ʻOkú Ke Manatuʻi?

ʻOkú ke mahuʻingaʻia ʻi hono lau ʻa e ngaahi ʻīsiu fakamuimui taha ʻo e Taua Leʻo? Sai, sio angé pe te ke lava ʻo tali ʻa e ngaahi fehuʻi ko ʻení:

• Ko e hā ʻoku totonu ai ke fai ha fakakaukau naʻa mo e ʻahó ni ki he ngaahi fehuʻi ʻoku langaʻi hake ʻi he Siope vahe 38?

Ko e lahi ʻo e ngaahi ngāue fakaofo ʻa ia naʻe fakahanga ki ai ʻa e tokanga ʻa e ʻOtuá ʻoku ʻikai lava ke mahino kakato ia naʻa mo e kau saienisi ʻo onopōní. ʻOku kau heni ʻa e anga ʻo hono tauhi ʻe he kalāvité ʻa e foʻi māmaní ʻi hono halanga totonú, ko e hā moʻoni ʻa e māmá, ko e ʻuhinga ʻo e ngaahi kongokonga sinou kehekehe taʻefaʻalauá, founga hono faʻu ʻo e ʻuhá, pea mo e founga ʻoku kaunga ai ʻa e iví ki he maná.​—4/15, peesi 4-11.

• Ko e hā ʻa e ngaahi faʻifaʻitakiʻanga faka-Tohitapu ʻe lava ke ne tokoniʻi kitautolu ke tau fekuki ai mo e ngaahi ongoʻi taʻepaú?

Ko ʻĒsafe, Paluki mo Neomai naʻa nau fehangahangai ʻi ha ngaahi vahaʻa taimi mo e loto-siʻí pe ngaahi ongoʻi taʻepau ʻe niʻihi, pea ko e lēkooti Fakatohitapu ʻo ʻenau fekuki lavameʻa mo e ngaahi tuʻunga peheé ʻe lava ke tokoni ia kiate kitautolu.​—4/15, peesi 22-24.

• Ko e hā ha founga ʻaonga ʻe niʻihi ke tokoni ai ki he kau uitou Kalisitiané?

ʻE lava ʻa e ngaahi kaumeʻá ke nau fai ha tokoni anga-ʻofa mo mahino. ʻE malava nai ki he ngaahi mēmipa ʻo e fāmilí pe ko ha niʻihi kehe ke nau fai ha tokoni fakapaʻanga pe fakamatelie, ʻo kapau ʻoku ʻi ai ha fiemaʻu moʻoni. ʻE toe lava mo e kaungā Kalisitiané ke fai ha tokoni ʻaki hono fai ha foaki anga-ʻofa fakakaumeʻa, tokonaki ha poupou mo e fakafiemālie fakalaumālie.​—5/1, peesi 5-7.

• Ko e hā ʻa e ʻuhinga ʻoku mahuʻinga ai ke mali “i he Eiki be,” ʻo hangē ko ia ʻoku faleʻi mai ʻi he 1 Kolinito 7:39 (PM)?

Ko e mali ki he kau taʻetuí ʻoku faʻa fakamoʻoniʻi ʻa ʻene fakatuʻutāmakí. ʻIkai ngata aí, ko e muimui ki he faleʻi fakaʻotua ko ʻení ko ha mateaki ia kia Sihova ko e ʻOtuá. ʻI heʻetau fai ki he Folofola ʻa e ʻOtuá, ʻe ʻikai ke fakahalaiaʻi ai kitautolu ʻe hotau lotó. (1 Sione 3:​21, 22)​—5/15 peesi 20-21.

• Koeʻuhi ko Sihova ʻa e tokotaha ʻoku lava ke ne fakamolemoleʻi ʻetau ngaahi angahalá, ko e hā hono ʻuhinga ʻoku fakahā ai ʻe he kau Kalisitiané ʻenau ngaahi angahala mamafá ki he kau tangata matuʻotuʻa ʻi he fakatahaʻangá?

ʻIo, ko e fakamolemoleʻi ʻe Sihova ʻa e ngaahi angahala mamafá ʻa e meʻa ʻoku fiemaʻu ki ha Kalisitiane ke ne kumi ki aí. (2 Samiuela 12:13) Kae hangē pē ko hono ʻoange ʻe he palōfita ko Nētané ʻa e tokoní kia Tēvitá, ʻe lava ʻe he kau tangata matuʻotuʻa ʻi he fakatahaʻangá ke nau tokoniʻi ʻa e kau faihala fakatomalá. Ko e ʻalu ki he kau mātuʻá ʻoku fehoanaki ia mo e fakahinohino ʻoku ʻomai ʻi he Semisi 5:​14, 15​—6/1, peesi 31.

• Ko e hā ʻa e fakamoʻoni ʻoku ʻi ai ʻoku totonu ai ke tau tokanga ki he kau paeá mo e kau uitoú ʻi heʻenau mamahí?

ʻOku fakahā ʻe he lēkooti ʻo e hisitōliá ko hono fai ʻa e tokanga peheé ko e fakaʻilonga ia ʻo e lotu moʻoní fakatouʻosi ki he kau Hepelū ʻo e kuonga muʻá pea mo e muʻaki kau Kalisitiané. (Ekisoto 22:​22, 23; Kaletia 2:​9, 10; Semisi 1:27) Naʻe fakakau ʻe he ʻapositolo ko Paulá ʻi he ngaahi Konga Tohitapú ha ngaahi fakahinohino māʻalaʻala ki he kau Kalisitiané ke fai ha tokanga ki he kau uitou masivá. (1 Timote 5:​3-16)​—6/15, peesi 9-11.

• Ko e hā ʻa e kī ki ha moʻui fiefia mo mohu ʻuhingá?

Kuo pau ke tau fakatupulekina pea tauhi maʻu ha vahaʻangatae lelei mo Sihova, ʻa ʻetau Tamai fakahēvaní. Ko hono ako ʻa e Tohitapú ko ha tokoni mahuʻinga ia ki heʻetau fai ʻa e meʻa tofu pē ko iá.​—7/1, peesi 4-5.

• ʻOku maʻu ʻe he faʻahinga taki taha ʻo e tangatá ha laumālie taʻefaʻamate ʻa ia ʻoku hao moʻui atu ʻi he maté?

Neongo ʻoku tui ʻa e kakai ʻe niʻihi ko ha laumālie​—ʻikai ko ha soulu​—ʻoku taʻefaʻamaté, ʻoku ʻikai ke poupouʻi ʻe he Tohitapú ʻa e fakakaukau ko ʻení. ʻOku fakahaaʻi ʻi he mate ʻa e faʻahinga ʻo e tangatá, ʻokú ne foki ki he efú pea ʻoku ʻikai te ne toe ʻi ai. Ka, ʻoku maʻu ʻe he ʻOtuá ʻa e malava ke fakafoki mai ia ki he moʻuí, ko ia ko ha ʻamanaki ki he moʻui he kahaʻú, fakafou ʻi he toetuʻú, ʻoku fakafalala ia ʻi he ʻOtuá. (Koheleti 12:7)​—7/15, peesi 3-6.

• Naʻe ʻi fē ʻa Taniela ʻi he taimi naʻe ʻahiʻahiʻi ai ʻa e kau Hepelū ʻe toko tolú ʻi he tokalelei ʻo Tulá?

ʻOku ʻikai ke lave ki ai ʻa e Tohitapú. Mahalo pē naʻe ʻikai ke fiemaʻu ʻa Taniela ke ne ʻi ai koeʻuhi ko hono tuʻungá, pe naʻá ne mamaʻo nai ʻi ha ngāue fakaʻofisiale. Ka ʻoku malava ke tau tuipau naʻe ʻikai te ne fakangaloku ʻa ʻene loto-tōnunga kia Sihová.​—8/1, peesi 31.