Fehuʻi mei he Kau Lautohí

ʻOku ʻuhinga ʻa e lea ʻa e ʻapositolo ko Paulá ʻi he 1 Kolinitō 15:29 ko e kau Kalisitiane ʻe niʻihi ʻi he kuohilí naʻa nau papitaiso maʻá e kau maté?

ʻIkai, ʻoku ʻikai ke fakahaaʻi ʻi he Tohi Tapú pe ko e hisitōliá naʻe fai ha meʻa pehē.

Ko e anga hono liliu ʻo e veesi ko ení ʻi he ngaahi Tohi Tapu lahi kuo taki atu ai ʻa e niʻihi ke nau fakakaukau ko e papitaiso ʻi he vaí maʻá e kau maté naʻe fakahoko ia ʻi he taimi ʻo Paulá. Ko e fakatātaá: “Kapau ʻoku ʻikai ʻaupito ha fokotuʻu ʻo e pekia, pea koeʻumaʻā honau papitaiso maʻanautolu?”​—Paaki Foʻou.

Kae kehe, fakatokangaʻi ʻa e fakamatala ʻa ha ongo mataotao Tohi Tapu. Naʻe pehē ʻe Dr. Gregory Lockwood ko e fakakaukau fekauʻaki mo e fakahoko ʻo e papitaisó “maʻá e tokotaha kuo maté ko ha founga ia ʻo e papitaisó, ʻa ia ʻoku fakapapauʻi naʻe ʻikai hā ia ʻi he hisitōliá pe Tohi Tapú.” ʻI he tuʻunga meimei tatau, naʻe tohi ʻe Palōfesa Gordon D. Fee: “ʻOku ʻikai ha fakamoʻoni fakahisitōlia pe fakatohitapu ki ha papitaiso pehē. ʻOku ʻikai ʻaupito ha lave ia ʻa e F[uakava] F[oʻoú] fekauʻaki mo ia; ʻoku ʻikai ke ʻiloʻi hano ngāueʻaki ia ʻi he ngaahi siasi kehé pe ʻi ha komiunitī ʻo e kau Kalisitiane ʻofotokisī ʻi he laui senituli ki mui ai.”

ʻOku pehē ʻi he Tohi Tapú ko e kau muimui ʻo Sīsuú ke nau “ngaohi ko e kau ākonga ʻa e kakai ʻo e ngaahi puleʻanga kotoa pē, ʻo papitaiso kinautolu . . . , pea akoʻi kinautolu ke nau tauhi ʻa e ngaahi meʻa kotoa pē” naʻá ne fekauʻi maí. (Māt. 28:19, 20) Ki muʻa ke hoko ha taha ko ha ākonga ʻosi papitaiso, naʻe fiemaʻu ke ne ako, tui pea talangofua kia Sihova mo Hono ʻAló. Ko ha tokotaha naʻe ʻosi mate pea ʻi he faʻitoká heʻikai lava ke ne fai ia; pe ko e lava ke fai ia maʻana ʻe ha Kalisitiane ʻoku kei moʻui.​—Tml. 9:5, 10; Sione 4:1; 1 Kol. 1:14-16.

Ko e hā leva naʻe ʻuhinga ki ai ʻa Paulá?

Ko e niʻihi ʻo e kau Kolinitoó naʻa nau fakaʻikaiʻi ʻe toe fokotuʻu hake ʻa e kau maté. (1 Kol. 15:12) Naʻe fakaʻikaiʻi ʻe Paula ʻa e vakai ko iá. Naʻá ne pehē naʻá ne “fehangahangai fakaʻaho pē mo e maté.” Ko e moʻoni, naʻá ne kei moʻui pē. Ka neongo ʻene hokosia ʻa e ngaahi faingataʻá, naʻá ne tuipau hili ʻa e maté ʻe fokotuʻu hake ia ko ha laumālie mālohi, hangē ko Sīsuú.​—1 Kol. 15:30-32, 42-44.

Naʻe fiemaʻu ki he kau Kolinitoó ke nau ʻiloʻi ko e hoko ko e kau Kalisitiane paní naʻe ʻuhinga iá te nau fehangahangai fakaʻaho mo e ngaahi ʻahiʻahi pea mate ki muʻa ke fokotuʻu hake kinautolú. Ko e hoko ʻo “papitaiso ʻia Kalaisi Sīsuú” naʻe kau ki ai ʻa e “papitaiso ki heʻene pekiá.” (Loma 6:3) Ko ʻenau papitaiso fakaefakatātaá ʻe taki atu ia ki heʻenau mate pea toetuʻu hake ki hēvaní.

Laka hake ʻi he taʻu ʻe ua hili ʻa e papitaiso ʻa Sīsū ʻi he vaí, naʻá ne tala ange ki ha toko ua ʻo ʻene kau ʻapositoló: “Ko e papitaiso ʻoku ou papitaiso aí, te mo papitaiso ai.” (Mk. 10:38, 39) Naʻe ʻikai ko e toki papitaiso ia ʻa Sīsū ʻi he vaí. Naʻá ne ʻuhingá ko ʻene ʻalunga hokohoko ʻo e anga-tonú ʻe taki atu ki heʻene pekiá tonu. Naʻe tohi ʻe Paula ko e faʻahinga paní te nau “faingataʻaʻia fakataha mo ia koeʻuhi ke [nau] hoko foki ai ʻo fakalāngilangiʻi fakataha mo ia.” (Loma 8:16, 17; 2 Kol. 4:17) Ko ia ko kinautolu foki kuo pau ke nau mate ke fokotuʻu hake ki he moʻui ʻi hēvaní.

Ko ia, ko e lea ʻa Paulá ʻoku totonu pē hono liliu pehení: “Ko ia ai, ko e hā ʻe fai ʻe he faʻahinga ko ia ʻoku papitaiso ki he maté? Kapau heʻikai teitei fokotuʻu hake ʻa e maté, ko e hā leva ʻoku nau papitaiso ai pē ki he maté?”