Ko Hai ʻOku Fanauʻi Foʻoú?

ʻOKU ʻalu ʻa e kakai lelei kotoa pē ki hēvani? ʻOku pehē ʻa e fakakaukau ʻa e tokolahi, ka naʻe ʻikai ke pehē ʻa e fakakaukau ia ʻa Sīsū Kalaisí. ʻI he lea ʻa Sīsū ki ha tokotaha-pule Siu ko Nikotīmasi, ʻa ia naʻe haʻu fakafufū kiate ia ʻi he poʻulí, naʻá ne pehē: “Pea kuo teʻeki ke ʻalu hake ha toko taha ʻo hu ki langi.”​—Sione 3:13.

Ka, naʻe fakahaaʻi ʻe Sīsū kia Nikotīmasi ʻe hoko ha taimi ʻa ia ʻe maʻu ʻe ha kakai ʻe niʻihi ʻa e monū ke hū ki he Puleʻanga ʻo hēvaní. Naʻe pehē ai ʻe Sīsū ʻo fekauʻaki mo e faʻahingá ni: “Kapau ʻe ʻikai fanauʻi ha taha ʻi he vai mo e Laumālie, ʻe ʻikai te ne lava ke hu ki he Puleʻanga ʻo e ʻOtua. Ko e meʻa kuo fanauʻi mei he kakano ko e kakano ia; pea ko e meʻa kuo fanauʻi mei he Laumālie ko e laumālie ia. ʻOua te ke ofo ʻi heʻeku pehē atu, Kuo pau ke mou fanauʻi foʻou.” Ka naʻe fifili ʻa Nikotīmasi pē ʻe malava fēfē nai ke toe fanauʻi foʻou ha tokotaha.​—Sione 3:​1-9.

Mahalo ʻokú ke fifili mo koe foki pe ko e hā ʻa e ʻuhinga ʻa Sīsuú. ʻE lava ke ʻuhinga ʻa ʻene ngaahi leá ki he ngaahi hokosia ʻo e liliu fakafokifā kuo taukaveʻi ʻe he tokolahi ʻoku nau ongoʻi kuo fakafonuʻaki kinautolu ʻa e laumālie māʻoniʻoni ʻo e ʻOtuá?

Ngaahi Ongoʻi pea mo e ʻAtamai

ʻOku pehē ʻe he niʻihi ko e fakapapauʻi pe kuo fanauʻi foʻou ha tokotaha, ko e ongoʻi ʻa e mālohi ʻo e laumālié. Ka, ʻoku malava ke takiheeʻi kitautolu ʻe hotau lotó mo e fakakaukaú, tautefito kapau ʻoku tākiekina ʻe ha ongoʻi mālohi.​—Selemaia 17:9.

Ko William Sargant, ko ha tokotaha fekumi ki he ngaahi ngāue ʻa e ongoʻí ki he fakakaukaú, ʻokú ne fakahā ʻa e fiemaʻu “ke tokanga ki he ngaahi tui kuo maʻu ko e fakatupunga ʻe he ongoʻí he ʻe malava ʻe hotau ʻatamaí ʻo kākaaʻi kitautolu.” Fakatatau kia Sargant, ko e fakatātā ʻe taha ko e ola ko ia ʻo e malanga ke fakaakeake ʻa e lotú mo e ngaahi fakamanamanaʻi fekauʻaki mo e tautea ko e afi ʻo helí. Ko hai ia ʻe ʻikai loto ke fanauʻi foʻou ke ʻalu ki hēvani he ka ʻikai ia ko e faingataʻaʻia pē mo e mamahi taʻengata? ʻOku pehē ʻe Sargant ʻi he taimi pehē ʻo e kulukia fakaeongó, “ʻoku tuku leva ki he tafaʻakí ʻa e fakakaukau leleí ia, ʻoku ʻikai leva ke toe ngāue fakataimi ʻa e komipiuta ia ʻo e ʻatamaí, pea ʻoku tali pē ʻo ʻikai ke toe fehuʻia ʻa e ngaahi fakakaukau mo e ngaahi tui foʻou.”​—The Mind Possessed.

Ko ia ai, ʻe lava fēfē ke ʻilo ʻe ha tokotaha pe ko e tui ki he fanauʻi foʻoú kuo “tali pē ia ʻo ʻikai ke toe fehuʻia”? Ko e founga ʻo e poto moʻoni ke tataki kitautolu ʻe he meʻa kotoa pē ʻa ia naʻe ʻai ʻe he laumālie māʻoniʻoni ʻo e ʻOtuá ke hiki ʻe he kau hiki ʻo e Tohitapú. Kuo fakalototoʻaʻi ʻa e kau Kalisitiané ke nau lotu ki he ʻOtuá ʻaki ʻa e ‘mafai ke fakakaukau fakalelei’ pea ʻoku fiemaʻu ke fakapapauʻi ko e meʻa ʻoku nau tui ki aí ʻoku moʻoni.​—Loma 12:​1, 2, NW; 1 Tesalonaika 5:21.

Ko e fanauʻi foʻoú ʻoku fakaava ai ki ha taha ʻa e taha ʻo e ngaahi monū mahuʻinga lahi taha kuo fakaʻatā ki he faʻahinga ʻo e tangatá. ʻOku fekauʻaki ia mo e meʻa fakaofo moʻoni ʻi he fakahoko ʻo e taumuʻa ʻa e ʻOtuá. Neongo ʻoku moʻoni kotoa ʻeni, ka ʻe lava ke malanga hake ʻa e ngaahi fehuʻi ʻo hangē ko ʻení: Ko hai ʻoku fanauʻi foʻoú? ʻOku hoko fēfē ʻa e meʻa ko ʻení? Ko e hā ʻa e ngaahi ʻamanaki kuo fokotuʻu ki he faʻahinga ko ʻení? Pea ko kinautolu pē ʻe fakahaofí?

[Fakatātā ʻi he peesi 3]

Naʻe fifili ʻa Nikotīmasi pe ʻe malava fēfē nai ke toe fanauʻi foʻou ha tokotaha