ʻOkú Ke Manatuʻi?

Kuó ke lau fakalelei ʻa e ngaahi ʻīsiu fakamuimui ʻo e Taua Leʻo? Sai, sio angé pe ʻe lava ke ke tali ʻa e ngaahi fehuʻi ko ení:

Ko fē taimi naʻe ‘malanga ai ʻa Sīsū ki he ngaahi laumālie nofo pilīsoné’? (1 Pita 3:19)

ʻOku hā ngali ʻi ha kiʻi taimi pē hili ʻa e toetuʻu ʻa Sīsuú, naʻá ne fanongonongo ki he ngaahi meʻamoʻui laumālié fekauʻaki mo e tautea totonu ʻe hoko kia kinautolú.—6/15, peesi 23.

ʻE fakamāuʻi fakakū ʻe Sīsū ʻa e kakaí ko e fanga sipi pe fanga kosi? (Māt. 25:32)

ʻE hoko ia ʻi he taimi ʻe haʻu ai ʻa Sīsū ke fakamāuʻi ʻa e kakaí lolotonga ʻa e mamahi lahí, hili ʻa e fakaʻauha ʻo e lotu loí.—7/15, peesi 6.

Ko fē ʻa e taimi ʻe tangi mo fengaiʻitaki ai ʻa e nifo ʻo e faʻahinga maumau-lao ʻoku lave ki ai ʻa e pealapeli fekauʻaki mo e uité mo e teá? (Māt. 13:36, 41, 42)

Te nau fai pehē lolotonga ʻa e mamahi lahí ʻi he taimi te nau ʻiloʻi ai heʻikai te nau hao mei he fakaʻauhá.—7/15, peesi 13.

Naʻe fakahoko fakakū ʻa e ngaahi lea ʻa Sīsū fekauʻaki mo e tamaioʻeiki anga-tonu mo potó? (Māt. 24:45-47)

Naʻe kamata ke fakahoko ia, ʻikai ʻi he Penitekosi 33 T.S., ka ʻi he hili ʻa e 1914. ʻI he 1919, naʻe fakanofo ʻa e tamaioʻeikí ke tokangaʻi ʻa e kau sevānití, ʻa ia ʻoku kau kotoa ai ʻa e kau Kalisitiané ʻoku fafangaʻi fakalaumālié.—7/15, peesi 21-23.

ʻE fakanofo fakakū ʻe Sīsū ʻa e tamaioʻeiki anga-tonú ke tokangaʻi ʻa e kotoa ʻo ʻene ngaahi meʻá?

ʻE hoko ia ʻi he kahaʻú, lolotonga ʻa e mamahi lahí ʻi he taimi ʻe maʻu ai ʻe he tamaioʻeiki anga-tonú honau palé ʻi hēvani.—7/15, peesi 25.

Tānaki atu ki he mālohi mei he ʻOtuá, ko e hā naʻá ne tokoniʻi ʻa e Kau Fakamoʻoni ʻe toko 230 ke nau hao ʻi ha laka lōloa mei he kemi fakamamahi Sachsenhausen?

Neongo ʻenau ngāvaivai koeʻuhí ko e puké mo e siʻi ʻa e meʻakaí, naʻa nau fefakalototoʻaʻaki maʻu pē ke nau hokohoko atu.—8/15, peesi 18.

Naʻe fēfē ʻa e moʻui fakaʻaho ʻa Noa mo hono fāmilí lolotonga ʻenau ʻi he ʻaʻaké?

Naʻe ʻikai ha veiveiua naʻe tokangataha ʻa Noa ki he ngaahi meʻa fakalaumālié. ʻOku tau sioloto atu nai ki he fakatahataha maʻu pē ʻa e fāmilí ke nau lotu fakataha mo talanoa fekauʻaki mo e maluʻi ʻoku fai ʻe heʻenau Tamai fakahēvaní. Naʻe falala ʻa Noa kia Sihova ʻi he ngaahi fili mahuʻinga kotoa pē.—9/1, peesi 10.

Ko e hā ʻoku fakalototoʻaʻi ai kitautolu ʻe he fakamatala fekauʻaki mo e kolosi atu ʻa e kau ʻIsilelí ʻi he Vaitafe Sioataní ki he Fonua ʻo e Talaʻofá?

Neongo naʻe tafe vave ʻaupito ʻa e vaitafé, naʻe taʻofi ʻe Sihova ʻene tafé kae lava ke kolosi ʻene kakaí. Kuo pau pē naʻe fakaivimālohiʻi ai ʻenau tui mo e falala kiate iá, pea ʻe lava ke fakalototoʻaʻi kitautolu ʻe he fakamatalá.—9/15, peesi 16.

Naʻe fēfē ʻa e muʻaki lea ʻa e faʻahinga ʻo e tangatá?

ʻOku fakamatala ʻa e Tohi Tapú ko e ʻuluaki tangatá, ʻa ʻĀtama, naʻe malava ke ne ʻuluaki leaʻaki ʻa e ngaahi lea foʻou ʻi he taimi naʻá ne fakahingoa kotoa ai ʻa e fanga manú mo e fanga manupuna ʻo e ʻataá. (Sēnesi 2:20) Naʻe toe faʻu foki ʻe ʻĀtama ha maau ke fakahaaʻi ʻaki ʻene ngaahi ongoʻi ki hono uaifí, pea naʻe fakamatalaʻi mahino ʻe ʻIvi ʻa e meʻa naʻe tuʻutuʻuni ʻe he ʻOtuá pea mo e ngaahi nunuʻa ʻo e talangataʻa kiate Iá. (Sēnesi 2:23; 3:1-3) Ko ia, ko e ʻuluaki leá naʻe malava ai ʻe he tangatá ke fetuʻutaki kakato pea fakamatalaʻi mahino lelei kinautolu.—11/1, peesi 12.

Naʻe ʻuhinga ki he hā ʻa Paula ʻi heʻene pehē: “Tuku ki he tokotaha taki taha ke ne fai ʻa e meʻa tofu pē ko ia kuó ne fakapapauʻi ʻi hono lotó”? (2 Kol. 9:7)

Ko ha Kalisitiane moʻoni ʻokú ne fai ha foaki koeʻuhi kuó ne fakapapauʻi “ʻi hono lotó” ke fai pehē. Ko e muʻaki lea naʻe liliu ko e “fakapapauʻi” “ʻokú ne maʻu ʻa e foʻi fakakaukau ko e tomuʻa fakakaukauʻi,” ko e lau ia ʻa e mataotao ʻe taha. Ko ia ʻe fakakaukauloto ha Kalisitiane ki he ngaahi fiemaʻu ʻa hono kaungātuí pea ʻeke hifo kiate ia ʻa e meʻa ʻe malava ke ne fai ke feau ʻaki ʻa e ngaahi fiemaʻu ko iá.—1 Sione 3:17.—11/1, peesi 13.

ʻOku anga-fēfē hono fakahoko he ʻahó ni ʻa e kikite ʻi he Maika 5:5 (PM) fekauʻaki mo e kau tauhi sipi mo e kau tangata tuʻu-ki-muʻá?

ʻOku tau mahinoʻi ko e “kau tauhi sibi e toko fitu, moe kau tagata tuu ki mua e toko valu” ʻoku lave ki ai ʻi he Maika 5:5 (PM) ʻoku ʻuhinga ia ki he kau mātuʻa kuo fakanofo ʻi he fakatahaʻangá, ʻa ia ʻoku nau fakaivimālohiʻi ʻa e kakai ʻa e ʻOtuá ki ha ʻohofi kinautolu naʻe tomuʻa tala ki he kahaʻú.—11/15, peesi 20.