ʻAi ke Fakakaukau Fakapotopoto—ʻOku Ofi ʻa e Ngataʻangá
“Ka kuo ofi ae gataaga oe mea kotoabe: koia mou fai [“fakakaukau,” NW] fakabotoboto, mo leo ke lotu.”—1 PITA 4:7, PM.
1. (a) Ko e hā ʻa e ʻamanaki taʻe hoko naʻe hokosia ʻe ha taki lotu ʻe taha mo hono kau muimuí? (e) Ko e hā ʻa e ongo fehuʻi ʻe ʻeke nai, koeʻuhi ko e ngaahi ʻamanaki naʻe ʻikai ke fakahoko?
“ʻI HE lolotonga ʻa e lotu tuku he poo ní naʻá ku maʻu ha fakahā mei he ʻOtuá. Naʻá ne pehē ʻe ʻalu hake ki hēvani ʻa e toko 116,000 pea ʻe fakaava hake ki he langí ʻa e ngaahi faʻitoka ʻo e kau tui naʻe mate ʻe 3.7 miliona.” Ko e lea ia ʻa e taki ʻo e Lotu ki he Ngaahi ʻAho ʻe Hoko Maí ʻi he pō ki muʻa ʻi ʻOkatopa 28, 1992, ko e ʻaho fakamaau ia naʻa nau kikiteʻí. Kae kehe, ʻi he aʻu ki ʻOkatopa 29, naʻe ʻikai ke ʻi ai ha toko taha ia naʻe ʻalu hake ki hēvani, pea naʻe ʻikai ke ʻi ai ha ngaahi faʻitoka ia ʻo e kau maté naʻe fakaava. Naʻe ʻikai ke ʻave vave kinautolu ʻi ha punakaki fakahēvani, pea naʻe ʻilo ai ʻe he kau tui ko ia ki he ngataʻanga ʻo māmaní ʻi Kōleá ko e ʻaho 29 ia ʻoku hangē pē ko e ngaahi ʻaho kehé. ʻOku lahi ʻa e ngaahi ʻaho naʻe lau ko e ngataʻanga ia ʻo e māmaní pea naʻe ʻosi atu ia, ka ʻoku ʻikai pē ke foʻi ʻa e kau tui ki he ngataʻanga ʻo e māmaní. Ko e hā leva ke fai ʻe he kau Kalisitiané? ʻOku totonu ke tuku ā ʻa ʻenau tui ʻoku vavé ni mai ʻa e ngataʻangá?
2. Ko hai naʻe lea ki he kau ʻaposetoló ʻo kau ki ha ʻaho fakamaau ʻi he kahaʻú, pea ko e hā ʻa e ngaahi tuʻunga naʻa nau ʻi ai ʻo nau ʻilo ai ki he meʻá ni?
2 Ke maʻu ʻa e talí, tau toe fakamanatuʻi ʻa e taimi naʻe fetalanoaʻaki ai ʻa Sīsū mo ʻene kau ākongá fakaekinautolu pē. ʻI he vahe fonua ko Sesalia Filipaí, ki he tokelau-hahake ʻo e Tahi Kālelí, naʻe tuʻu mei mui ʻa e Moʻunga fakaʻofoʻofa ko Heamoní, naʻa nau fanongo ai ki heʻene lea hangatonu ʻo pehē ʻe tāmateʻi ia. (Mātiu 16:21) Naʻe pau te nau toe fanongo ai ki ha ngaahi lea fakatupu-fakakaukau fakamātoato. ʻI he ʻosi ʻene fakamatala kiate kinautolu ʻo pehē ʻoku ʻuhinga ʻa e tuʻunga-ākongá ke moʻui līʻoa, naʻe fai fakatokanga ai ʻe Sīsū: “He ʻoku nānāfaki haʻele mai ʻae Fanautama ʻa Tangata, kuo ne ʻai ʻa e nāunau o ʻene ʻEiki, pea haʻofia ia ʻe heʻene kau angelo: pea te ne toki ʻange ki he tangata taki taha ʻo fakatatau ki heʻene ngāhi ngaue.” (Mātiu 16:27) Naʻe lea ʻa Sīsū ki haʻane toe haʻu ʻi he kahaʻú. Ka, ʻi he taimi ko iá ʻe hoko ia ai ko ha Fakamaau. ʻI he taimi ko iá ʻe makatuʻunga ʻa e meʻa hono kotoa pē pe te ne ʻilo ha faʻahinga ʻoku muimui anga-tonu kiate ia pe ʻikai. Ko e fakamaau ʻa Sīsuú ʻe makatuʻunga ia mei he tōʻongá, tatau ai pē pe ko e hā ʻa hono lahi pe siʻisiʻi nai ʻa e ngaahi koloa fakaemāmani ʻoku maʻu ʻe ha toko taha. Naʻe fie maʻu ki heʻene kau ākongá ke tauhi maʻu ʻi heʻenau fakakaukaú ʻa e moʻoniʻi meʻa ko ʻení. (Mātiu 16:25, 26) Ko ia ai, ko Sīsū Kalaisi tonu pē naʻá ne tala ki hono kau muimuí ke nau fakatuʻotuʻa ki heʻene haʻu lāngilangiʻiá mo ʻene fai fakamaaú.
3. Naʻe anga-fēfē ʻa hono fakahāhaaʻi ʻe Sīsū ʻa e papau ʻo ʻene toe haʻu ʻi he kahaʻú?
3 ʻI he ngaahi lea hono hoko ʻa Sīsuú naʻá ne fakahāhaaʻi ai ʻa e papau ʻo ʻene toe haʻu ʻi he kahaʻú. Naʻá ne fakapapauʻi ʻo pehē: “Ko au e, ʻoku ou tala atu, ʻOku ai ha niʻihi ʻo kinautolu ʻoku tutuʻu heni, ʻa ia ʻe ʻikai te nau momoʻi lave ki he mate, kae ʻoua ke nau mamata ki he Fanautama ʻa Tangata ʻoku ne haʻele fakapuleʻanga mai.” (Mātiu 16:28) ʻI he ʻosi ʻa e ʻaho ʻe ono mei ai naʻe fakahoko ʻa e ngaahi lea ko ʻení. Naʻe ofo ʻa ʻene kau ākonga fekoekoeʻi mo iá ʻi he vīsone naʻe ngingila ai ʻa e fakakehe ʻa e fōtunga ʻo Sīsuú. Naʻa nau sio tonu ai ki he fofonga ʻo Sīsuú naʻe ngingila ʻo hangē ko e laʻaá pea ko hono kofú naʻe hinaekiaki. Ko e fakakehé ni ko ha tomuʻa vakai ia ki he lāngilangiʻia mo e Puleʻanga ʻo Kalaisí. Ko ha meʻa mālohi ē ʻokú ne fakapapauʻi ʻa e ngaahi kikite fekauʻaki mo e Puleʻangá! Ko ha ʻuhinga mālohi ē ke ueʻi ai ʻa e kau ākongá ke ʻai ke nau fakakaukau fakapotopoto!—2 Pita 1:16-19.
ʻUhinga ʻOku Fie Maʻu Fakavavevave Ai ke ʻAi ke Fakakaukau Fakapotopotó
4. Ko e hā kuo pau ai pē ke tokanga fakalaumālie ʻa e kau Kalisitiané ki heʻene haʻú?
4 ʻI he teʻeki ai ke aʻu ʻo taʻu ʻe taha mei he meʻa naʻe hokó, naʻe nofo ʻa Sīsū ʻi he Moʻunga ko ʻOlivé, ʻo toe fetalanoaʻaki ai mo ʻene kau ākongá fakaekinautolu pē. Naʻá ne fakamatalaʻi ʻa e fakaʻilonga ʻo ʻene ʻi ai ʻi he kahaʻú ʻi heʻenau sio fakamamaʻu atu ki he kolo ko Selūsalemá, peá ne fai ʻa e fakatokanga: “Ko ia ke mou leʻo; he ʻoku ʻikai te mou ʻilo pe ko e ʻaho fē ʻe hoko mei ai ʻa homou ʻEiki.” Kuo pau ke tokanga ai pē ʻa hono kau muimuí koeʻuhi he ko e taimi ʻo ʻene haʻú ʻoku ʻikai ke ʻilo ia. Kuo pau ke nau mateuteu maʻu ai pē ki ai.—Mātiu 24:42.
5. ʻOku lava fēfē ke fakatātaaʻi ʻa e fie maʻu kiate kitautolu ke tau fai ʻa e faʻa vakavakai?
5 ʻI he fekauʻaki mo e anga ʻo ʻene haʻú, ʻoku meimei tatau ai ʻa e ʻEikí mo ha kaihaʻa. Naʻá ne hoko atu ʻo pehē: “Ka ko e meʻa ko eni ʻoku mou lāuʻilo ki ai, ʻo ka ne toka meaʻi ʻe he Tangataʻeiki pe ko e uasi fe ʻe haʻu ai ʻa e kaihaʻa, pehe ne leʻo, ʻo ʻikai tuku hono fale ke haea.” (Mātiu 24:43) ʻOku ʻikai ke fanongonongo ʻe he toko taha kaihaʻá ia ha fakatokanga ki he toko taha ʻoku ʻoʻona ʻa e ʻapí ʻo fekauʻaki mo e taimi ʻe haʻu aí; ko ʻene meʻa tefito ʻokú ne ngāueʻakí ko e fakaʻohovale. Ko ia ai, kuo pau ke tokanga ai pē ʻa e toko taha ʻoku ʻoʻona ʻa e ʻapí. Kae kehe, ʻoku ʻikai fai ʻa e vakavakai tōtōiví ʻe ha Kalisitiane anga-tonu koeʻuhi ko haʻane manavahē pe ko e hā ʻe hokó. Ka, ʻoku ueʻi ia ʻe he fakatuʻamelie fakamātoato ki he haʻu ʻa Kalaisi ʻi hono lāngilangiʻiá ke ʻomai ʻa e melino ʻi he Afeʻi Taʻu.
6. Ko e hā kuo pau ai ke tau fakakaukau fakapotopotó?
6 Neongo ʻa hono fai ʻo e tokanga maʻu ai pē, ʻe ʻikai pē ke lava ʻe ha toko taha ke ne tomuʻa fakafuofua ʻa e ʻaho tonu matematē ʻoku ʻamanaki ke haʻu ai iá. Naʻe pehē ʻe Sīsū: “Ko ia ke toka teuteu ʻa kimoutolu foki: he ko e hoko mai ʻa e Fanautama ʻa Tangata ʻe fai ʻi ha taimi ʻoku ʻikai te mou ʻamanaki ai kiate ia.” (Mātiu 24:44) Ko ia ai, ʻoku fie maʻu kiate kitautolu ʻa e fakakaukau fakapotopoto. Kapau ʻe fakakaukau nai ha Kalisitiane ia ki ha ʻaho pau ʻo pehē ʻe ʻikai haʻu ʻa Kalaisi he ʻaho ko iá, mahalo ko e ʻaho tonu pē ia ʻe haʻu ai iá! Ko e moʻoni, naʻe feinga ʻi he taumuʻa lelei pē mo loto-moʻoni ʻa e kau Kalisitiane anga-tonu ʻi he kuo hilí ke vavaloʻi ʻa e taimi ʻe hoko ai ʻa e ngataʻangá. Ka, kuo toutou fakamoʻoniʻi ai pē ʻoku moʻoni ʻa e fakatokanga ʻa Sīsuú: “Ka ko e meʻa ki he ʻaho ko ia mo hono houa, ʻoku ʻikai ha taha ʻoku ʻilo ki ai; ʻio, pe ko e kau angelo ʻi he langi; pea naʻa mo e ʻAlo ʻoku ʻikai; ngata pe ʻi he Tamai toko taha.”—Mātiu 24:36.
7. ʻI he hoko ko e kau muimui ʻo Kalaisí, kuo pau ke fēfē ʻa ʻetau moʻuí?
7 Ko ia ai, ko e hā ʻoku totonu ke tau fakamulituku ʻakí? Ko e hoko ko e kau muimui ʻo Kalaisí, kuo pau ke tau moʻui ʻo tui maʻu ai pē ʻoku tuʻunuku mai ʻa e ngataʻanga ʻo e ngaahi meʻa ʻo e fokotuʻutuʻu fulikivanu ko ʻení.
8. Ko e hā ʻa e fakaʻilonga mahino ʻo e kau Kalisitiané talu mei he ngaahi muʻaki ʻaho ʻo e lotu faka-Kalisitiané?
8 Ko e faʻahinga fakakaukau peheé ko ha fakaʻilonga maʻu ai pē ia ʻo e kau Kalisitiané, ʻo hangē ko ia ʻoku ʻiloʻi ʻe he kau tohi-hisitōlia fakaemāmani mo e kau poto mataotao ʻi he Tohi Tapú. Ko e fakatātā, ʻoku pehē ʻe he kau ʻetita ʻo e The Translator’s New Testament, ʻi he fakamatala ki he foʻi lea ko e “ʻAho” ʻoku ʻasi ʻi heʻenau peesi ʻoku hā ai ʻa e ngaahi foʻi lea makehé: “Ko e kau Kalisitiane ʻi he taimi ʻo e Fuakava Foʻoú naʻa nau fakatuʻamelie ki he ʻAho (ʻa ia ko e taimi ia) ʻe fakangata ai ʻa e māmani lolotonga ní mo hono kovi mo e fulikivanú kotoa pea ʻe toe foki mai ʻa Sīsū ki māmani ke fakamāuʻi ʻa e kakaí, mo fokotuʻu ha kuonga foʻou ʻo e melino pea kamata ʻene Pule ki he māmaní kotoa.” ʻOku pehē ʻi he Encyclopædia Britannica: “Ko e tupulaki taʻe hano tatau ʻi māmani ʻa e lotu faka-Kalisitiané ʻoku felāveʻi fakahangatonu ia mo e fakatuʻamelie ʻa e Kalisitiané ki he taimi ʻo e ngataʻangá, ʻi he ʻamanaki ʻoku tuʻunuku mai ʻa e toe foki mai ʻa Kalaisí. Naʻe ʻikai ʻaupito ke kau ki he fakatuʻamelie ʻa e Kalisitiané ʻo fekauʻaki mo e taimi ʻo e ngataʻangá ha fakaʻamu pē kae ʻikai fai ha meʻa koeʻuhi ko e teu hoko mai ʻa e Puleʻanga ʻo e ʻOtuá.”
ʻUhinga ki he ʻAi ke Fakakaukau Fakapotopotó
9. Neongo naʻe hala ʻa e niʻihi ʻo e ngaahi ʻamanaki ʻa Pita ʻo fekauʻaki mo e Mīsaiá, ko e hā ʻa e ʻuhinga naʻe kei tuʻu maʻu ai pē ʻa ʻene tui paú?
9 ʻI he ʻosi atu ʻa e taʻu ʻe 30 mei he fetalanoaʻaki fekoekoeʻi ʻa Sīsū mo ʻene kau ākonga naʻe ofi taha kiate iá, naʻe ʻikai ke fiu ʻa e ʻaposetolo ko Pitá he tali ki he hoko mai ʻa e ngataʻangá. Neongo naʻe hala ʻa e ngaahi ʻuluaki ʻamanaki ʻa Pita mo hono kaungāākongá ʻo fekauʻaki mo e Mīsaiá, naʻe kei tuʻu maʻu pē ʻene tui pau ko e ʻofa ʻa Sihová mo hono mālohí ʻokú ne fakapapauʻi ʻa hono fakahoko ʻo ʻenau ʻamanakí. (Luke 19:11; 24:21; Ngāue 1:6; 2 Pita 3:9, 10) ʻOkú ne fakahā ʻa e meʻa ʻoku ongona maʻu pē ʻi he Konga Tohi Tapu Faka-Kalisi Kalisitiané ʻi heʻene pehē: “Ka kuo ofi ae gataaga oe mea kotoabe.” Peá ne ekinaki ki he kaungā-Kalisitiané: “Koia mou fai [“fakakaukau,” NW] fakabotoboto, mo leo ke lotu.”—1 Pita 4:7, PM.
10. (a) ʻOku ʻuhinga ki he hā ʻa e ʻai ke fakakaukau fakapotopotó? (e) Ko e hā ʻoku kaunga ki he vakai ki he ngaahi meʻa ʻi honau felāveʻi totonu mo e finangalo ʻo e ʻOtuá?
10 Ko e “fakakaukau fakabotoboto” ʻoku ʻikai ke ʻuhinga ia ki he poto ʻi he anga ʻo e vakai mai ʻa e kakaí. ʻOku pehē ʻe Sihova: “Te u fakaʻauha ʻa e poto ʻo e kau poto, pea te u fakaikunoa ʻa e ʻilo ʻo e kau ʻiloʻilo.” (1 Kolinitō 1:19) ʻOku lava ke ʻuhinga ʻa e foʻi lea ʻoku ngāueʻaki ʻe Pitá ko e “ʻai ke fakakaukau fakamātoato.” Ko e fakakaukau fakamātoato fakalaumālie ko ʻení ʻoku fekauʻaki ia mo ʻetau lotú. Ko ia ai, ʻi he ʻikai fetōkaki ʻa ʻetau fakakaukaú, ʻoku tau sio ai ki he ngaahi meʻa ʻi honau felāveʻi totonu mo e finangalo ʻo Sihová; ʻoku mahino ai kiate kitautolu pe ko e fē ʻa e ngaahi meʻa ʻoku mahuʻingá mo ia ʻoku ʻikai ke mahuʻingá. (Mātiu 6:33, 34) Neongo ʻoku tuʻunuku mai ʻa e ngataʻangá, ʻoku ʻikai te tau kau ki he faʻahinga founga moʻui fakavalevalé; pea ʻoku ʻikai te tau taʻe hohaʻa ki he vahaʻa taimi ʻoku tau moʻui aí. (Fakafehoanaki mo Mātiu 24:37-39.) Ka ʻoku puleʻi kitautolu ʻe he fakanānā mo e mafamafatatau ʻi he fakakaukau, anga, mo e tōʻonga, ʻo ʻuluaki fakahā ki he ʻOtua ʻi he (“faʻa lotu”) pea toki fakahā ki hotau kaungāʻapí ʻi he (“feʻofaʻaki ke tūkuingata”).—1 Pita 4:7, 8.
11. (a) ʻOku ʻuhinga ki he hā ʻa e “fakafoʻou ʻa e mālohi ʻokú ne ueʻi [hotau] ʻatamaí”? (e) ʻOku anga-fēfē ʻa e tokoni kiate kitautolu ʻa e mālohi fakaefakakaukau foʻoú ke fai ʻa e ngaahi fili ʻoku leleí?
11 ʻOku fekauʻaki ʻa e fakakaukau fakapotopotó mo ʻetau “fakafoʻou ʻa e mālohi ʻokú ne ueʻi [hotau] ʻatamaí.” (ʻEfesō 4:23, NW) Ko e hā ke fakafoʻou aí? Koeʻuhi ko ʻetau maʻu tukufakaholo ʻa e taʻe haohaoá pea ʻoku tau nofo ʻi he ʻātakai angahalaʻia, ʻoku puleʻi ai ʻa ʻetau fakakaukaú ʻe he hehema ʻoku fepaki ia ki he tuʻunga fakalaumālié. Ko e mālohi ko iá ʻokú ne teke ai pē ʻa e ngaahi fakakaukaú mo e ngaahi hehemá ki he tafaʻaki fakamatelie mo siokita. Ko ia ai, ʻi he hoko ha taha ko ha Kalisitiané, ʻoku fie maʻu ki he toko taha ko iá ha mālohi foʻou, pe ko e anga ʻo e fakakaukau mālohi, ʻa ia te ne teke ʻa ʻene ngaahi fakakaukaú ki he tafaʻaki totonú, ko e tafaʻaki fakalaumālié, ke mateuteu ke moʻui līʻoa. Ko e fakatātā, ʻi he hoko ʻo fie maʻu ke fai ha fili fekauʻaki mo e akó, ngāue tuʻumaʻú, ngāué, ngaahi fakafiefiá, ʻeveʻevá, sīpinga ʻo e valá, pe ko ha meʻa pē, te ne ʻuluaki vakai ki he meʻa ko iá mei he tafaʻaki fakalaumālié kae ʻikai ko e anga ʻo e fakakaukau fakaekakano mo siokitá. Ko e anga ʻo e fakakaukau foʻou ko ʻení ʻokú ne ʻai ke faingofua ange ai ke fai ʻa e fili ki he ngaahi meʻa peheé ʻaki ʻa e fakakaukau fakapotopoto pea mo e ʻiloʻi ʻoku ofi mai ʻa e ngataʻangá.
12. ʻE lava fēfē ke tau tuʻumaʻu ke “haohaoa i he tui”?
12 ʻOku fakahaaʻi ʻe he ʻai ke fakakaukau fakapotopotó ʻoku tau ʻi ha tuʻunga moʻui lelei fakalaumālie. ʻE lava fēfē ke tau tuʻumaʻu ke “haohaoa i he tui”? (Taitusi 2:2, PM) Kuo pau ke tau fafanga ʻaki ʻa ʻetau fakakaukaú ʻa e faʻahinga meʻakai totonu. (Selemaia 3:15) Ko e maʻu maʻu pē ʻa e meʻakai ʻo e Folofola ʻo e moʻoni ʻa e ʻOtuá ʻo poupouʻi ia ʻe he ngāue ʻo hono laumālie māʻoniʻoní ʻe tokoni ia kiate kitautolu ke tauhi maʻu ʻa ʻetau mafamafatatau fakalaumālié. Ko ia ai, ʻoku mātuʻaki mahuʻinga ʻaupito ʻa e ako fakafoʻituitui maʻu pē, pea pehē ki he ngāue fakamalangá, lotú, mo e feohi faka-Kalisitiané.
Founga ʻOku Maluʻi ai Kitautolu ʻe he Fakakaukau Fakapotopotó
13. ʻOku lava fēfē ke maluʻi kitautolu ʻe he fakakaukau fakapotopotó mei hono fai ha ngaahi hala ngali valé?
13 ʻE lava ke maluʻi kitautolu ʻe he fakakaukau fakapotopotó mei hono fai ha hala ngali vale ʻe lava ke mole ai ʻa ʻetau moʻui taʻe ngatá. ʻOku malava fēfē ke hoko ʻa e meʻá ni? ʻOku lave ʻa e ʻaposetolo ko Paulá ki he “lao [ʻo e] loto [“fakakaukau,” NW].” Ki ha taha ʻoku lelei ʻa ʻene tuí, ʻoku puleʻi ʻa e lao ʻo e fakakaukaú ʻe he meʻa ʻokú ne saiʻia ai, ʻa ia ko e “lao ʻa e ʻOtua.” Ko e moʻoni, ʻoku fai tau ʻo fakafepaki ʻa e “lao ʻa Angahala” ki he lao ʻo e fakakaukaú. Kae kehe, ʻe lava ke ikuna ʻa e Kalisitiané ʻaki ʻa e tokoni meia Sihova.—Loma 7:21-25.
14, 15. (a) Ko e hā ʻa e ongo tākiekina ʻokú na fekuki ke puleʻi ʻa e fakakaukaú? (e) ʻOku lava fēfē ke tau ikuna ʻa e fai tau ʻo e fakakaukaú?
14 ʻOku hoko atu ʻa Paula ʻo ne ʻai ke mahino lelei ʻa e faikehekehe ʻo e fakakaukau ʻoku puleʻi ʻe he kakano angahalaʻiá, ʻa ia ʻoku fakahanga pē ia ki he moʻui fakapelepelé, pea mo e fakakaukau ʻoku puleʻi ʻe he laumālie ʻo e ʻOtuá, ʻa ia ʻoku fakahanga pē ia ki he moʻui līʻoa ʻi he ngāue kia Sihová. Naʻe tohi ʻe Paula ʻi he Loma 8:5-7: “He ko kinautolu ʻoku nau angafakakakano ʻoku nau toka ki he ngaahi meʻa ʻa e kakano; ka ko kinautolu ʻoku angafakalaumalie ʻoku nau toka he ngaahi meʻa ʻa e laumalie. Pea ko e feinga ʻa e kakano ko e koto mate ia: ka ko e feinga ʻa e laumalie ko e koto moʻui mo melino. Koeʻuhi ko e feinga ʻa e kakano ko e koto fakafili ki he ʻOtua: he ʻoku ʻikai te ne fakavaivai ia ki he lao ʻa e ʻOtua; seuke, ʻoku ʻikai ʻaupito te ne lava.”
15 Pea ʻoku toki fakamatala ʻe Paula ʻi he Loma vahe 8 veesi 11 ʻa e founga ʻoku ikuna ai ʻa e fai taú ʻe he fakakaukau ʻa ia ʻoku ngāue fakataha mo e laumālie māʻoniʻoní: “ʻIo, kapau ʻoku fale ʻiate kimoutolu ʻa e Laumalie ʻo ia naʻa ne fokotuʻu ʻa Sisu mei he pekia, pea ta ko ia naʻa ne fokotuʻu ʻa Kalaisi mei he pekia, te ne ʻai ke moʻui ʻa e koto mate na ko homou sino, koeʻuhi ko hono Laumalie ʻoku nofoʻia kimoutolu.”
16. Ko e hā ʻa e ngaahi fakatauele ʻe maluʻi kitautolu mei ai ʻe he fakakaukau fakapotopotó?
16 Ko ia ai, ʻi heʻetau fakakaukau fakapotopotó, ʻe ʻikai te tau tō kitautolu ki he ngaahi fakatauele ʻo e māmani ko ení ʻoku hā ʻi he taimi mo e feituʻu kotoa pē, ʻa ia ʻoku fakaʻilongaʻi ʻaki ʻa e taʻe ala mafakafuofua ʻo e moʻui fakapelepele ʻi he faʻahinga meʻa fakafiefiá, ngaahi meʻa fakamatelié, mo e anga kovi fakaefehokotaki fakasino kotoa pē. ʻE fakahā kiate kitautolu ʻe heʻetau fakakaukau fakapotopotó ke tau “hola pe mei he fai feʻauaki” pea hao ai mei hono ngaahi nunuʻa fakatuʻutāmakí. (1 Kolinitō 6:18) ʻE ueʻi kitautolu ʻe heʻetau fakakaukau fakapotopotó ke tau fakamuʻomuʻa ʻa e ngaahi meʻa mahuʻinga fekauʻaki mo e Puleʻangá pea ʻe maluʻi ai ʻa ʻetau fakakaukaú ʻi hano fakataueleʻi kitautolu ʻaki ha ngāue tuʻumaʻu fakaemāmani ʻe hoko ʻo vaivai nai ai ʻa hotau vahaʻangatae mo Sihová.
17. Naʻe fakahā fēfē ʻe ha tuofefine tāimuʻa ʻa e fakakaukau fakapotopotó ʻi heʻene fehangahangai mo e ngaahi fie maʻu fakaepaʻangá?
17 Ko e fakatātā, ʻi ha fonua talopiki ʻi he tonga-hahake ʻo ʻĒsiá, ʻoku ʻi ai ha tuofefine kei talavou naʻá ne fakamuʻomuʻa ʻa e ngaahi meʻa mahuʻinga fekauʻaki mo e Puleʻangá ʻi heʻene fakakaukaú. Naʻá ne fakatupulekina ʻa e ʻofa ki he ngāue fakamalanga taimi-kakató. ʻI he fonua ko iá ko e lahi taha ʻo e ngaahi ngāueʻangá ʻoku nau fie maʻu ke ngāue taimi-kakato ʻi he ʻaho ʻe ono pe fitu. ʻI he lava ʻa e taʻahiné ni mei he ʻunivesití, naʻe ʻamanekina ʻe heʻene tamaí ʻa ia naʻe ʻikai ko ha toko taha ia ʻo e Kau Fakamoʻoni ʻa Sihová, ha paʻanga lahi ʻe maʻu mai ʻe hono ʻofefiné maʻá e fāmilí. Ka koeʻuhi naʻe mālohi ʻa ʻene holi ke tāimuʻá, naʻá ne ngāue fakataimi pē mo kamata ʻi he ngāue tāimuʻá. Naʻe fakatupu ʻita ʻeni ki heʻene tamaí, pea naʻá ne fakamanamana te ne laku ʻa e ngaʻotoʻota ʻa e tuofefiné ni ki he hala puleʻangá. Naʻe lahi ʻaupito ʻa e moʻua ʻa e tamaí koeʻuhi ko e pele paʻangá, pea naʻá ne ʻamanekina ke totongi ʻe hono ʻofefiné ʻa hono ngaahi moʻuá. Naʻe ako ʻa e tuongaʻane siʻi ʻo e tuofefiné ʻi he ʻunivesití, pea koeʻuhi ko e ngaahi moʻuá ni, naʻe ʻikai ke ʻi ai ha paʻanga ia ke totongi ʻaki ʻene akó. Naʻe talaʻofa ange ʻe hono kiʻi tuongaʻané kapau te ne tokoniʻi ia, te ne tauhi ʻe ia ʻa e fāmilí ʻi ha maʻu haʻane ngāue. Naʻe veiveiua ʻa e loto ʻo e tuofefiné koeʻuhi ko ʻene ʻofa ki hono tuongaʻané pea mo ʻene ʻofa ki he ngāue tāimuʻá. ʻI he ʻosi ʻa hono fakakaukauʻi fakalelei ʻa e meʻá ni, naʻá ne fai ha fili ke hokohoko atu pē ʻa ʻene ngāue tāimuʻá mo toe kumi ha ngāue ʻe taha. Pea ko e tali ki heʻene ngaahi lotú, naʻá ne maʻu ha ngāue lelei ʻa ia naʻe ʻikai ke ngata pē ʻi heʻene malava ai ke tokoni fakaepaʻanga ki hono fāmilí mo hono tuongaʻané ka ke ne kei hokohoko atu pē foki ʻi he meʻa naʻá ne ʻuluaki ʻofa aí, ʻa ia ko e ngāue tāimuʻá.
Kumi ki he Tokoni Meia Sihová ke Tauhi Maʻu ʻa e Fakakaukau Fakapotopotó
18. (a) Ko e hā nai ʻoku ongoʻi loto-siʻi ai ʻa e faʻahinga ʻe niʻihi? (e) Ko e hā ʻa e ngaahi konga Tohi Tapu ʻe fakafiemālie nai kiate kinautolu ʻoku ongoʻi loto-siʻí?
18 ʻOku faingataʻa nai ki he kau muimui ʻe niʻihi ʻo Kalaisi ke tauhi maʻu ʻa ʻenau fakakaukau fakapotopotó. Kuo fakaʻau ke siʻi nai ʻa ʻenau kātakí koeʻuhi he naʻa nau ʻamanaki pē ʻe vave ʻa e ʻosi atu ʻa e ngaahi meʻa ʻo e fokotuʻutuʻu fulikivanu lolotonga ní. ʻOku fakalotosiʻi nai kinautolu ʻe he meʻá ni. Kae kehe, ʻe hoko mai pē ʻa e ngataʻangá ia. Ko e talaʻofa ia ʻa Sihová. (Taitusi 1:2) Pea ʻe hoko mai pē mo ʻene talaʻofa ki he Palataisi ʻi he māmaní. ʻOku fakapapauʻi ia ʻe Sihova. (Fakahā 21:1-5) ʻI he hoko mai ʻa e māmani foʻoú, ʻe ʻi ai ha “ʻakau ʻo e moʻui” maʻá e faʻahinga kotoa pē naʻa nau tauhi maʻu ʻa ʻenau fakakaukau fakapotopotó.—Palōvepi 13:12.
19. ʻOku lava fēfē ke tauhi maʻu ʻa e fakakaukau fakapotopotó?
19 ʻOku malava fēfē ke tau tauhi maʻu ʻa e fakakaukau fakapotopotó? Kumi ki he tokoni meia Sihová. (Sāme 54:4) Taka ofi kiate ia. Ko ha fiefia lahi ē kiate kitautolu ʻa e loto ʻa Sihova ke fafale mo kitautolú! “ʻUnuʻunu atu ki he ʻOtua, pea ʻe ʻunuʻunu mai ia kiate kimoutolu,” ko e tohi ia ʻa e ākonga ko Sēmisí. (Sēmisi 4:8) Naʻe pehē ʻe Paula: “Mou fiefia ʻi he ʻEiki maʻu ai pe: ʻio, kau toe ʻai atu, Mou fiefia. Ko hoʻomou anga na, ʻa e taʻe te mou haʻaki ʻeke hoʻomou ngaahi meʻa, tuku ke ha ia ki he kakai fulipe. ʻOku tuʻunuku mai ʻa e ʻEiki. Neongo pe ko e ha ʻa e meʻa, ʻoua te mou lotomoʻua ai; ka ʻi he meʻa kotoa pe tuku ke ha ki he ʻOtua hoʻomou ngaahi kole, ʻi he lotu mo e hufia, pea fai mo e fakafetaʻi. Pea ko e nonga ʻa e ʻOtua, ʻa ia ʻoku mamaʻo ʻi he tatae ʻa e ʻatamai kotoa pe, te ne maluʻi homou loto mo hoʻomou ngaahi fakakaukau ʻia Kalaisi Sisu.” (Filipai 4:4-7) Pea ʻi he hā ngali fuʻu mamafa mo ʻikai ke kei malava ke fua ʻa e ngaahi mafasiaʻanga ʻo e ngaahi meʻa ʻo e fokotuʻutuʻu ko ʻeni kuo mei ʻosí, lī atu ā ia kia Sihova, pea ko ia tonu pē te ne poupouʻi koé.—Sāme 55:22.
20. Fakatatau ki he 1 Tīmote 4:10, ko e hā ʻa e ʻalunga ʻoku totonu ke tau hokohoko atu aí?
20 Ko ia, ʻai ke fakakaukau fakapotopoto he ko e ngataʻangá ʻoku ofi! Ko ha fakahinohino lelei ia ʻi he taʻu ʻe 1,900 ki muʻá; ko e fakahinohino mātuʻaki mahuʻinga ʻaupito ia ʻi he ʻahó ni. ʻAi ke tau hokohoko atu ʻa hono ngāueʻaki ʻa ʻetau ngaahi malava fakaefakakaukau fakapotopotó ke fakamālō kia Sihova ʻi heʻene hokohoko atu ʻa hono maluʻi kitautolu ke aʻu atu ki heʻene māmani foʻoú.—1 Tīmote 4:10.
Ko e Hā Haʻo Tali?
◻ Ko e hā ʻa e fakakaukau fakapotopotó?
◻ Ko e hā ʻoku fie maʻu fakavavevave ai ke fakakaukau fakapotopotó?
◻ ʻOku lava fēfē ke tau fakafoʻou ʻa e mālohi ʻokú ne ueʻi hotau ʻatamaí?
◻ Ko e hā ʻa e fai tau tuʻumaʻu kuo pau ke tau tauʻi ʻi heʻetau fakakaukaú?
◻ ʻOku lava fēfē ke tau tauhi maʻu ʻa e fakakaukau fakapotopotó?
[Fakatātā ʻi he peesi 82]
ʻOku tokoniʻi kitautolu ke tauhi maʻu ʻa e fakakaukau fakapotopotó ʻe he ʻunu ofi ki he ʻOtuá ʻi he lotu
[Fakatātā ʻi he peesi 84]
ʻI he fakakaukau fakapotopotó ʻe ʻikai te tau tō ai kitautolu ki he ngaahi fakatauele ʻo e māmani ko ʻení