“Ko Hoʻomou Fakaongosia ʻOku ʻIkai ko e Laufanō Ia”

¹ Ko ha fakakaukau fakalototoʻa ē! Ko hoʻomou fakaongosia ʻi he ngāue ʻa Sihová ʻoku ʻikai ke laufānō ia. (1 Kol. 15:58) ʻI hono kehé, fakakaukau atu ki he founga ʻo e ngāue fuoloa mo e feinga mālohi ʻa e kakaí ke fakaleleiʻi honau tuʻunga ʻi he moʻuí, pe ko honau tuʻunga fakapaʻangá. ʻOku nau tuli nai ki ha ako māʻolunga ange ʻi ha ngaahi taʻu pe ngāue fakahopoate ke laka ki muʻa fakamatelie. Ka, koeʻuhi ko e “faingamalie mo e tuʻutamaki,” ʻe ʻikai ʻaupito nai te nau maʻu ʻa e tuʻunga ʻoku nau kumi ki aí, pe ʻe fakamālohiʻi nai kinautolu ke fiemālie pē ʻi he meʻa siʻi ʻaupito ʻi he meʻa ko ia ʻoku nau fiemaʻu fakamatelié. Hangē ko e “kai matangi,” ko ʻenau ngaahi feingá ʻoku laufānō. (Koh. 1:14; 9:11) He mātuʻaki mahuʻinga leva ē, ʻa ʻetau maʻu ko ia ʻa e meʻa lahi ke fai ʻi he ngāue pē ko ia ʻoku ʻikai ke lāufanoó koeʻuhí he ʻoku mahuʻinga tuʻuloa ia!

² Ko e Ngāue ko Ia ʻOku Mahuʻinga Moʻoní: Ko hono malangaʻi ʻa e ongoongo lelei ʻo e Puleʻanga ʻo e ʻOtuá ʻa e ngāue mahuʻinga taha ʻi he foʻi māmaní. Ko e ngāue ia kuo pau ke fai tatau ai pē pe ʻe fanongo ki ai ʻa e kakaí pe ʻikai. ʻOku tau saiʻia ke tau lava ʻo lea, ʻo hangē ko ia naʻe leaʻaki ʻe Paulá: “Oku ou maa au mei he toto oe kakai kotoabe. He nae ikai teu taofi ae fakaha kiate kimoutolu ae finagalo kotoabe oe Otua.”​—Ng. 20:​26, 27, PM.

³ ʻI he taimi ʻoku fanongo mo tali ai ʻe he kakaí ʻa e pōpoaki ʻo e Puleʻangá, he fiefia lahi ē! Ko ha finemui naʻe mole hono mehikitangá ʻi he maté. Naʻá ne fifili pe ʻoku ʻalu ki fē hono mehikitangá​—ki hēvani pe ki heli? Naʻá ne lotu ki he ʻOtuá ki ha tokoni, ʻo ngāueʻaki ʻa e huafa Sihová, ʻo hangē ko ia naʻe akoʻi ange ʻe hono tokouá ke ne faí. ʻIkai fuoloa naʻá ne ako ʻa e Tohitapú pea maʻu ʻa e ngaahi fakataha faka-Kalisitiané. Naʻá ne maʻu ai ha vakai foʻou fakalūkufua ki he moʻuí peá ne taʻofi leva ʻa ʻene ngaahi fetuʻutaki mo hono ngaahi kengi he halá. Naʻe tuku leva ʻe he finemuí ʻene ifí, ngāueʻaki ʻa e faitoʻo kona tapú, mo e kaihaʻá. ʻOkú ne pehē: “Ko e ʻofa pē kia Sihová naʻá ne ʻai au ke u liʻaki ʻa e founga moʻui kovi peheé. Ko Sihova pē ʻi heʻene fuʻu mēsí ʻoku lava ke ne ʻomai kiate au ʻa e ʻamanaki ʻo e moʻui taʻengatá.” Kuo ʻikai ʻaupito ke ne kei fakamoleki ʻene moʻuí ʻi he tulimui ki he ngaahi meʻa laufānoó.

⁴ Naʻa mo e taimi ʻoku fakafisi ai ʻa e kakaí ke fanongo maí, ʻokú ke kei fakahoko pē ha meʻa ʻoku ʻaonga. ʻOku nau ʻilo kuo ʻosi ʻaʻahi ange kiate kinautolu ʻa e Kau Fakamoʻoni ʻa Sihová. Ko hoʻo mateaki-angatonú, loto-tōnungá, mo e ʻofá tonu kuo ʻosi fakamoʻoniʻi. Ko ia, ʻoku laufānō ʻa hoʻo ngāue ʻi he ngāue ʻa e ʻEikí? ʻIkai ʻaupito!