Kuó Ke Fakatupunga ʻi ha Taimi ha Vela ʻa ha Vaotā?
TE KE PEHĒ, ʻikai ʻaupito. Ka ke kiʻi tatali ange! Mahalo pē kuó ke fai pehē. Fanongo ki he lea ʻa e ʻaposetolo ko Sēmisí: “Ko e ʻelelo ko e kupu siʻi, pea ʻoku lau meʻa lalahi. Vakai, hono ʻuke ʻa e meʻi afi ʻoku vela ai ʻa e fuʻu vao!”—Sēmisi 3:5.
Ko e ʻeleló ko ha ʻōkani mahuʻinga ʻaupito ki he leá, ka kuo lahi fau hono ngāuehalaʻakí! ʻOku ngāueʻaki ʻe he kakaí honau ʻeleló ke loi mo lauʻikovi loi. ʻOku nau ngāueʻaki ia ke fakaangaʻi fefeka ʻa e niʻihi kehe, fakaongoongokoviʻi mo kākaaʻi kinautolu. ʻOku ngāueʻaki ʻe he kakai fakatupu maveuveú honau ʻeleló ke fakatupunga ai ha liukava. Naʻe ngāueʻaki ʻe ʻAtolofi Hitilā hoʻoná ʻelelo ke fakatahatahaʻi ʻa e kakai ʻo hono fonuá ki he taú—‘ko ha vela ʻo ha vaotā’ moʻoni ē!
Naʻa mo e faʻahinga ʻoku nau fai ha meʻa ʻi ha taumuʻa lelei ʻe lava ke nau fakatupunga ha ‘ngaahi vela siʻisiʻi ʻo ha vaotā.’ Naʻá ke leaʻaki nai ha meʻa pea hili atu pē iá, pea ke fakaʻamu ʻoku malava ke fakafoki hoʻo leá? Kapau ko ia, ʻoku mahino leva kiate koe ʻa e meʻa ʻoku ʻuhinga ki ai ʻa Sēmisi ʻi heʻene pehē: “Ka ko e ʻelelo kuo teʻeki mafakalalata ʻe he tangata.”—Sēmisi 3:8.
Ka neongo iá, ʻe lava ke tau feinga ke ngāueʻaki hotau ʻeleló ki he ngaahi meʻa ʻoku lelei. Te tau lea loto-ʻalovili nai ʻo hangē ko ia ko e tangata tohi sāmé: “Te u vakai hoku ngaahi ʻalunga, ʻo leʻo, naʻa fai angahala ʻe hoku ʻelelo.” (Sāme 39:1) ʻI he lelei ange ke ʻoua te tau fakaangaʻi fefeka ʻa e niʻihi kehé, ʻe lava ke tau feinga ke langa hake kinautolu. ʻI he lelei ange ke ʻoua ʻe lauʻikoviʻi loi ʻa e kakaí, ʻe lava ke tau lauʻilelei ʻa kinautolu. ʻI he lelei ange ke ʻoua ʻe kākaaʻi mo lohiakiʻi ha taha, ʻe lava ke tau leaʻaki maʻu pē ʻa e moʻoní mo faʻa akoʻi. ʻI he ueʻi ʻa e ʻeleló ʻe ha loto ʻoku lelei, te ne lava ke leaʻaki ʻa e ngaahi lea fakaofo ko e faitoʻo. Naʻe ngāueʻaki ʻe Sīsū hono ʻeleló ʻi ha founga fakaofo ke akoʻi ʻa e faʻahinga ʻo e tangatá ʻo fekauʻaki mo e fakamoʻuí.
Ko e moʻoni, “oku i he elelo ae bule ki he mate moe moui.” (Palōvepi 18:21, PM) ʻOku fakatupu mate ʻa ho ʻeleló pe ʻoku fakatupu moʻui? ʻOkú ne fakatupunga ha ‘ngaahi vela ʻa ha vaotā’ pe tāmateʻi ia? Naʻe lotu ʻa e tangata tohi sāmé ki he ʻOtuá ʻo pehē: “E lea aki e hoku elelo hoo folofola: he oku maonioni hoo gaahi fekau kotoabe.” (Sāme 119:172, PM) Te tau ngāueleleiʻaki foki hotau ʻeleló, ʻo kapau te tau fakatupulekina ʻa e anga ʻo e fakakaukau naʻe maʻu ʻe he tangata tohi sāmé.
[Maʻuʻanga ʻo e Tā ʻi he peesi 32]
Laʻi tā ʻa e U.S. Forest Service