NOFOʻAKI ANGA-FAKATŌKILALO HANGĒ KO SĒMISÍ

5. Naʻe anga-fēfē tali ʻa Sēmisi ʻi he hā kiate ia ʻa Sīsū naʻe toetuʻú?

⁵ Naʻe hoko fakakū ʻa Sēmisi ko ha tokotaha muimui mateaki ʻo Sīsuú? Hili hono fokotuʻu ʻa Sīsū mei he maté, “naʻá ne hā kia Sēmisi, pea hoko ai ki he kau ʻapositoló kotoa.” (1 Kol. 15:7) Ko e fetaulaki ko ia ʻa Sēmisi mo Sīsuú naʻe liliu fakaʻaufuli ai ʻene moʻuí. Naʻá ne ʻi he loki ʻi ʻolunga ʻi Selusalema mo e kau ʻapositoló ʻi heʻenau tatali ki he laumālie māʻoniʻoni naʻe talaʻofá. (Ngā. 1:13, 14) Ki mui ai, naʻe fiefia ʻa Sēmisi ke ngāue ko ha mēmipa ʻo e kulupu pule ʻi he ʻuluaki senitulí. (Ngā. 15:6, 13-22; Kal. 2:9) Pea ʻi ha taimi ki muʻa ʻi he 62 T.S., naʻe fakamānavaʻi ia ke ne hiki ha tohi ki he kau Kalisitiane paní. ʻOku tau maʻu ʻaonga mei he tohi ko iá ʻi he ʻahó ni, tatau ai pē pe ʻoku tau maʻu ʻa e ʻamanaki ke moʻui ʻi hēvani pe ʻi māmani. (Sēm. 1:1) Fakatatau ki he faihisitōlia ʻi he ʻuluaki senitulí ko Siosifasí, naʻe tāmateʻi ʻa Sēmisi ʻi he tuʻutuʻuni ʻa e Taulaʻeiki Lahi Siu ko ʻAnanaia ko e Siʻí. Naʻe nofoʻaki faitōnunga ʻa Sēmisi kia Sihova ʻo aʻu ki heʻene ʻosiki hono ʻalunga moʻui ʻi he māmaní.