ʻOkú Ke Manatuʻi?

Kuó ke fai ha fakakaukau lelei ki he ngaahi ʻīsiu ki muí ni ʻo e Taua Leʻo? Kapau ko ia, te ke ʻiloʻi ʻoku mahuʻinga ke fakamanatu ʻa e meʻa ʻoku hoko haké:

◻ Ko e hā ʻoku taʻeʻuhinga ai ʻa e tokāteline ʻo e tomuʻa fakapapauʻí?

Kapau naʻe tomuʻa ʻilo mo fili ʻe he ʻOtuá ke tō ʻa ʻĀtama ki he angahalá, tā ko Sihova ia naʻe hoko ko e tupuʻanga ʻo e angahalá ʻi heʻene ngaohi ʻa e tangatá pea ʻe tuku kiate ia ʻa e fulikivanu mo e faingataʻaʻia kotoa ʻa e tangatá. Heʻikai lava ʻo fakaleleiʻi ʻe he meʻá ni ʻa e moʻoniʻi meʻa ko ia ko Sihová ko ha ʻOtua ʻo e ʻofa ʻa ia ʻokú ne fehiʻa ki he fulikivanú. (Sāme 33:5; Palovepi 15:9; 1 Sione 4:8)​—4/15, peesi 7, 8.

◻ ʻI hono fakahoko ʻa e Aisea 2:​2-4, ko e hā ʻoku fai ʻe he kakai ʻi he ngaahi puleʻanga lahi?

ʻI heʻenau holo ki he fale ʻo e lotu ʻa Sihová, naʻa nau tuku foki ʻenau ‘akotaú’ koeʻuhi kuo nau tuku ʻenau falalá ki he maluʻi ʻa e kau tau fakahēvani ʻa e ʻOtuá, ʻa ia ʻoku nau mateuteu ke fakaʻauha ʻa e ngaahi fili kotoa pē ʻo e melinó.​—4/15, peesi 30.

◻ Ko hai ʻa e kau helo ʻa Sihova ʻoku lea ki ai ʻa e Sioeli 3:​10, 11?

ʻOku tuʻo 280 nai ʻi he Tohitapú, ʻa hono ui ʻa e ʻOtua moʻoní ko “Sihova ʻo e ngaahi kau tau.” (2 Tuʻi 3:​14, NW) Ko e ngaahi kau tau ko ʻení ko e fuʻu hōsitē ia ʻo e kau ʻāngelo ʻi hēvani, ʻoku nau tuʻu mateuteu ke fai ʻa e tuʻutuʻuni ʻa Sihová.​—5/1, peesi 23.

◻ Ko e hā ʻa e lēsoni ʻoku lava ke tau ako mei he fiemaʻu ʻe Sihova ʻa Siope ke lotu maʻá e faʻahinga naʻa nau faihala kiate iá? (Siope 42:8)

Ki muʻa pea toe fakafoki ʻa Siope ki ha tuʻunga moʻui leleí, naʻe fiemaʻu ʻe Sihova ke ne lotu maʻá e faʻahinga ko ia naʻa nau faihala kiate iá. ʻOku fakahaaʻi heni ʻoku fiemaʻu mai ʻe Sihova ke tau fakamolemoleʻi ʻa e faʻahinga ko ia ʻoku faiangahala mai kiate kitautolú ki muʻa ia pea ʻe toki lava ai ke fakamolemoleʻi ʻetau ngaahi angahalá. (Mātiu 6:12; Efeso 4:32)​—5/1, peesi 31.

◻ Ko e hā naʻe ʻuhinga ki ai ʻa Sēmisi ʻi heʻene pehē: “Tuku ke fai ʻe kataki ʻene ngaue ke haohaoa”? (Semisi 1:4)

ʻOku ʻi ai ʻa e meʻa ʻa e kātakí ke fai, ko ha “ngaue.” Ko ʻene vāhenga-ngāué ko hono ʻai kitautolu ke tau kakato ʻi he ngaahi tafaʻaki kotoa pe. Mei hení, ʻi hono tuku ʻa e ngaahi ʻahiʻahí ke nau fou ʻi honau ʻalungá ʻo ʻikai ha ngaahi feinga ke ngāueʻaki ha ngaahi founga taʻefakatohitapu ke fakangata vaveʻaki kinautolú, ʻoku ʻahiʻahiʻi mo siviʻi ai ʻa ʻetau tuí.​—5/15, peesi 16.

◻ Ko e hā kuo tatali mātuʻaki fuoloa ai ʻa e ʻOtuá ke solova ʻa e ngaahi palopalema ʻa e faʻahinga ʻo e tangatá?

Ko e vakai ʻa Sihova ki he taimí ʻoku kehe ia mei haʻatautolú. Ki he ʻOtua taʻengatá, ko e vahaʻa taimi mei hono fakatupu ʻo ʻĀtamá ʻo aʻu mai ki he taimí ni ʻoku ʻikai aʻu hono lahí ʻona ki ha uike. (2 Pita 3:8) Ka ko e hā pē ʻa e vakai ki he taimí ʻoku tau maʻú, ko e ʻaho taki taha ʻoku fakalaka atú ʻokú ne ʻomai kitautolu ke ofi ange ai ki he ʻaho ʻo e fakatonuhiaʻi ʻo Sihová.​—6/1, peesi 5, 6.

◻ Ko e hā ʻokú ne ueʻi ʻa e Kau Fakamoʻoni ʻa Sihová?

Kuo fakatupu ʻi he akoʻi ʻe Sihová ha kakai makehe, kuo akoʻi ke nau feʻofaʻaki pea ʻofa ki honau kaungāʻapí ʻo hangē pē ko ʻenau ʻofa kiate kinautolú. (Aisea 54:13) Ko e ʻofá ʻokú ne ueʻi ʻa e Kau Fakamoʻoni ʻa Sihová ke hokohoko atu ʻa e malangá neongo ʻa e taʻemahuʻingaʻia pe fakatanga ʻa e kakaí. (Mātiu 22:​36-40; 1 Kolinito 13:​1-8)​—6/15, peesi 20.

◻ Ko e hā ʻoku kau ki ai ʻa e ngaahi lea ʻa Sīsū: “Mou tōtōivi ke hū ʻi he matapa fāsiʻi”? (Luke 13:24)

ʻOku kau ki he ngaahi lea ʻa Sīsuú ʻa e feinga, ʻo tuku atu kitautolu. ʻOku toe fakahā mai ʻe heʻene ngaahi leá ʻe ʻi ai nai ʻa e niʻihi te nau feinga ke ‘hū ʻi he matapaá’ ʻi heʻenau toki faingamālié pē, ʻi he tuʻunga faingofua ʻoku nau saiʻia aí. Ko ia ʻoku lava ke ʻeke ʻe he faʻahinga taki taha ʻo kitautolu, ‘ʻOku ou tōtōivi mo ngāue mālohi?’​—6/15, peesi 31.

◻ ʻE anga-fēfē ʻa e hoko ʻa e faʻahinga ʻe foki maí ʻo ‘fakamāu ʻi he ngaahi meʻa ʻoku tuʻu ʻi he ngaahi tohí, ʻo fakatatau ki heʻenau ngāué’? (Fakahā 20:12)

Ko e ngaahi tohi ko ʻení ʻoku ʻikai ko e lēkooti ia ʻo ʻenau ngaahi ngāue ʻi he kuohilí; ʻi he taimi naʻa nau mate aí, naʻa nau ʻatā ai mei he ngaahi angahala naʻa nau fai ʻi he lolotonga ʻo ʻenau moʻuí. (Loma 6:​7, 23) Kae kehe, ko e faʻahinga ʻo e tangatá ʻe toetuʻú te nau kei ʻi he malumalu pē ʻo e angahala meia ʻĀtamá. Ko ia ai, kuo pau pē ko e ngaahi tohi ko ʻení ʻe fokotuʻu ai ʻa e ngaahi fakahinohino fakaʻotua ʻa ia kuo pau ke muimui kotoa ki ai koeʻuhi ke maʻu ʻa e ʻaonga kakato mei he feilaulau ʻa Sīsū Kalaisí.​—7/1, peesi 22.

◻ Ko e hā ʻa e ngaahi lēsoni maʻatautolu ʻoku ʻi he pealapeli ʻa Sīsū fekauʻaki mo e Samēlia anga-fakakaungāʻapí? (Luke 10:​30-37)

ʻOku fakahā ʻe he pealapeli ʻa Sīsuú ko ha tokotaha anga-tonu moʻoni ko e tokotaha ia ʻoku ʻikai ke talangofua pē ki he ngaahi lao ʻa e ʻOtuá ka ʻokú ne toe faʻifaʻitaki foki ki hono ngaahi ʻulungāngá. (Efeso 5:1) ʻOku toe fakahaaʻi ai ko e anga-fakakaungāʻapí ʻoku totonu ke manga fakalaka ia ʻi he ngaahi fakangatangata fakafonua, anga fakafonuá, mo e fakalotú. (Kaletia 6:10)​—7/1, peesi 31.

◻ Ko e hā ʻa e ngaahi tafaʻaki ʻe tolu ʻa ia te ke lava nai ai ʻo ʻiloʻi ʻa hoʻo fānaú mo tokonaki ha tataki fakaemātuʻa?

(1) Tokoniʻi ʻa hoʻo fānaú ke fili ha faʻahinga ngāue fakaemāmani taau; (2) teuʻi kinautolu ke fekuki mo e mafasia fakaeongó ʻi he akoʻangá pea ʻi he ngāueʻangá; (3) fakahā kiate kinautolu ʻa e founga ke fakatōliʻaʻiʻaki ʻa ʻenau ngaahi fiemaʻu fakalaumālié.​—7/15, peesi 4.

◻ Ko e hā ʻa e taumuʻa naʻe mālōlō ai ʻa e ʻOtuá “ʻi hono ʻaho fitu”? (Senesi 2:​1-3)

Naʻe ʻikai ko e mālōlō ʻa e ʻOtuá ko haʻane helaʻia. Ka, naʻá ne mālōlō mei he ngāue fakaemāmaní koeʻuhí kae tuku ke fakatupulekina ʻene ngāue fakaefakatupú pea aʻu ki he lāngilangi kakató, ki hono fakahīkihikiʻí mo e fakalāngilangiʻí.​—7/15, peesi 18.

◻ Ko e hā ʻa e ngaahi founga ʻe tolu ʻoku lava ke tau ngāueʻaki ai ʻa e fakamaau totonú?

ʻUluakí, kuo pau ke tau muimui ki he ngaahi tuʻunga fakaeʻulungaanga ʻa e ʻOtuá. (Aisea 1:17) Uá, ʻoku tau ngāueʻaki ʻa e fakamaau totonú ʻi heʻetau fakafeangai ki he niʻihi kehé ʻi he founga ʻoku tau loto ke fakafeangai mai ʻaki ʻe Sihova kiate kitautolú. (Sāme 130:​3, 4) Tolú, ʻoku tau fakahāhā ʻa e fakamaau totonu fakaʻotuá ʻi heʻetau kau tōtōivi ʻi he ngāue fakamalangá. (Palovepi 3:27)​—8/1, peesi 14, 15.