LAIPELI Taua Le‘o ‘I HE ‘INITANETÍ
Taua Le‘o
LAIPELI ‘I HE ‘INITANETÍ
Faka-Tonga
ʻ
  • ʻ
  • ā
  • ē
  • ī
  • ō
  • ū
  • TOHI TAPU
  • ‘Ū TOHI
  • NGAAHI FAKATAHA
  • Ko Hai ʻa Sīsū?
    Fiefia ʻi he Moʻuí ʻo Taʻengata!—Ako Tohi Tapu Fetalanoaʻaki
    • 1. Ko hai ʻa Sīsū?

      Ko Sīsuú ko ha ʻāngelo mālohi ia ʻoku nofo ʻi hēvani. Naʻe fakatupu ia ʻe Sihova ko e ʻOtuá ki muʻa ʻi he meʻa kotoa pē. ʻI he ʻuhinga ko iá, ʻoku ui ai ia “ko e ʻuluaki fakatupu ia ʻi he meʻa fakatupu kotoa pē.” (Kolose 1:15) ʻOku lave ʻa e Tohi Tapú fekauʻaki mo Sīsū ko e “ʻAlo tofu-pē-taha-ne-fakatupú” ʻe he ʻOtuá koeʻuhi ko Sīsū pē naʻe fakatupu fakahangatonu ʻe Sihová. (Sione 3:16) Naʻe ngāue fakataha ʻa Sīsū mo ʻene Tamaí, ʻa Sihova, ʻo tokoni kiate Ia ke fakatupu ʻa e ngaahi meʻa kehe kotoa pē. (Lau ʻa e Palōveepi 8:30.) ʻOku hokohoko atu ʻa Sīsū ke fiefia ʻi hono vahaʻangatae vāofi mo Sihová. ʻOkú ne ngāue mateaki ko e tangata-lea ʻa e ʻOtuá ko e “Folofolá” ʻo ʻoatu ʻEne ngaahi pōpoakí mo e fakahinohinó.​—Sione 1:14.

  • ʻE Anga-Fēfē Hono Fakahaofi Kitautolu ʻe he Pekia ʻa Sīsuú?
    Fiefia ʻi he Moʻuí ʻo Taʻengata!—Ako Tohi Tapu Fetalanoaʻaki
    • Lēsoni 27. Ko e sino ʻo Sīsuú ʻoku ʻohifo mei he ʻakaú.

      LĒSONI 27

      ʻE Anga-Fēfē Hono Fakahaofi Kitautolu ʻe he Pekia ʻa Sīsuú?

      ʻOku tau faiangahala, faingataʻaʻia mo maté koeʻuhí ko e ʻuluaki ongo mātuʻá ʻa ʻĀtama mo ʻIvi, naʻá na talangataʻa ki he ʻOtuá.a Ka ʻoku ʻikai siva ʻetau ʻamanakí. Naʻe fekau mai ʻe Sihova hono ʻAló, ʻa Sīsū Kalaisi, ki he māmaní ke pekia maʻa kitautolu koeʻuhí ke fakahaofi kitautolu mei he malaʻia ʻo e angahalá mo e maté. ʻOku akoʻi ʻe he Tohi Tapú, fakafou heʻene pekiá, naʻe tokonaki mai ʻe Sīsū ha huhuʻi. Ko e huhuʻí ko ha totongi ʻoku ʻoatu ke fakatauʻatāinaʻi ʻaki ha taha. Naʻe totongi ia ʻe Sīsū ʻaki ʻene moʻui fakaetangata haohaoá. (Lau ʻa e Mātiu 20:28.) Naʻe tuku ange loto-lelei atu ʻe Sīsū ʻene totonu ke moʻui taʻengata he māmaní ʻo fakaʻatā ai ʻa e hala kiate kitautolu ke tau toe maʻu kotoa ʻa e meʻa ne fakamoleki ʻe ʻĀtama mo ʻIví. Naʻe toe fakahaaʻi mai ʻe Sīsū mo Sihova ʻa e lahi ʻo ʻena ʻofa ʻiate kitautolú. ʻE fakalahi ʻe he lēsoni ko ení hoʻo houngaʻia ʻi he pekia ʻa Sīsuú.

      1. ʻOku anga-fēfē ʻetau maʻu ʻaonga he ʻahó ni mei he pekia ʻa Sīsuú?

      Koeʻuhi ko e kau angahala kitautolu, ʻoku tau fai ʻa e ngaahi meʻa lahi ʻoku taʻefakahōifua kia Sihova. Neongo ia, kapau ʻoku tau fakatomala moʻoni ʻi heʻetau ngaahi angahalá pea lotu kia Sihova fakafou ʻia Sīsū Kalaisi ke fakamolemoleʻi kitautolu, pea kapau ʻoku tau fai hotau lelei tahá ke ʻoua toe fai ʻa e fehālaaki ko iá, ʻoku lava ke tau maʻu ha kaumeʻa vāofi mo e ʻOtuá. (1 Sione 2:1) ʻOku pehē ʻe he Tohi Tapú: “Ko Kalaisi naʻá ne pekia tā-tuʻo-taha maʻá e ngaahi angahalá, ko ha tokotaha māʻoniʻoni maʻá e faʻahinga taʻemāʻoniʻoni, koeʻuhí ke taki ai kimoutolu ki he ʻOtuá.”​—1 Pita 3:18.

      2. ʻE anga-fēfē haʻatau maʻu ʻaonga ʻi he kahaʻú mei he pekia ʻa Sīsuú?

      Naʻe ʻomai ʻe Sihova ʻa Sīsū ke foaki atu ʻene moʻui haohaoá “koeʻuhi ko e tokotaha kotoa pē ʻokú ne ngāueʻi ʻa e tui” kia Sīsuú “ke ʻoua naʻa ʻauha ka ne maʻu ʻa e moʻui taʻengatá.” (Sione 3:16) Koeʻuhi ko e meʻa naʻe fai ʻe Sīsuú, ʻe vavé ni hono fakaleleiʻi kotoa ʻe Sihova ʻa e ngaahi meʻa ʻoku kovi naʻe tupu mei he talangataʻa ʻa ʻĀtamá. ʻOku ʻuhinga ení, kapau ʻoku tau fakahaaʻi ʻa e tui ki he feilaulau ʻa Sīsuú, te tau maʻu ai ʻa e faingamālie ke fiefia taʻengata ʻi ha māmani palataisi!​—ʻAisea 65:21-23.

      KELI LOLOTO ANGE

      Feinga ke ke mahinoʻi lahi ange ʻa e ʻuhinga naʻe foaki atu ai ʻe Sīsū ʻene moʻuí, pea mo e founga ke ke maʻu ʻaonga aí.

      3. Ko e pekia ʻa Sīsuú ʻoku fakatauʻatāinaʻi ai kitautolu mei he angahalá mo e maté

      Huluʻi ʻa e VITIOÓ, pea lāulea leva ki he fehuʻi hokó.

      VITIŌ: Ko e Hā Naʻe Pekia Ai ʻa Sīsuú?​—Konga 1 (2:01)

      • Ko e hā ʻa e faingamālie naʻe fakamoleki ʻe ʻĀtama ʻi heʻene talangataʻa ki he ʻOtuá?

      Lau ʻa e Loma 5:12, pea lāulea leva ki he fehuʻi ko ení:

      • Kuo anga-fēfē uesia hoʻo moʻuí ʻi he angahala ʻa ʻĀtamá?

      Lau ʻa e Sione 3:16, pea lāulea leva ki he fehuʻi ko ení:

      • Ko e hā naʻe fekauʻi mai ai ʻe Sihova hono ʻAló ki he māmaní?

      A. Fakatātā: 1. Ko ʻĀtama hili ʻene talangataʻa ki he ʻOtuá. 2. ʻOku fua atu ha puha mate ki he faʻitoká. Fakatātā: A. Ko ʻĀtama hili ʻene talangataʻa ki he ʻOtuá. E. Sīsū Kalaisi. E. Fakatātā: 1. Sīsū Kalaisi. 2. Ko e kakai mei he ngaahi taʻu, matakali, anga fakafonua mo e puipuituʻa kehekehe.
      1. A. Ko ʻĀtamá ko ha tangata haohaoa naʻá ne talangataʻa ki he ʻOtuá pea naʻe tuku ai ʻa e faʻahinga ʻo e tangatá ki he ʻalunga ʻo e angahalá mo e maté

      2. E. Ko Sīsuú ko ha tangata haohaoa naʻá ne talangofua ki he ʻOtuá pea naʻe tuku ai ʻa e faʻahinga ʻo e tangatá ki he ʻalunga ʻo e haohaoá mo e moʻui taʻengatá

      4. ʻOku lava ke maʻu ʻaonga ʻa e taha kotoa mei he pekia ʻa Sīsuú

      Huluʻi ʻa e VITIOÓ, pea lāulea leva ki he fehuʻi hokó.

      VITIŌ: Ko e Hā Naʻe Pekia Ai ʻa Sīsuú?​—Konga 2 (2:00)

      • ʻOku lava fēfē ʻa e pekia ʻa ha tangata ʻe taha ʻo maʻu ʻaonga mei ai ʻa e taha kotoa?

      Lau ʻa e 1 Tīmote 2:5, 6, pea lāulea leva ki he fehuʻi ko ení:

      • Ko ʻĀtamá ko ha tangata haohaoa naʻá ne tuku ʻa e faʻahinga ʻo e tangatá ki he ʻalunga ʻo e angahalá mo e maté. Ko Sīsuú ko ha tangata haohaoa foki mo ia. ʻI he founga fē naʻe tokonaki mai ai ʻe Sīsū ha “huhuʻi fehoanakimālie”?

      5. Ko e huhuʻí ko e meʻaʻofa ia ʻa Sihova maʻau

      ʻOku vakai ʻa e ngaahi kaumeʻa ʻo Sihová ki he huhuʻí ko ha meʻaʻofa fakafoʻituitui. Ko e fakatātaá, lau ʻa e Kalētia 2:20, pea lāulea leva ki he fehuʻi ko ení:

      • Naʻe anga-fēfē hono fakahaaʻi ʻe he ʻapositolo ko Paulá ko e huhuʻí ko ha meʻaʻofa fakafoʻituitui ia kiate ia?

      ʻI he angahala ʻa ʻĀtamá, ko ia mo e kotoa hono hakó naʻe tautea mate. Ka naʻe fekau mai ʻe Sihova ʻa hono ʻAló ke pekia kae lava ke ke maʻu ʻa e faingamālie ke moʻui taʻengata.

      ʻI hoʻo lau ʻa e ngaahi veesi ko ení, sioloto atu ki he anga ʻo e ongoʻi ʻa Sihová lolotonga ʻa e faingataʻaʻia ʻa hono ʻAló. Lau ʻa e Sione 19:1-7, 16-18, pea lāulea leva ki he fehuʻi ko ení:

      • Ko e hā haʻo ongoʻi ki he meʻa kuo fai ʻe Sihova mo Sīsū maʻaú?

      ʻE ʻEKE NAI ʻE HA TAHA: “ʻOku anga-fēfē ʻa e pekia ha tangata ʻe taha ʻo fakahaofi ai ʻa e taha kotoa?”

      • ʻE fēfē haʻo tali?

      FAKANOUNOU

      Koeʻuhi ko e pekia ʻa Sīsuú ʻoku lava ʻe Sihova ke fakamolemoleʻi ʻetau angahalá, pea ʻe lava ai ke tau moʻui taʻengata.

      Fakamanatu

      • Ko e hā naʻe pekia ai ʻa Sīsuú?

      • ʻI he founga fē naʻe hoko ai ʻa e moʻui haohaoa fakaetangata ʻa Sīsuú ko ha huhuʻi fehoanakimālié?

      • ʻE lava fēfē ke ke maʻu ʻaonga mei he pekia ʻa Sīsuú?

      Meʻa ke Fai

      AKO LAHI ANGE

      Vakai angé ki he ʻuhinga ʻoku ui ai ʻa e moʻui haohaoa fakaetangata ʻa Sīsuú ko ha huhuʻí.

      “ʻOku Anga-Fēfē ʻa e Hoko e Feilaulau ʻa Sīsuú ‘ko ha Huhuʻi ʻo ha Tokolahi’?” (Kupu ʻi he uepisaití)

      Sio angé ki he meʻa ʻoku fiemaʻu ke tau fai ke hao ai mei he angahalá mo e maté.

      “Ko e Fakamoʻui Naʻe Fai ʻe Sīsuú​—Anga-Fēfē?” (Kupu ʻi he uepisaití)

      ʻE lava ʻe Sihova ʻo fakamolemoleʻi naʻa mo e angahala mamafá?

      “Tali ʻo e Ngaahi Fehuʻi Fakatohitapú” (Ko e Taua Leʻo, Siulai 1, 2013)

      Sio ki he anga hono tokoniʻi ha tangata naʻá ne fāinga ke liliu hono angaʻitangatá ʻi heʻene ako fekauʻaki mo e feilaulau ʻa Kalaisí.

      “ʻOku ʻIkai Ke U Toe Pōpula ki he Fakamālohí” (Kupu ʻi he uepisaití)

      a Ko e angahalá ʻoku ʻikai ko hano fai pē ʻo ha meʻa ʻoku kovi. ʻOku toe ʻuhinga iá, ʻi he tuʻunga ko e fānau ʻa ʻĀtamá, ʻoku tau mavahe mei he ʻOtuá.

  • Fakahāhā ʻa e Houngaʻia ki he Meʻa Kuo Fai ʻe Sihova mo Sīsū Maʻaú
    Fiefia ʻi he Moʻuí ʻo Taʻengata!—Ako Tohi Tapu Fetalanoaʻaki
    • 1. Ko e hā ha founga ke tau fakahāhā ai ʻa e houngaʻia ki he meʻa kuo fai maʻa kitautolu ʻe he ʻOtuá mo Kalaisí?

      ʻOku talaʻofa ʻa e Tohi Tapú “ko e tokotaha kotoa pē ʻokú ne ngāueʻi ʻa e tui” kia Sīsuú ʻoku lava ke ne moʻui taʻengata. (Sione 3:16) ʻOku ʻuhinga ki he hā ʻa e ngāueʻi ʻo e tuí? ʻOku ʻuhinga ia ki he meʻa lahi ange ʻi he tui pē kia Sīsuú. ʻOku toe fiemaʻu ke tau fakahāhaaʻi ʻetau tuí ʻi he ngaahi fili ʻoku tau faí mo e ngaahi meʻa ʻoku tau fakahokó. (Sēmisi 2:17) ʻOku tau fakahaaʻi ʻetau tuí ʻaki ʻa e meʻa ʻoku tau faí mo e meʻa ʻoku tau leaʻakí, pea fakaivimālohiʻi ai hotau vahaʻangatae mo Sīsū mo ʻene Tamaí, ʻa Sihova.​—Lau ʻa e Sione 14:21.

ʻŪ Tohi Faka-Tonga (1987-2026)
Hū ki Tu‘a
Hū ki Loto
  • Faka-Tonga
  • Share
  • Sai‘ia
  • Copyright © 2025 Watch Tower Bible and Tract Society of Pennsylvania
  • Makatu‘unga Hono Ngāue‘akí
  • Polisī Fakafo‘ituitui
  • Privacy Setting
  • JW.ORG
  • Hū ki Loto
Share