Naʻe tohi ʻa e ʻapositolo ko Paulá ki he kau Kalisitiane Hepelū ʻi he ʻuluaki senitulí: “Ta ʻoku toe pe ha mālōlō fakasapate maʻa e kakai ʻa e ʻOtua. He ko ia naʻa ne hu ki hono malōlōʻanga [ʻo e ʻOtuá], naʻa ne mālōlō ʻe ia foki mei heʻene ngaahi ngaue, ʻo hange tofu pe ko e ʻOtua mei haʻána. Ko ia ke tau tōtōivi ke hu ki he mālōlōʻanga ko ia.”—Hepelu 4:​9-11.

ʻI he foki ki he fakamatala ʻa Paula ʻi he Hepeluú, ʻoku tau ʻiloʻi naʻá ne fakahaaʻi ai “ʻoku toe pe ha mālōlō fakasapate maʻa e kakai ʻa e ʻOtua,” pea naʻá ne naʻinaʻi ki hono kaungā Kalisitiané ke nau feinga tōtōivi “ke hu ki he mālōlōʻanga ko ia.” ʻOku fakahaaʻi ʻe he meʻá ni ko e taimi ko ē naʻe tohi ai ʻe Paula ʻa e ngaahi lea ko iá, ko e “ʻaho ko hono fitu” ʻo e mālōlō ʻa e ʻOtuá, ʻa ia naʻe kamata ʻi he taʻu nai ʻe 4,000 ki muʻá, naʻe kei hokohoko atu ia. ʻE ʻikai ngata ia kae ʻoua ke fakahoko kakato ʻa e taumuʻa ʻa e ʻOtuá ʻo fekauʻaki mo e faʻahinga ʻo e tangatá pea mo e foʻi māmaní ʻi he ngataʻanga ʻo e Pule Taʻu ʻe Taha Afe ʻa Sīsū Kalaisí, ʻa ia ko e “ʻEiki ia ʻo e Sapate.”—Mātiu 12:8; Fakahā 20:​1-6; 21:​1-4.