Ngaahi Fehuʻi mei he Kau Lautohí
Ko e hā ʻa e papitaiso ki he kau maté?
ʻI he tohi fekauʻaki mo e toetuʻu fakahēvaní, naʻe hiki ai ʻe he ʻapositolo ko Paulá ha kupu mātuʻaki fakatoʻoaloto. ʻI he King James Version, ʻoku tau lau ai: “Ko e toe hā ʻa e meʻa kehe te nau fai ʻe kinautolu ʻoku papitaiso ki he kau maté, kapau ʻe ʻikai ʻaupito tuʻu hake ʻa e maté? ko e hā leva ʻoku nau papitaiso ai ki he kau maté?” Pea ko e New Jerusalem Bible ʻokú ne fakalea ʻa e kupú ni: “Ko e hā ʻoku fakakaukau ki ai ʻa e kakai kuo nau papitaiso kinautolu maʻá e kau maté? Kapau ʻe ʻikai ʻaupito fokotuʻu hake ʻa e kau maté, ko e hā ʻa e taumuʻa ʻo e papitaiso maʻanautolú?”—1 Kolinito 15:29.
Naʻe fakahuʻunga heni ʻa Paula ko e kakai moʻuí ke nau papitaiso maʻá e faʻahinga naʻa nau mate ʻi ha tuʻunga teʻeki papitaisó? Ko e meʻa ia ʻoku ngali hā mei he ongo liliú ni mo e ngaahi liliu Tohitapu kehe. Kae kehe, ko ha sivisiviʻi ofi ange fakatouʻosi ʻo e ngaahi Konga Tohitapú mo e muʻaki lea faka-Kalisi naʻe ngāueʻaki ʻe Paulá ʻoku fakahuʻunga ai ha toe fakamulituku ʻe taha. Naʻe ʻuhinga ʻa Paulá ko e kau Kalisitiane paní ʻoku nau papitaiso, pe fakauku, ki ha ʻalunga ʻo e moʻuí ʻa ia ʻe iku ai ki ha mate anga-tonu hangē ko ia ko Kalaisí. Hili iá, ʻe fokotuʻu hake kinautolu ki he moʻui laumālie ʻo hangē pē ko iá.
ʻOku poupouʻi ʻe he ngaahi Konga Tohitapú ʻa e fakamatala ko ení. ʻI heʻene tohi ki he kau Lomá, naʻe tohi ʻe Paula: “Ikai oku mou ilo ko kitautolu kotoabe nae babitaiso kia Jisu Kalaisi, naa tau babitaiso ki he ene bekia?” (Loma 6:3, PM) ʻI heʻene tohi ki he kau Filipaí, naʻe lea ai ʻa Paula fekauʻaki mo ia tonu, ʻo pehē: “Beau kau i he ene gaahi mamahi [ʻa Kalaisí], i he fakatatau au ki he ene bekia; Kabau teu faa lavaʻi i he mea kotoabe ae toetuu mei he mate.” (Filipai 3:10, 11, PM) Naʻe fakahaaʻi ʻe Paula ko e moʻui ʻa ha tokotaha muimui pani ʻo Kalaisí ʻoku kau ki ai ha ʻalunga ʻo e tauhi anga-tonu ʻi he malumalu ʻo e ʻahiʻahí, ko ha fehangahangai fakaʻaho mo e maté, pea iku atu ki ha mate anga-tonu, ʻo hoko atu ai ʻa e toetuʻu fakahēvaní.
ʻOku taau ke fakatokangaʻi ko e ngaahi meʻá ni mo e ngaahi Konga Tohitapu kehe naʻe lave hangatonu ai ki he maté ʻi he fekauʻaki mo e faʻahinga papitaisó ʻoku ʻuhinga ia ki he faʻahinga tāutaha ʻoku moʻui ʻa ia kuo nau ʻosi papitaisó, ʻo ʻikai ʻuhinga ki he faʻahinga kuo nau maté. Naʻe toe tala ʻe Paula ki he kaungā pani Kalisitiané: “Naʻe fai ʻi homou kaungātelio mo ia ʻi he papitaiso, pea ʻi he meʻa ko ia naʻe kaungā fokotuʻu kimoutolu mo ia, ko e meʻa ʻi hoʻomou tui ki he ngaue ʻa e ʻOtua, ʻa ʻene fokotuʻu ia mei he pekia.”—Kolose 2:12.
Ko e takinauna faka-Kalisi ko e hy·perʹ, ʻoku liliu ko e “ki he” pe “maʻá e” ʻi he ngaahi liliu Tohitapu kehekehe ʻi he 1 Kolinito 15:29, ʻe lava ke toe ʻuhinga ia “ki he taumuʻa ʻo e.” ʻI he fehoanaki mo e ngaahi konga tohi faka-Tohitapu kehé, ʻoku fakalea totonu ai ʻe he New World Translation of the Holy Scriptures ʻa e foʻi vēsí ni: “Ko e hā te nau faí ʻa kinautolu ʻoku nau papitaiso ki he taumuʻa ʻo e hoko ko e faʻahinga maté? Kapau ko e kau maté ʻe ʻikai ʻaupito fokotuʻu hake, ko e hā ʻoku nau toe papitaiso ai ki he taumuʻa ʻo e hoko ʻo peheé?”