Vakai ʻa e Tohi Tapú

Ko e Hā ʻa e ʻAho Fakamaau?

ʻOku pehē ʻe he Tohi Tapú ko e ʻOtuá “kuo ne kotofa ha ʻaho, ʻa ia ʻoku ne teu fakamāu ai ʻa māmani.” (Ng. 17:31) Ki he kakai tokolahi ʻoku ʻikai te nau tali ʻa e ʻamanaki ko ia ke hoko kia kinautolu ha faʻahinga fakamāú. ʻOku pehē ʻa hoʻo ongoʻí?

KAPAU ko ia, ʻe lava ke ke maʻu ʻa e fiemālie ʻi he moʻoniʻi meʻa ko ia ko e ʻAho Fakamāú ko ha fokotuʻutuʻu anga-ʻofa ia ʻa ia ʻe ʻomai ai ʻa e tāpuaki lahi ki he fāmili ʻo e tangatá—ʻo kau ai ʻa e faʻahinga ko ia kuo nau maté. (Mātiu 20:28; Sione 3:16) Ko e hā ʻoku fiemaʻu ai ʻa e ʻAho Fakamāú? Ko e hā ʻe hoko moʻoni lolotonga ʻa e “ʻaho” ko iá?

ʻAho Fakamaau—Ko e Hā ʻOku Fiemaʻu Aí?

ʻI hono tuku ʻe he ʻOtuá ʻa e tangatá ʻi he māmaní, naʻe ʻikai te ne taumuʻá ke hoko pē ia ko ha feituʻu ʻe siviʻi ai ʻa e tangatá ki he moʻui ʻi ha toe feituʻu kehe ʻi he kahaʻú. Naʻá ne fakatupu ʻa e tangatá ke moʻui taʻengata ʻi he māmaní. Neongo ʻa ʻena haohaoa fakaesino mo fakaʻatamaí, naʻe angatuʻu ʻa e ʻuluaki ongo meʻa fakaetangatá ki he ʻOtuá. Ko hono olá, naʻe mole ai meia kinaua ʻa e ʻamanaki ʻo e moʻui taʻengatá peá na ʻomai ai ʻa e angahala mo e mate ki he kotoa ʻo hona hakó.—Senesi 2:15-17; Loma 5:12.

Ko e ʻAho Fakamāú ko ha vahaʻa taimi ia ʻo ha taʻu ʻe taha afe ʻa ia ʻi he lolotonga iá ʻe maʻu ai ʻe he tangatá ʻa e faingamālie ke toe maʻu ʻa e meʻa naʻe fakamoleki ʻe ʻĀtama mo ʻIví.a Fakatokangaʻi ʻa e Ngāue 17:31, naʻe lave ki ai ʻi ʻolungá, ʻoku pehē ai ko e ʻAho Fakamāú ʻe uesia ai ʻa e faʻahinga ko ia ʻoku moʻui ʻi he “māmani.” Ko e faʻahinga te nau maʻu ʻa e fakamaau fakahōifuá te nau moʻui ʻi he māmaní pea te nau maʻu ʻa e moʻui taʻengatá ʻi he ngaahi tuʻunga haohaoa. (Fakahā 21:3, 4) Ko ia ai, ʻoku tokoni ʻa e ʻAho Fakamāú ke fakahoko ʻa e muʻaki taumuʻa ʻa e ʻOtuá ki he tangatá mo e māmaní.

Ko e Fakamaau ʻa e ʻOtuá kuo fakanofó ko Kalaisi Sīsū. ʻOku pehē ʻe he Tohi Tapú ʻe hanga ʻe Sīsū ʻo “fakamāu ʻa e moʻui mo e pekia.” (2 Timote 4:1) Ko hai ʻa e kau “moʻui” ʻa ia ʻe fakamāuʻí? ʻE anga-fēfē ʻa e toe moʻui ʻa e maté ʻi he “māmani”?

Fakamāuʻi ʻe Sīsū ʻa e Kau “Moʻui”

ʻOku tau fakaofiofi he taimí ni ki he ngataʻanga ʻo e fokotuʻutuʻu lolotonga naʻe tomuʻa talá, ʻa ia ʻe fakaʻauha ai ʻe he ʻOtuá ʻa e konga kotoa ʻo e sōsaieti kākā fakaetangatá pea toʻo ʻa e fulikivanú. Ko e kau hao ʻi he fokotuʻutuʻu ko ení ʻa e kau “moʻui” ʻa ia ʻe fakamāuʻí.—Fakahā 7:9-14; 19:11-16.

Lolotonga ʻa e vahaʻa taimi ko ia ʻo e fakamāú, ʻa ia ko hono lōloá ko e taʻu ʻe 1,000, ko Kalaisi Sīsū fakataha mo e kakai tangata mo e fefine ʻe toko 144,000 kuo toetuʻu ki he moʻui ʻi hēvaní te nau pule mai ki he māmaní. Te nau ngāue ko e ngaahi tuʻi mo e kau taulaʻeiki, ʻi hono ngāueʻaki ʻa e ngaahi ʻaonga ʻo e feilaulau huhuʻi ʻa Sīsuú pea hiki hake māmālie ʻa e faʻahinga faitōnunga ʻo e tangatá ki he tuʻunga haohaoa fakaesino mo fakaʻatamai.—Fakahā 5:10; 14:1-4; 20:4-6.

Lolotonga ʻa e ʻAho Fakamāú, ʻe taʻofi ai ʻa Sētane mo e kau tēmenioó mei heʻenau tākiekina ʻa e ngāue ʻa e tangatá. (Fakahā 20:1-3) Kae kehe, ʻi he ngataʻanga ʻo e ʻAho Fakamāú, ʻe fakaʻatā ai ʻa Sētane ke ne ʻahiʻahiʻi ʻa e mateaki ʻa e faʻahinga kotoa ʻo e tangatá ʻoku moʻuí. Ko e faʻahinga te nau mateaki ai pē ki he ʻOtuá te nau lavaʻi ai ʻa e ʻahiʻahi naʻe tō ai ʻa ʻĀtama mo ʻIví. ʻE fakamāuʻi kinautolu ʻoku nau taau ke maʻu ʻa e moʻui taʻengatá ʻi he māmani Palataisi ʻe toe fakafoki maí. Ko e faʻahinga ʻoku nau fili ke angatuʻu ki he ʻOtuá ʻe fakaʻauha taʻengata kinautolu, ʻo hangē pē ko Sētane mo e kau tēmenioó.—Fakahā 20:7-9.

Fakamāuʻi ʻa e “Pekia”

ʻOku pehē ʻe he Tohi Tapú ʻi he lolotonga ʻa e ʻAho Fakamāú ko e kau maté te nau “tuu hake.” (Mātiu 12:41, PM) Naʻe pehē ʻe Sīsū “ʻoku ʻunu mai ha taimi, ʻa ia ʻe fanongo ai ki hono leʻo ʻe he kakai kotoa pe ʻoku ʻi he ngaahi faʻitoka, pea te nau ʻalu atu mei ai; ko kinautolu naʻe ngaue lelei, ki he toetuʻu ke moʻui, ko kinautolu naʻe fai kovi, ki he toetuʻu ke fakamāu.” (Sione 5:28, 29) ʻOku ʻikai ʻuhinga ení ki he ngaahi laumālie mavahe mei he sino ʻo e faʻahinga kuo maté. Ko e kau maté ʻoku ʻikai ʻaupito te nau ʻiloʻi ha meʻa pea ʻoku ʻikai hanau laumālie ʻe hao moʻui ʻi he maté. (Koheleti 9:5; Sione 11:11-14, 23, 24) ʻE fakafoki mai ʻe Sīsū ʻa e faʻahinga ʻoku mohe ʻi he maté ke nau toe moʻui ʻi he māmaní.

ʻE makatuʻunga ʻa e fakamāuʻi ʻo e faʻahinga ʻe toetuʻú ʻi he meʻa naʻa nau fai ki muʻa ke nau maté? ʻIkai. ʻOku akoʻi ʻe he Tohi Tapú “ko ia kuo mate kuo ataʻatā ia meia Angahala.” (Loma 6:7) Ko ia ai, ʻi he hangē ko e faʻahinga ʻe hao ʻi he ngataʻanga ʻo e fokotuʻutuʻu ko ení, ko e faʻahinga ʻe toetuʻu ki he moʻui ʻi he māmaní ʻe fakamāuʻi kinautolu “ʻo fakatatau ki heʻenau ngāue” lolotonga ʻa e ʻAho Fakamāú. (Fakahā 20:12, 13) Fakatuʻunga ʻi he ola fakaʻosi ʻo ʻenau ngāué, ʻe iku ʻa e meʻá ni ki ha toetuʻu ʻa ia ko hono ikuʻangá ko e moʻui taʻengata pe ko ha toetuʻu ʻe iku ki he ʻauha. Ko e tokolahi ʻo e faʻahinga ko ia ʻe fakafoki ki he moʻuí te nau hoko ai ʻi he ʻuluaki taimí ʻo ʻilo fekauʻaki mo e ʻOtua ko Sihová mo ʻene ngaahi fiemaʻu ki he moʻuí. Te nau maʻu ai ʻa e faingamālie ke moʻui ʻo fehoanaki mo e finangalo ʻo e ʻOtuá pea maʻu ʻa e moʻui taʻengata ʻi he māmaní.

ʻIkai ha ʻUhinga ke Manavahē

Ko e ʻAho Fakamāú ʻe hoko ia ʻo ʻikai ko ha taimi pē ʻo e fakahinohino mei he ʻOtuá ka ko ha toe taimi foki ia ki he faʻahinga ʻoku moʻuí ke nau ngāueʻaki ʻa e meʻa kuo nau akó pea maʻu mei ai ʻa e ngaahi tāpuaki. Sioloto atu pē ki hoʻo fiefia ʻi he toe fakataha mo e ngaahi ʻofaʻanga ʻe toetuʻú pea tupulaki ʻo aʻu ki he tuʻunga haohaoa fakaetangatá fakataha mo kinautolu!

ʻE fakaʻatā ʻe he ʻOtuá ʻa Sētane ke ne ʻahiʻahiʻi ʻa e meʻamoʻui fakaetangata mateakí ʻi he ngataʻanga ʻo e ʻAho Fakamāú. Ka ʻoku ʻikai ha fiemaʻu ke loto-moʻua pe manavahē. ʻI he ngataʻanga ʻo e ʻAho Fakamāú, ʻe mateuteu kakato ai ʻa e faʻahinga kotoa ʻoku moʻuí ke fehangahangai mo e ʻahiʻahi fakaʻosi ko ení. Ko ia ai, ʻe hoko ʻa e ʻAho Fakamāú ko ha konga ia ʻo hono fakahoko ʻa e taumuʻa ʻa e ʻOtuá ke fakangata ʻosi ʻa e nunuʻa kotoa ʻo e muʻaki angatuʻu ki he ʻOtuá ʻi he ngoue ʻo ʻĪtení.

[Fakamatala ʻi lalo]

KUÓ KE FIFILI?

● Ko e hā ʻa e ʻAho Fakamaau?—Ngāue 17:31.

● Ko hai ʻe fakamāuʻí?—2 Timote 4:1.

● Ko e hā hono lōloa ʻo e ʻAho Fakamāú?—Fakahā 20:4-6.

[Fakamatala ʻi he peesi 11]

Sioloto atu pē ki hoʻo fiefia ʻi he toe fakataha mo e ngaahi ʻofaʻanga ʻe toetuʻú

[Fakatātā ʻi he peesi 10]

ʻI he malumalu ʻo e pule ʻa Kalaisí, ko e faʻahinga kuo maté te nau toetuʻu ki ha māmani palataisi