• Ko Sihova Hotau Tokoní
    Ko e Taua Leʻo—2004 | Tīsema 15

    • 20, 21. ʻI he malumalu ʻo e ngaahi tuʻunga ko e hā naʻe fakaivimālohiʻi ai ʻa e ʻapositolo ko Paulá ʻe he fanga tokoua mei Lomá?

      20 Ko e meʻa ʻoku tautefito ʻene fakatoʻoalotó ko e ngaahi fakamatala ki he anga ʻo e feinga ʻa e kau sevāniti ʻa Sihová ke fefakaivimālohiʻaki mo fefakalototoʻaʻaki ʻiate kinautolú. Fakakaukau angé ki ha fakatātā fekauʻaki mo e ʻapositolo ko Paulá. ʻI he lolotonga ʻene fononga ki Loma ko ha pōpulá, naʻe fononga ʻa Paula ʻi he hala lahi Loma naʻe ʻiloa ko e Hala ʻApianá. Ko e konga fakaʻosi ʻo e fonongá naʻe tautefito ʻa ʻene taʻefakafiemālié, he naʻe pau ke fou ai ʻa e kau fonongá ki ha feituʻu ano mo māʻulalo.a Naʻe ʻilo ʻe he fanga tokoua ʻi he fakatahaʻanga ʻi Lomá ʻe haʻu ʻa Paula. Ko e hā te nau faí? Te nau tatali pē ʻi he nonga ʻo honau ngaahi ʻapi ʻi he kolo lahí kae ʻoua kuo aʻu mai ʻa Paula pea toki omi ke fakafeʻiloaki kiate ia?

      21 Ko e tokotaha-tohi Tohi Tapu ko Luké, ʻa ia naʻe ʻalu fakataha mo Paula ʻi he fonongá, ʻokú ne tala mai kiate kitautolu ʻa e meʻa naʻe hokó: “Kuo maʻu talanoa ʻe he kainga, ʻo e potu ko ia [Loma] kiate kimautolu, ʻo nau fononga mei ai ʻo aʻu ki Apiai Folo mo Faletolu ke fakafetaulaki kiate kimautolu.” ʻE lava ke ke sioloto atu ki he tuʻungá ni? ʻI hono ʻilo ʻe haʻu ʻa Paulá, naʻe fononga ha kulupu fakafofonga ʻo e fanga tokouá mei Loma ke fakafetaulaki kiate ia. Ko e konga ʻo e kulupú naʻa nau tatali ʻi he Māketi ʻo ʻApiaí, ko e mālōlōʻanga ʻiloa ʻi he kilomita ʻe 74 nai ʻi tuʻa mei Loma. Ko e toenga ʻo e fanga tokouá naʻa nau tatali ʻi Faletolu, ko ha mālōlōʻanga ʻoku kilomita ʻe 58 nai ʻi tuʻa mei he kolo lahí. Naʻe anga-fēfē ʻa e tali ʻa Paulá? ʻOku fakamatala ʻa Luke: “ʻI he feʻiloaki ʻa Paula mo kinautolu, naʻa ne fai ʻene fakafetaʻi ki he ʻOtua, mo ne maʻu ai ha toʻa.” (Ngāue 28:15) Sioloto atu angé—ʻi he vakai atu pē ki he fanga tokoua ko ia naʻa nau fakamālohituʻu kinautolu ke fononga mamaʻo maí naʻe hoko ia ko ha matavai ʻo e mālohi mo e fakafiemālie kia Paula! Pea ko hai naʻe fakamālō ki ai ʻa Paula ʻi he poupou ʻaonga ko ʻení? Naʻá ne fakamālō ki he tokotaha naʻe tupu mei aí, ko Sihova ko e ʻOtuá.

  • Ko Sihova Hotau Tokoní
    Ko e Taua Leʻo—2004 | Tīsema 15

    • a Ko e faʻu-maau Loma ko Hōlasí (65-8 K.M.), ʻa ia naʻá ne fai ʻa e fononga tatau, naʻe fakamatala ki he ngaahi meʻa taʻefakafiemālie ʻi he konga ko ʻeni ʻo e fonongá. Naʻe fakamatalaʻi ʻe Hōlasi ʻa e Māketi ʻo ʻApiaí ʻo pehē “naʻe feʻefiʻefihi ʻi he kau tangata ngāue vaká pea mo e kau tauhi-pā nima-maʻú.” Naʻá ne lāunga fekauʻaki mo e “fanga namu uʻu vevelá mo e fanga potó” pea mo e vai “ifo tamakí.”