• ʻOua ʻe “Sio ki he Ngaahi Meʻa ʻi Muí”
    Ko e Taua Leʻo—2012 | Maʻasi 15

    • 12. Naʻe anga-fēfē ʻa e ongoʻi ʻa Paula ʻo fekauʻaki mo e ngaahi meʻa naʻá ne tukuangé?

      12 Naʻe liʻaki ʻe he ʻapositolo ko Paulá ʻa e meʻa lahi ke hoko ai ko ha tokotaha muimui ʻo Kalaisi. (Fil. 3:4-6) Naʻe anga-fēfē ʻene ongoʻi ʻo fekauʻaki mo e ngaahi meʻa naʻá ne tukuangé? ʻOkú ne tala mai kiate kitautolu: “Ko e ngaahi meʻa naʻe hoko ko e fakakoloa kiate aú, naʻá ku lau ia ko e mole koeʻuhi ko e Kalaisí.” Pea ko e hā hono ʻuhingá? ʻOkú ne hoko atu: “ʻOku ou lau moʻoni foki ai ʻa e ngaahi meʻa kotoa pē ko e meʻa ke mole koeʻuhi ko e mahuʻinga taʻehanotatau ʻo e ʻilo kia Kalaisi Sīsū ko hoku ʻEikí. Ko e meʻa kiate iá, kuó u tali fiemālie ai ʻa e mole ʻa e ngaahi meʻa kotoa pē pea ʻoku ou lau ia ko e fuʻu koto kinohaʻa, koeʻuhí ke u maʻu ʻa Kalaisi.”a (Fil. 3:7, 8) Hangē pē ko ha taha ʻokú ne laku ha veve, ʻi he ʻikai te ne loto-mamahi ʻamui ange ʻi he mole ko iá, naʻe ʻikai ke fakaʻiseʻisa ʻa Paula ʻi ha meʻa pē fekauʻaki mo e ngaahi faingamālie fakaemāmani naʻá ne tukuangé. Naʻe ʻikai te ne kei ongoʻi naʻe ʻi ai hanau ʻaonga.

      13, 14. ʻE lava fēfē ke tau muimui ki he faʻifaʻitakiʻanga naʻe fokotuʻu ʻe Paulá?

      13 Ko e hā te ne tokoniʻi kitautolú kapau te tau fakatokangaʻi hake kuo kamata ke tau fakaʻānaua kitautolu ʻo fekauʻaki mo e ngaahi faingamālie ʻoku taku kuo tau tō mei aí? Muimui ʻi he faʻifaʻitakiʻanga naʻe fokotuʻu ʻe Paulá. ʻO anga-fēfē? Fakakaukau atu ki he mahuʻinga ʻo e meʻa ʻokú ke maʻu he taimi ní. Kuó ke maʻu ha vahaʻangatae fakakoloa mo Sihova pea kuó ke fokotuʻu ai ha lēkooti ʻo e faitōnunga ʻi heʻene vakai maí. (Hep. 6:10) Ko e hā nai ha ngaahi lelei fakamatelie ʻe lava ke tuʻuaki mai ʻe he māmaní ʻe ʻi ai haʻane teitei ofi ʻe taha ki he ngaahi tāpuaki fakalaumālie ʻoku tau maʻu he taimi ní pea mo ia te tau maʻu ʻi he kahaʻú?—Lau ʻa e Maʻake 10:28-30.

  • ʻOua ʻe “Sio ki he Ngaahi Meʻa ʻi Muí”
    Ko e Taua Leʻo—2012 | Maʻasi 15

    • a Ko e muʻaki foʻi lea naʻe liliu heni ko e “kinohaʻa” naʻe toe ʻuhinga iá ki he meʻa “kuo lī ki he fanga kulií,” “teʻe manú,” mo e “tuʻu mamaʻó.” ʻOku pehē ʻe ha mataotao Tohi Tapu ʻe taha ko hono ngāueʻaki ko ia ʻe Paula ʻa e foʻi lea ko ení ʻoku fakahaaʻi ai ha “tafoki fakaʻaufuli mei ha meʻa taʻeʻaonga pea fakaliliʻa ki ha meʻa ʻoku ʻikai haʻate toe fie kaunga ki ai.”