Ngaahi Fehuʻi mei he Kau Lautohí
ʻI he 1 Pita 4:3 (NW), ʻoku tau lau ai ko e niʻihi ʻo e kau Kalisitiané naʻa nau kau ʻi ha taimi ʻe taha ʻi he “ngaahi tauhi ʻaitoli taʻefakalao.” ʻIkai ko e ngaahi tauhi ʻaitoli kotoa pē ʻoku taʻefakalao, ʻo fakahalaiaʻi mo tapui ʻe he ʻOtuá?
ʻIo, ʻi he vakai ʻa e ʻOtuá, ko e tauhi ʻaitoli kotoa pē ʻoku taʻefakalao. Ko e faʻahinga ʻoku kumi ki heʻene hōifuá heʻikai ke nau fai ʻa e tauhi ʻaitolí.—1 Kolinito 5:11; Fakahā 21:8.
Kae kehe, ʻoku hangehangē naʻe lave ʻa e ʻapositolo ia ko Pitá ki he tauhi ʻaitolí ʻi ha vakai mei he tafaʻaki ʻe taha. Ko e ʻuhinga ʻe taha, ʻi he lotolotonga ʻo e ngaahi puleʻanga lahi ʻo e kuonga muʻá, naʻe fakatou failahia mo ʻikai ha taʻotaʻofi fakalao ia mei he kau maʻu mafaí ki he tauhi ʻaitolí. Ko e ʻuhinga ia, naʻe ʻikai tapui ai ʻi he lao ʻo e fonuá ʻa e tauhi ʻaitoli peheé. Naʻe aʻu ʻo hoko ʻa e tauhi ʻaitoli ia ʻe niʻihi ko ha konga ʻo e founga fakafonuá pe fakapuleʻangá. ʻI he ʻuhinga ko iá, naʻe kau ai ʻa e niʻihi ia ʻi he ‘tauhi ʻaitoli taʻeʻiai ha taʻotaʻofi fakalaó’ ki muʻa ia pea nau toki hoko ko e kau Kalisitiané. (New World Translation, pulusinga 1950) Ko e fakatātaá, mahalo pē ʻoku fakatokangaʻi naʻe fokotuʻu ʻe Tuʻi Nepukanesa ʻo Pāpiloné ha fuʻu ʻīmisi koula ki he tauhi ʻaitolí, ka ko e kau sevāniti ko ia ʻa Sihova ko Setaleki, Mēsake, mo ʻApitenikoó naʻa nau fakafisi ke lotu ki ai.—Taniela 3:1-12.
Mei ha toe fakakaukau ʻe taha, ko e ngaahi ouau fakaetauhi ʻaitoli lahi naʻe fakakau ai ʻa e ngaahi ngāue naʻe fepaki ʻaupito ia mo ha faʻahinga lao fakaenatula pē pe ko e ongoʻi fakaeʻulungaanga ko ia ʻoku tupu mei he konisēnisi tukufakaholó. (Loma 2:14, 15) Naʻe tohi ʻa e ʻapositolo ko Paulá ʻo fekauʻaki mo e ngaahi tōʻonga ololalo naʻe ‘tuku ai ʻa e fai fakaenatulá’ pea ko e “koto fakalielia,” pea naʻe faʻa fakahoko ʻa e ngaahi meʻá ni ʻi he ngaahi ouau fakalotú. (Loma 1:26, 27) Ko e kakai tangata mo e kakai fefine naʻa nau kau ʻi he tauhi ʻaitoli taʻefakalaó naʻe ʻikai te nau tokanga ki he taʻotaʻofi fakalao ʻa e natula fakaetangatá. Naʻe feʻungamālie moʻoni ki he faʻahinga ko ia naʻe hoko ko e kau Kalisitiané ke nau mavahe mei he ngaahi tōʻonga fakatupu maumau ko iá.
Tānaki atu ki he meʻa naʻe toki lave ki aí, ko e ngaahi tauhi ʻaitoli ko ia naʻe failahia ʻi he lotolotonga ʻo e faʻahinga ʻikai ko ha Siú naʻe fakahalaiaʻi ʻe Sihova ko e ʻOtuá. Ko ia ai, naʻa nau taʻefakalao.a—Kolose 3:5-7.
[Fakamatala ʻi lalo]
a Ko e konga tohi faka-Kalisi ʻi he 1 Pita 4:3 ʻoku ʻuhinga moʻoni ko e “ngaahi tauhi ʻaitoli taʻefakalao.” Ko e kupuʻi leá kuo fakalea kehekehe ʻi he ngaahi Tohitapu Faka-Pilitāniá ʻaki ʻa e ngaahi ʻuhinga ʻo hangē ko e “tauhi ʻaitoli taʻefakangofua,” “lotu ki he ngaahi ʻaitolí ʻoku tapui,” mo e “ngaahi tauhi ʻaitoli maumau-lao.”