Naʻe tohi ʻa e ʻapositolo ko Paulá ki he kau Kalisitiane Hepelū ʻi he ʻuluaki senitulí: “Ta ʻoku toe pe ha mālōlō fakasapate maʻa e kakai ʻa e ʻOtua. He ko ia naʻa ne hu ki hono malōlōʻanga [ʻo e ʻOtuá], naʻa ne mālōlō ʻe ia foki mei heʻene ngaahi ngaue, ʻo hange tofu pe ko e ʻOtua mei haʻána. Ko ia ke tau tōtōivi ke hu ki he mālōlōʻanga ko ia.”—Hepelu 4:​9-11.

ʻI he lea ʻa Paula fekauʻaki mo e mālōlō ʻa e ʻOtuá mei Heʻene ngāué, ʻoku hā mahino naʻá ne ʻuhinga ki he meʻa ko ia ʻoku hā ʻi he Senesi 2:​2, ʻa ia ʻoku tau lau: “Naʻe fakaʻosi ʻe he ʻOtua ʻi hono ʻaho fitu ʻa e ngaue naʻa ne fai; pea ne mālōlō ʻi hono ʻaho fitu mei he ngaue kehekehe naʻa ne fai.” Ko e hā naʻe hoko atu ai ʻa Sihova ʻo “mālōlō ʻi hono ʻaho fitu”? Ko e moʻoni naʻe ʻikai koeʻuhi naʻá ne fiemaʻu ke fakaakeake “mei he ngaue kehekehe naʻa ne fai.” ʻOku tokonaki mai ʻi he veesi hokó ha ʻiloʻanga: “Naʻe tapuakiʻi ʻe he ʻOtua ʻa e ʻaho ko hono fitu, mo ne tapui ia: koeʻuhi ko ia ia naʻa ne mālōlō ai mei heʻene ngaue kotoa pe, ʻio, mei he fakatupu meʻa mo ngaohi meʻa ʻe he ʻOtua.”—Senesi 2:3; Aisea 40:​26, 28.

Ko e “ʻaho ko hono fitu” naʻe kehe ia mei ha taha pē ʻo e ʻaho ʻe ono ki muʻá ʻi he tuʻunga ko ha ʻaho ia naʻe tāpuakiʻi ʻe he ʻOtuá mo ne tapui, ʻa ia, ko ha ʻaho naʻe fakamavaheʻi, pe fakatapui ki ha taumuʻa makehe. Ko e hā ʻa e taumuʻa ko iá? Ki muʻa angé, naʻe fakaeʻa ai ʻe he ʻOtuá ʻa ʻene taumuʻa ʻo fekauʻaki mo e faʻahinga ʻo e tangatá pea mo e foʻi māmaní. Naʻe folofola ʻa e ʻOtuá ki he ʻuluaki tangatá mo hono uaifí: “Mo fakatupu, mo fakatokolahi, mo fakafonu ʻa mamani, pea ikuna ia: pea mo pule ki he ika ʻo e tahi, mo e manupuna ʻo e langi, pea mo e meʻa moʻui kotoa pe ʻoku totolo ʻi he fonua.” (Senesi 1:28) Neongo naʻe ʻoange ʻe he ʻOtuá ha kamataʻanga haohaoa ki he faʻahinga ʻo e tangatá pea mo e foʻi māmaní, ʻe fiemaʻu ʻa e taimi ke ikunaʻi ai ʻa e foʻi māmaní kotoa pea liliuʻi ki ha palataisi ʻe fakafonuʻaki ha fāmili haohaoa ʻo e tangatá, ʻo hangē ko ia naʻe fakataumuʻa ki ai ʻa e ʻOtuá. Ko ia ai, ʻi he “ʻaho ko hono fitu,” naʻe mālōlō ai ʻa e ʻOtuá, pe tuku, mei ha toe ngāue fakaefakatupu fakaemāmani koeʻuhi ke fakaʻatā ʻa e meʻa kuó ne ʻosi fakatupú ke tupulaki ʻo fakatatau ki hono finangaló. ʻI he aʻu mai ki he ngataʻanga ʻo e “ʻaho” ko iá, ko e meʻa kotoa kuo fakataumuʻa ki ai ʻa e ʻOtuá ʻe hoko moʻoni ia. ʻE lōloa fēfē ʻa e mālōlō ko iá?

ʻI he tomuʻa sio atu ki he ʻamanaki fakaofo ko iá, naʻe fakamatalaʻi ʻe Paula ʻa e founga ʻe lava ai ke hū ha taha ki he mālōlōʻanga ʻo e ʻOtuá. Naʻá ne tohi: “He ko ia naʻa ne hu ki hono malōlōʻanga [ʻo e ʻOtuá], naʻa ne mālōlō ʻe ia foki mei heʻene ngaahi ngaue.” ʻOku tala mai ʻe he meʻá ni kiate kitautolu neongo ʻa hono maʻu ha kamataʻanga haohaoá, ko e faʻahinga ʻo e tangatá fakakātoa naʻe ʻikai te nau hū ki he mālōlōʻanga ʻo e ʻOtuá. Naʻe hoko eni koeʻuhi naʻe ʻikai ke tauhi fuoloa ʻe ʻĀtama mo ʻIvi ʻa e mālōlōʻanga ʻo e ʻOtuá ʻi he “ʻaho ko hono fitu” ʻaki hono tali ʻene fokotuʻutuʻu kiate kinauá. ʻI hono kehé, naʻá na angatuʻu peá na loto ke hoko ʻo tauʻatāina mei he ʻOtuá. Ko hono moʻoní, naʻá na kau fakataha mo e faʻufaʻu ʻa Sētane ki he ngaahi meʻá ʻo ʻikai ke tali ʻa e tataki anga-ʻofa ʻa e ʻOtuá. (Senesi 2:​15-​17) Ko hono olá, naʻe mole ai meiate kinaua ʻa e ʻamanaki ki he moʻui taʻengata ʻi ha māmani palataisí. Mei ai ʻo faai mai, naʻe hoko ai ʻa e kotoa ʻo e faʻahinga ʻo e tangatá ʻo pōpula ki he angahalá mo e maté.​—Loma 5:​12, 14.

Naʻe ʻikai ke mioʻi ʻe he angatuʻu ʻa e faʻahinga ʻo e tangatá ʻa e taumuʻa ʻa e ʻOtuá. ʻOku hokohoko atu pē ʻa hono ʻaho mālōloó. Kae kehe, naʻe fai ʻe Sihova ha tokonaki anga-ʻofa—ko e huhuʻí—fakafou ʻi hono ʻAló, ʻa Sīsū Kalaisi, koeʻuhi ke fakatuʻotuʻa atu ai ʻa e faʻahinga kotoa ʻoku nau tali ia ʻo makatuʻunga ʻi he tuí ki he fakatauʻatāina mo e mālōlō mei he mafasiaʻanga ʻo e angahalá mo e maté. (Loma 6:23) Ko e ʻuhinga ia naʻe naʻinaʻi ai ʻa Paula ki hono kaungā Kalisitiané ke nau ‘mālōlō mei heʻenau ngaahi ngaué.’ Naʻe fiemaʻu ke nau tali ʻa e tokonaki ʻa e ʻOtuá ki he fakamoʻuí pea ʻoua ʻe feinga ke ngāueʻi ʻa honau kahaʻú tonu ʻi he founga pē ʻanautolú, ʻo hangē ko ia naʻe fai ʻe ʻĀtama mo ʻIví. Naʻe toe fiemaʻu ke nau fakaʻehiʻehi mei he tuli ki he ngaahi ngāue pē ʻanautolu ʻo e fakatonuhiaʻi-kitá.

Ko hono liʻaki ʻa ʻete ngaahi ngāue siokita pe fakamāmaní koeʻuhi ke fai ʻa e finangalo ʻo e ʻOtuá ʻoku fakaivifoʻou mo fakatupu mālōlō moʻoni. Naʻe fakaongo mai ʻe Sīsū ʻa e fakaafe ko ení: “Haʻu kiate au, ʻa kimoutolu kotoa pe ʻoku fakaongosia mo māfasia, pea te u fakamālōlō kimoutolu. ʻAi ʻeku ioke kiate kimoutolu, pea mou ako ʻiate au: he ʻoku ou faʻa kataki mo angafākatuʻa, pea te mou ʻilo ha mālōlō ʻi homou laumalie. He ko e ioke aʻaku ʻoku molū, pea ko e kavenga aʻaku ʻoku maʻamaʻa.”—Mātiu 11:​28-30.

Ko e lāulea ʻa Paula ki he mālōlō ʻa e ʻOtuá mo e founga ʻe lava ke hū ai ha taha ki aí ko ha matavai moʻoni ia ʻo e fakalototoʻa ki he kau Kalisitiane Hepelū ʻi Selusalema, ʻa ia naʻa nau kātekina ʻa e fakatanga mo e manuki lahi ki heʻenau tuí. (Ngāue 8:1; 12:​1-5) ʻI he founga tatau, ʻe lava ke hoko ʻa e ngaahi lea ʻa Paulá ko ha matavai ia ʻo e fakalototoʻa ki he kau Kalisitiane ʻi he ʻaho ní. ʻI hono ʻiloʻi ʻoku mātuʻaki ofí ni ʻa hono fakahoko ʻa e talaʻofa ʻa e ʻOtuá ke ʻomai ha māmani palataisi ʻi he malumalu ʻo hono Puleʻanga māʻoniʻoní, ko kitautolu foki ʻoku totonu ke tau mālōlō mei heʻetau ngaahi ngāue ʻatautolú pea feinga tōtōivi ke hū ki he mālōlōʻanga ko iá.​—Mātiu 6:​10, 33; 2 Pita 3:​13.