² Lolotonga ʻa e fuʻu taimi faingataʻa ko ení, naʻe tuku pilīsone ʻa e ʻapositolo ko Paulá. Naʻá ne fifili nai pe ʻe tokoniʻi ia ʻe hono fanga tokoua Kalisitiané koeʻuhí naʻá ne manatuʻi ʻi ha taimi ki muʻa ai naʻe ʻikai tokoniʻi ia ʻe ha taha. Ka naʻe maʻu ʻe Paula ha tokoni meia Sihova fakafou ʻi he ʻEiki ko Sīsuú. Naʻá ne tohi: “Naʻe tuʻu ʻa e ʻEikí ʻo ofi kiate au ʻo fakahūhū mai kiate au ʻa e mālohi.” Naʻe ʻoange ʻe Sīsū kia Paula ʻa e mālohi naʻá ne fiemaʻú. Naʻe aʻu ʻo tohi ʻe Paula ‘naʻe fakahaofi ia mei he ngutu ʻo e laioné.’—2 Tīm. 4:16, 17.a

³ Naʻe manatuʻi ʻe Paula ʻa e anga hono tokoniʻi ia ʻe Sihova ʻi he kuohilí. Ko ia naʻá ne falala-pau ʻe ʻoange kiate ia ʻe Sihova ʻa e mālohi naʻá ne fiemaʻú ke kātekinaʻaki ʻa e tuʻunga naʻá ne ʻi ai he taimi ko iá kae pehē ki ha ʻahiʻahi pē ʻi he kahaʻú. Naʻá ne fakapapauʻi moʻoni eni ʻo ne tohi: “ʻE fakahaofi au ʻe he ʻEikí mei he ngāue fulikivanu kotoa pē.” (2 Tīm. 4:18) Naʻe ʻiloʻi ʻe Paula naʻa mo e ngaahi tuʻunga naʻe ʻikai malava ke tokoniʻi ai ia ʻe hono fanga tokouá, ʻe lava ke ne falala maʻu pē kia Sihova mo Sīsū ki ha tokoni. Naʻe ʻikai toe veiveiua ʻene fakakaukaú.

“NGUTU ʻO E LAIONÉ”

10-12. (a) Ko e hā te ne ʻai nai ke faingataʻa ke tokangaʻi ha mēmipa ʻi he fāmilí ʻoku puke? (e) ʻI hoʻo falala kia Sihova he lolotonga ʻo e ngaahi taimi faingataʻá, ʻe anga-fēfē kaunga eni ki ho vahaʻangatae mo iá? ʻOmai ha fakatātā.

¹⁰ ʻE mātuʻaki faingataʻa nai ho tuʻungá ʻo ke ongoʻi ai hangē ko Paulá pea fiemaʻu ke fakahaofi koe mei he “ngutu ʻo e laioné.” (2 Tīm. 4:17) Lolotonga ʻa e ngaahi taimi pehení, ʻoku mātuʻaki mahuʻinga ke ke falala kia Sihova. Ko e fakatātaá, ʻokú ke tokangaʻi nai ha mēmipa ʻi he fāmilí ʻoku puke. Kuó ke lotu kia Sihova ke ne tokoniʻi koe ke fai ha ngaahi fili lelei pea hoko ʻo mālohi.b ʻE lava ke ke ongoʻi nonga leva ʻi hoʻo manatuʻi ʻoku ʻafioʻi mo mahinoʻi ʻe Sihova koe mo ho tuʻungá. Te ne tokoniʻi koe ke kātekina mo faitōnunga kiate ia.—Saame 32:8.