Sīsū—Ko ʻEne Moʻuí mo ʻEne Ngāue Fakafaifekaú

Anga-Fakatōkilalo ʻi he Laka-Atu Fakaʻosí

NAʻE ʻosi aʻu ʻa Pita mo Sione ki Selusalema mo e ngaahi fakahinohino ʻa Sīsū ke fai ʻa e ngaahi teuteu ki he Laka-atú. ʻOku hā mahino ko Sīsū mo e kau ʻaposetolo kehe ʻe toko hongofulú naʻa nau toki aʻu ki ai ʻi he efiafi pē ko iá. Naʻe taitaitō hifo ʻa e laʻaá ʻi he tafatafaʻaki langí mo e hifo atu ʻa Sīsū mo ʻene kau ākongá mei he Moʻunga ko ʻŌlivé. Ko e sio fakaʻosi ʻeni ʻa Sīsū ʻi he taimi ʻahó ki he koló mei he moʻungá ni kaeʻoua ke ʻosi ʻene toetuʻú.

Naʻe vave ʻa e aʻu atu ʻa Sīsū mo ʻene kau fonongá ki he koló pea nau fononga atu ki he ʻapi ʻa ia te nau kātoangaʻi ai ʻa e Laka-atú. Naʻa nau kaka ʻi ha sitepu ki he loki lahi ʻi ʻolunga, ʻa ia naʻe fai ai ʻa e teuteu hono kotoa ki heʻenau kātoangaʻi fakaekinautolu ʻa e Laka-atú. Naʻe fakatuʻotuʻa atu ʻa Sīsū ki he taimi ko ʻení, ʻo hangē ko ʻene leá: “Kuo u matuʻaki holi ke kai ʻa e pāsova ko eni fakataha mo kimoutolu, ʻi he teʻeki ke hoko ʻeku mamahi.”

Fakatatau ki he tukufakaholó, naʻe inu ʻe he kau maʻu ʻo e Laka-atú ʻa e ipu uaine ʻe fā. ʻI he ʻosi hono tali ʻa e ipu hono tolú, naʻe fai ʻe Sīsū ha lotu fakamālō peá ne pehē: “Toʻo ʻeni ʻo vahevahe kiate kimoutolu: he ʻoku ou tala atu, Hili ʻeni, ʻe ʻikai ʻaupito te u inu mei he fua ʻo e vaine, kaeʻoua ke hoko mai ʻa e puleʻanga ʻo e ʻOtua.”

ʻI he lolotonga ʻo e kaí, naʻe tuʻu hake ʻa Sīsū, ʻo vete hono ngaahi kofu-tuʻá, peá ne toʻo ha tauveli, pea fakafonu ha pēsoni i he vai. Naʻe hangē ko ia naʻe faʻa faí, ko e tokotaha naʻá ne fai ʻa e fakaafé naʻe pau ke ne fufulu ʻa e vaʻe ʻo e kau fakaafé. Ka koeʻuhi ko e kai ko ʻení ia naʻe ʻikai ke ʻi ai ha tokotaha naʻá ne fai ʻa e fakaafé, pea naʻe fai ʻe Sīsū ia ʻa e ngāue ko iá. Naʻe malava pē ki ha tokotaha ʻo ʻene kau ʻaposetoló ke ne ngāueʻaki ʻa e faingamālie ko iá ke ne fai ia; ka ʻoku hā mahino koeʻuhi ko e feʻauʻauhi naʻe kei ʻiate kinautolú, naʻe ʻikai ke fai ai ia ʻe ha taha. Naʻa nau mā ʻi he kamata ke hanga ʻe Sīsū ʻo fufulu ʻa honau vaʻé.

Naʻe lea fakafepaki ʻa Pita ʻi he haʻu ʻa Sīsū kiate iá: “ʻE ʻikai ʻaupito te ke fufulu hoku vaʻe ʻo taʻengata.”

Naʻe pehē ʻe Sīsū: “Kapau ʻe ʻikai te u fufulu koe, ta ʻoku ʻikai haʻo kau mo au.”

Naʻe tali atu ʻe Pita: “ʻEiki, ʻoua ʻe ngata ʻi hoku vaʻe pe, kae fai ki hoku ongo nima ni mo hoku ʻulu.”

Naʻe tali ʻe Sīsū: “Ko ia kuo palutu, koeʻumaʻā ʻene toe fufulu ia ngata pe ʻi hono vaʻe, ka kuo maʻa hono kotoa: pea ʻoku maʻa foki ʻa kimoutolu, ka ʻoku ʻikai te mou pehe kotoa pē.” Naʻá ne leaʻaki ʻeni koeʻuhi he naʻá ne ʻilo naʻe palani ʻe Siutasi ʻIsikaliote ke lavakiʻi ia.”

ʻI he ʻosi hono fufulu ʻe Sīsū ʻa e vaʻe ʻo e toko hongofulu ma uá, kau ai mo e vaʻe ʻo e tokotaha te ne lavakiʻi iá, ko Siutasi, naʻá ne tui hono ngaahi kofu-tuʻá peá ne toe tokoto ki he tēpilé. Ko ia naʻá ne ʻeke: “ʻOku mahino kiate kimoutolu ʻa e meʻa kuo u fai kiate kimoutolu? ʻOku mou ui au ko Lapai, mo ʻEiki: pea ʻoku totonu hoʻomou lea pehe; he ko au ia. Pea kapau ā kuo u fufulu homou vaʻe, ʻa au ko e ʻEiki mo e Lapai; pea ʻoku totonu ke fai ʻekimoutolu foki, ʻo fefufuluʻaki homou vaʻe ʻomoutolu. He kuo u tuku hamou faʻifaʻitakiʻanga, koeʻuhi ke mou fai foki, ʻo hange ko ʻeku fai kiate kimoutolu. Ko au e, ko au e, ʻoku ou tala atu, ʻOku ʻikai ha tamaioʻeiki ʻe lahi ʻi heʻene ʻeiki, pe ha talafekau ʻiate ia naʻa ne fekauʻi ia. Kapau ʻoku mou ʻilo ʻa e ngaahi meʻa ko ia, pea ko e toki kakai monuʻia kimoutolu, ʻo kapau te mou fai ia.”

Ko ha lēsoni fakaʻofoʻofa ē ʻi he ngāue anga-fakatōkilaló! Naʻe ʻikai ke totonu ki he kau ʻaposetoló ke nau feinga ki he tuʻunga muʻomuʻá, ʻo fakakaukau naʻa nau fuʻu mahuʻinga fau ko ia naʻe totonu ke tauhi maʻu pē kinautolu ʻe he niʻihi kehé. Naʻe totonu ke nau muimui ki he sīpinga naʻe fokotuʻu ʻe Sīsuú. Naʻe ʻikai ko ha sīpinga ʻeni ia ki ha ouau fufulu vaʻe. Ka ko e sīpinga ʻo e loto-lelei ke ngāue taʻefilifilimānako, tatau ai pē pe ko e ngāue fakatamaioʻeiki pe ngāue ʻoku ʻikai ke fakafiemālie. Mātiu 26:​20, 21; Maʻake 14:​17, 18; Luke 22:​14-18; 7:44; Sione 13:​1-17.

◆ Ko e hā naʻe makehe ʻi he vakai ʻa Sīsū ki Selusalemá ʻi heʻene hū atu ke kātoangaʻi ʻa e Laka-atú?

◆ ʻI he lolotonga ʻo e Laka-atú, ʻoku hā mahino ko e ipu fē naʻe ʻoatu ʻe Sīsū ki he kau ʻaposetolo ʻe toko 12 ʻi he ʻosi ʻene tāpuakiʻí?

◆ Ko e hā ʻa e ngāue naʻe anga-maheniʻaki ki hono talitali ʻa e kau fakaafé ʻi he taimi naʻe ʻi māmani ai ʻa Sīsuú, pea ko e hā naʻe ʻikai ke teuteu ai ke fai ia ʻi he Laka-atu naʻe kātoangaʻi ʻe Sīsū mo ʻene kau ʻaposetoló?

◆ Ko e hā ʻa e taumuʻa ʻa Sīsū ʻi heʻene fai ʻa e ngāue fakatamaioʻeiki ko hono fufulu ʻa e vaʻe ʻo ʻene kau ʻaposetoló?