16, 17. (a) Naʻe anga-fēfē hono maʻu ʻe Paula ʻa e loto-toʻa ki he ngāue fakafaifekaú? (e) Ko e hā ʻa e ngaahi lākanga ʻoku totonu ke tau laka aí kapau ʻoku tau ʻilo ʻoku tau loto-siʻi ʻi ha tafaʻaki ʻo ʻetau ngāue fakafaifekau faka-Kalisitiané?

¹⁶ Naʻe tohi ʻa Paula ki he kau Kalisitiane ʻi Tesalonaiká: “Hili ʻemau ʻuluaki mamahi mo ngaohikovia (hangē pē ko ia ʻoku mou ʻilo ki ai) ʻi Filipaí, naʻa mau langaʻi ʻa e loto-toʻa fakafou ʻi hotau ʻOtuá ke leaʻaki kiate kimoutolu ʻa e ongoongo lelei ʻa e ʻOtuá fakataha mo ha fuʻu fāinga lahi.” (1 Tesalonaika 2:2, NW) Naʻe anga-fēfē hono “ngaohikovia” ʻo Paula mo hono ngaahi takangá ʻi Filipaí? Fakatatau ki he kau mataotao ʻe niʻihi, ko e foʻi lea faka-Kalisi naʻe ngāueʻaki ʻe Paulá ʻokú ne fakahaaʻi ʻa e tōʻonga fakalotomamahi, fakamā, pe fakalilifu. Naʻe tā kinautolu ʻe he kau maʻu mafai Filipaí ʻaki ʻa e ngaahi vaʻakau, lī kinautolu ki he pilīsoné, pea tuku kinautolu ʻi he ngaahi papa kiiʻi. (Ngāue 16:​16-24) Naʻe anga-fēfē hono uesia ʻo Paula ʻe he meʻa fakamamahi ko ia naʻá ne hokosiá? Naʻe ʻilo ʻe he faʻahinga ʻi he kolo lahi hono hoko ʻo ʻene fononga fakamisinalé, ʻe Tesalonaika, naʻe holomui ʻa Paula ʻi he manavahē? ʻIkai, naʻá ne “langaʻi ʻa e loto-toʻa.” Naʻá ne ikuʻi ʻa e manavaheé pea hokohoko atu ke malanga loto-toʻa.

¹⁷ Naʻe haʻu mei fē ʻa e loto-toʻa ʻa Paulá? Mei loto? ʻIkai, naʻá ne pehē naʻá ne loto-toʻá “fakafou ʻi hotau ʻOtua.” ʻOku pehē ʻe ha tohi maʻuʻanga fakamatala ki he kau liliu Tohitapú ʻoku lava nai ke fakalea ʻa e sētesí ni ʻo pehē “naʻe toʻo ʻe he ʻOtuá ʻa e manavaheé mei homau lotó.” Ko ia, kapau ʻoku ʻikai te ke ongoʻi loto-toʻa tautefito fekauʻaki mo hoʻo ngāue fakafaifekaú, pe kapau ʻoku ʻi ai ha tafaʻaki ʻo ia ʻoku hā ngali fakalotosiʻi, ko e hā ʻoku ʻikai te ke tangi ai kia Sihova ke ne fai mai ʻa e meʻa tatau maʻaú? Kole kiate ia ke ne toʻo ʻa e manavaheé mei ho lotó. Kole kiate ia ke ne tokoniʻi koe ke ke langaʻi ʻa e loto-toʻa ki he ngāué. Tānaki atu ki ai, laka ʻi ha ngaahi lākanga ʻaonga ʻe niʻihi. Ko e fakatātaá, fokotuʻutuʻu ke ke ngāue mo ha taha ʻoku poto ʻaupito ʻi he founga ʻo e faifakamoʻoni ko ia ʻokú ne fakahohaʻasi koé. ʻOku kau nai ai ʻa e feituʻu pisinisí, fakamoʻoni ʻi he halá, malanga ʻi he founga ʻikai anga-mahení, pe fakamoʻoni ʻi he telefoní. Mahalo ʻe loto ho hoá ke ne ʻuluaki kamata ia. Kapau ʻoku pehē, sio pea ako ai. Ka ke langaʻi leva ʻa e loto-toʻa ke ʻahiʻahiʻi ia.

18. Ko e hā ʻa e ngaahi tāpuaki te tau hokosia nai kapau te tau langaʻi ʻa e loto-toʻá ʻi heʻetau ngāue fakafaifekaú?

¹⁸ Kapau te ke langaʻi ʻa e loto-toʻá, fakakaukau atu ki he ola ʻe maʻu nai aí. ʻI hoʻo kīvoi pea ʻoua ʻe fakaʻatā koe ke ke hoko ʻo loto-siʻí, ngalingali te ke hokosia nai ai ʻa e ngaahi meʻa lelei ʻi hono vahevahe atu ʻa e moʻoní, ʻa e ngaahi meʻa ʻoku hokosia kuó ke tō nai mei ai. (Sio ki he peesi 25.) Te ke maʻu ai ʻa e fiemālie ʻo e ʻiloʻi kuó ke fakahōifuaʻi ʻa Sihova ʻaki hono fai ha meʻa ʻa ia ʻoku faingataʻa kiate koe. Te ke hokosia ai ʻa ʻene tāpuaki mo e tokoni ki hono ikuʻi ʻa hoʻo ngaahi manavaheé. ʻE mālohi ange ai ʻa hoʻo tuí. Ko hono moʻoní, heʻikai lava ke ke ngāue ki hono langa hake ʻa e tuí ʻi he niʻihi kehé ʻo ʻikai langa hake ʻa hoʻo tui ʻaʻaú tonu ʻi he taimi tatau pē.​—Siutasi 20, 21.

Naʻa Nau Langaʻi ʻa e Loto-Toʻá

ʻOKU ʻikai ke faingofua maʻu pē ke langaʻi ʻa e loto-toʻá koeʻuhi ke malanga. Ko hono moʻoní, naʻe pehē ʻe he ʻapositolo ko Paulá ʻi he taimi ʻe taha, naʻá ne fai ia ʻi he “fāinga lahi.” (1 Tesalonaika 2:2, NW) ʻOku ʻaonga ʻa e “fāinga” ke malangá? ʻOku ʻikai ha fakapapau ʻe hokosia ai ha ngaahi meʻa fakatupu tokanga, ka ʻoku faʻa fiefia ʻa e kakai ʻa e ʻOtuá ʻi heʻenau langaʻi ʻa e loto-toʻá. Fakakaukau atu ki he ngaahi faʻifaʻitakiʻanga ʻe niʻihi.

Ko ha kiʻi taʻahine taʻu valu ko hono hingoá ko Tara naʻá ne fanongo tokanga ʻi hono tala ange ʻe heʻene faiakó ki he kalasí ko e lolotonga ʻa e Tau II ʻa Māmaní, ko e kau pōpula Siu ʻi he kemi fakamamahí naʻe pau ke nau tui ha foʻi fetuʻu engeenga ʻo Tēvitá ko e fakaʻilonga. Naʻe fifili ʻa Tara pe ʻoku totonu ke ne lea hake. “Naʻá ku lotu ʻāʻā pē,” ko ʻene manatú ia. Pea naʻá ne hiki hake hono nimá peá ne pehē naʻe ʻi he ngaahi kemi ko iá foki ʻa e Kau Fakamoʻoni ʻa Sihová, pea naʻe pau ke nau tui ha kiʻi tapatolu lanu vāleti. Naʻe mahuʻingaʻia ai ʻa e faiakó peá ne fakamālō ange kiate ia. Naʻe fakaava ʻe he fakamatala ʻa Tara ha toe ngaahi fetalanoaʻaki mo e faiakó, ʻa ia naʻe aʻu ki mui ai ʻo ne fakahāhaaʻi ki heʻene kalasí fakakātoa ʻa e foʻi vitiō Jehovah’s Witnesses Stand Firm Against Nazi Assault.

ʻI Guinea, ʻAfilika Hihifo, naʻe loto ai ha kiʻi tokotaha malanga teʻeki papitaiso ko hono hingoá ko Irène ke ne fakalakalaka ʻi heʻene ngāue fakafaifekaú. Ko e misinale naʻá ne ako ʻa e Tohitapú mo iá naʻá ne fakalototoʻaʻi ia ke ne feinga ke tufa ʻa e ngaahi makasini Taua Leʻo mo e Awake! ki hono kaungāako ʻi he ʻapiakó. Naʻe toumoua ʻa Irène koeʻuhi naʻe taʻefiefanongo ange ʻa hono kaungākalasí. Kae kehe, ʻi hono ueʻi ʻe he fakalototoʻa ʻa e misinalé, naʻe fili ai ʻa Irène ke ne ʻuluaki fakaofi ki he tokotaha ako ko ia naʻe hā ngali fakafepaki lahi tahá. Naʻe ʻohovale ʻa Irène, he naʻe tokanga mo tali loto-vēkeveke ʻe he taʻahiné ʻa e ongo makasiní. Naʻe toe tali foki ia ʻe he tamaiki ako kehé. Naʻe tufa ai ʻe Irène ʻa e ngaahi makasini lahi ange ʻi he māhina ko iá ʻi heʻene ngāue ʻi hono fakatahaʻi ʻa e ngaahi māhina ʻe nima ki muʻá.

ʻI Tuliniteti naʻe ongoʻi mātuʻaki toumoua ai ha tokotaha mātuʻa ʻo fekauʻaki mo ha fakaofiofi ki he pule ako ʻo ha ʻapiako ke fakahāhā kiate ia ʻa e mahuʻinga fakaeako ʻo e makasini Awake! Ka neongo ia, naʻá ne langaʻi ai ʻa e loto-toʻa. ʻOkú ne pehē: “Naʻá ku lotu ʻi heʻeku hū ki he loto ʻapiakó. Naʻe faingataʻa ke u tui ʻi he anga-lelei taha kehe atu ʻa e pule akó.” Naʻá ne tali ʻa e makasini Awake! ʻi he “Ko e Hā ʻa e ʻAmanaki ki he Kau Talavou ʻo e ʻAho Ní?” pea aʻu ʻo ne loto ke ngāueʻaki ia ʻi hono akoʻi ʻo e kalasí. Talu mei ai, kuó ne tali ʻa e ngaahi makasini ʻe 40 ʻoku kātoi ai ʻa e ngaahi ʻīsiu kehekehe.

ʻI he tuʻunga ko ha talavoú, naʻe vakai maʻu pē ʻa Vaughn ki he malangá ʻoku faingataʻa. “Te u ilifia au, ʻe tautaʻa hoku ongo ʻaofi nimá, pea te u lea vave—heʻikai lava ke u lea māmālie.” Ka neongo ia, naʻá ne hoko ko ha faifekau taimi-kakato. Ka, naʻe ʻikai faingofua maʻu pē kiate ia ke ne lea. ʻI he taimi ʻe taha, ʻi he hili atu ha ʻaho fakalotosiʻi ʻo e kumi ki ha ngāue, naʻá ne loto ke ne faifakamoʻoni ki ha taha ʻi he lēlué, “kehe pē ke hoko ha meʻa lelei ʻi ha ʻaho ʻikai sai.” Ka naʻá ne ongoʻi loto-siʻi koeʻuhi ko e kau tangata pisinisi hā ngali mahuʻinga ʻi he lēlue ʻi lolofonuá. Faifai atu pē, naʻá ne langaʻi ʻa e loto-toʻa ke lea ki ha tangataʻeiki taʻumotuʻa naʻe hoko mai kiate iá. Naʻe iku ai ki ha fetalanoaʻaki lōloa. “Ko e ngaahi fehuʻi lelei ia ʻokú ke maʻú neongo ko ha tokotaha kei siʻi koe,” ko e lea ia ʻa e tangata pisinisí, peá ne ʻeke, “Ko ha tokotaha teolosia koe?” Naʻe tali ange ʻe Vaughn, “ʻIkai, ko e taha au ʻo e Kau Fakamoʻoni ʻa Sihová.” “ʻOi,” naʻe malimali ʻa e tangatá. “Kuo mahino eni kiate au.”

Ko e Kau Fakamoʻoni kotoa ko ʻení—mo e niʻihi kehe taʻefaʻalaua—ʻoku nau fiefia ʻi heʻenau langaʻi ʻa e loto-toʻa ke malangá. Te ke fai ʻa e meʻa tatau?