ʻOkú Ke “Fakatupu Koloa ki he ʻOtua”?
ʻI HE lotolotonga ʻo e ngaahi pealapeli fakatupunga-fakakaukau lahi naʻe fai ʻe Sīsū Kalaisí, ʻoku ʻi ai ʻa e taha ai ʻo fekauʻaki mo ha tokotaha maʻu ʻapi koloaʻia. ʻI ha feinga ke fakapapauʻi ha kahaʻu malu maʻaná, naʻe faʻu ai ʻe he tokotaha maʻu ʻapí ha ngaahi palani ke langa ha ngaahi fale tukuʻanga koloa lalahi ange. Neongo ia, ʻi he talanoa fakatātā ʻa Sīsuú, ʻoku ui ai ʻa e tangatá ko e “taʻeloto” pe tokotaha fakavalevale. (Luke 12:16-21) Ko e ngaahi liliu Tohi Tapu lahi ʻoku nau ngāueʻaki foki naʻa mo e foʻi lea “vale.” Ko e hā ʻoku fai ai ʻa e fakafuofua anga-fefeká?
ʻOku hangehangē naʻe ʻikai fakakau ʻa e ʻOtuá ʻi he ngaahi palani ʻa e tangata koloaʻiá ni; pe te ne ʻoange ha fakamālō ʻe taha ki he ʻOtuá koeʻuhi ko e fua lahi ʻo e kelekelé. (Mātiu 5:45) ʻI hono kehé, naʻá ne lea pōlepole: “Siʻi Laumālie, [kuo] lahi ʻeni hoʻo ngaahi meʻa lelei kuo tuku, ʻo feʻunga mo ha ngaahi taʻu lahi; malōlōā, kai, inu, mo nekeneka.” ʻIo, naʻá ne fakakaukauloto atu ko e ola ʻo ʻene ngaahi feingá ʻe hoko ia ko ha “ʻā malu.”—Palovepi 18:11, NW.
ʻI he fakatokanga ʻo fekauʻaki mo ha faʻahinga laumālie hīkisia peheé, naʻe tohi ai ʻe he ākonga ko Sēmisí: “Meʻa mai ʻeni, ʻa kimoutolu ʻoku lau, ʻo pehe, Ko e ʻaho ni, pe ko e ʻapongipongi, te mau fononga ki he kolo ko é pea mau nofo ai ʻo taʻu katoa, pea te mau fai fakatau ai ʻo ngaohi paʻanga; ʻosi ʻoku ʻikai te mou ʻilo ʻa e meʻa ʻo e ʻapongipongi. He ko e ha tū hoʻomou moʻui? Ko e mao pe kimoutolu ʻa ia ʻoku ha fuoloa siʻi pea toki mole foki.”—Semisi 4:13, 14.
Naʻe hoko moʻoni ʻa e ngaahi lea ko iá, ko e tangata koloaʻia ʻi he pealapeli ʻa Sīsuú naʻe tala ange kiate ia: “ʻA e taʻeloto [pe tokotaha fakavalevale]! ko e pō ni pe te nau tala ke ke tuku mai ho laumālie: pea ʻe ʻa hai koā ʻa e ngaahi meʻa naʻa ke tokonaki?” ʻI he hangē ha kakapu ʻoku puli atú, ko e tangata koloaʻiá ʻe mole atu ia ki muʻa ke ne lava ʻo sio ʻoku fakahoko ʻa ʻene ngaahi misí. ʻOku tau ʻiloʻi nai ʻa e lēsoní? Naʻe pehē ʻe Sīsū: “Ko e anga ʻeni ʻo ia ʻoku fokotuʻu koloa maʻana, ka ʻoku ʻikai te ne fakatupu koloa ki he ʻOtua.” ʻOkú ke “fakatupu koloa ki he ʻOtua”?