sīsū ʻa e tuʻuaki ange ʻe Sētane ʻa e kotoa ʻo e ngaahi puleʻanga fakaemāmaní