ʻE Anga-Fēfē Haʻatau Maʻa ʻi he Vakai Mai ʻa e ʻOtuá?

Sioloto atu ki ha faʻē ʻofa ʻokú ne teuteuʻi hono kiʻi fohá ki he akó. ʻOkú ne fakapapauʻi ʻokú ne maʻa pea toe maʻa mo maau ʻa hono valá. ʻOku ʻai ia heni ke ne moʻui lelei pea fakahaaʻi atu ki he niʻihi kehé ko ʻene ongo mātuʻá ʻokú na tokangaʻi lelei ia. ʻI he tuʻunga meimei tatau, ko ʻetau Tamai ʻofá, ʻa Sihova, ʻokú ne loto ke tau hoko ʻo maʻa fakaesino pea toe maʻa ʻi he anga ʻetau fakakaukaú, leá mo e tōʻongá. ʻI heʻetau maʻá, ʻoku tau maʻu ʻaonga mei ai pea toe ʻoatu ʻa e lāngilangí kia Sihova.

1. ʻOku lava fēfē ke tau maʻa fakaesinó?

ʻOku tala mai ʻe Sihova: “Kuo pau ke mou māʻoniʻoni.” (1 Pita 1:16) Ke hoko ʻo māʻoniʻoní, kuo pau ke tau maʻa fakaeʻulungaanga pea toe maʻa fakaesino. ʻOku lava ke tau maʻa fakaesino ʻaki ʻa e kaukau maʻu pē pea tauhi hotau valá, ʻapí mo e meʻalelé ke maau mo maʻa. ʻOku lava ke tau toe tokoni ki hono fakamaʻa hotau Fale Fakatahaʻangá. ʻOku tau ʻoatu ʻa e lāngilangi kia Sihova ʻi heʻetau hanganaki tauhi kitautolu ke maʻa fakaesinó.​—2 Kolinitō 6:3, 4.

2. Ko e hā ʻa e ngaahi tōʻonga ʻoku totonu ke tau fakaʻehiʻehi mei aí ke hoko ʻo maʻá?

ʻOku ekinaki mai ʻe he Tohi Tapú ke “fakamaʻa kitautolu mei he ʻuli kotoa pē ʻo e kakanó mo e laumālié.” (2 Kolinitō 7:1) ʻOku ʻuhinga ení ʻoku totonu ke tau fakaʻehiʻehi mei ha meʻa pē te ne ʻuliʻi hotau sinó mo ʻetau fakakaukaú. Ko ʻetau ngaahi fakakaukaú ʻoku totonu ke fakahōifua kia Sihova, ko ia ai, ʻoku tau fai hotau lelei tahá ke talitekeʻi ʻa e ngaahi fakakaukau taʻetāú. (Saame 104:34) ʻOku totonu ke tau toe leaʻaki ʻa e ngaahi lea ʻoku maʻa.​—Lau ʻa e Kolose 3:8.

Ko e hā ʻokú ne toe ʻai kitautolu ke ʻuli fakaesino pe fakaeʻulungaanga? Ko e ngaahi meʻa ʻe niʻihi ʻoku lava ke ne ʻuliʻi hotau sinó. Ko ia ai, ʻoku ʻikai ke tau ngāueʻaki ʻa e tapaká pe fakateka ʻa e betel nut pea mo hono ngāueʻaki ʻa e faitoʻo kona tapú pea ngāuehalaʻaki ʻa e faitoʻó. ʻI he fakaʻehiʻehi mei hení, ʻoku tau moʻui lelei ange pea fakahaaʻi ʻa e fakaʻapaʻapa ki he meʻaʻofa ʻo e moʻuí. ʻOku tau toe feinga ke hoko ʻo maʻa fakaeʻulungaanga ʻaki ʻa e faitau mo e ngaahi tōʻonga taʻemaʻa ʻo e fakalielia-toko-tahá mo e sio ki he ʻata fakalieliá. (Saame 119:37; ʻEfesō 5:5) ʻOku faingataʻa nai ke ikuʻi ʻa e ngaahi tōʻonga ko ení, ka ʻoku lava ke tokoniʻi kitautolu ʻe Sihova ke fai ia.​—Lau ʻa e ʻAisea 41:13.

KELI LOLOTO ANGE

3. ʻOku fakalāngilangiʻi ʻa Sihova ʻi he maʻa fakaesinó

ʻI heʻetau lau ʻa e lao ʻa Sihova naʻe ʻoange ki he puleʻanga ʻIsilelí, ʻoku tau ako ai ʻa e anga ʻo e mahuʻinga kiate ia ʻa e maʻa ʻa hono kakaí. Lau ʻa e ʻEkisoto 19:10 mo e 30:17-19, pea lāulea leva ki he ongo fehuʻi ko ení:

• Ko e hā ʻoku fakaeʻa ʻi he ngaahi veesi ko ení fekauʻaki mo e vakai ʻa Sihova ki he maʻa fakaesinó?

• Ko e hā ʻa e ngaahi tōʻonga lelei te ne tokoniʻi koe ke hanganaki maʻa fakaesinó?

ʻOku fiemaʻu ʻa e taimi mo e feinga lahi ke hoko ʻo maʻa fakaesino. Ka ʻoku lava ke tau fai ia tatau ai pē pe ʻoku tau nofo ʻi fē pe ko e hā hotau tuʻunga fakaepaʻangá. Huluʻi ʻa e VITIOÓ, pea lāulea leva ki he fehuʻi hokó.

VITIŌ: ʻOfa ʻa e ʻOtuá ʻi he Kakai ʻOku Maʻá (4:13)

• Ko e hā ʻoku hoko ai ʻa e kakai ʻoku tau malanga ki aí ʻo fakaʻapaʻapaʻi lahi ange ʻa Sihova ʻi heʻenau sio mai ʻoku maʻa ʻetau ngaahi meʻá?

4. Ikuʻi ʻa e ngaahi tōʻonga koví

Kapau ʻokú ke ifi pe ngāueʻaki ʻa e faitoʻo kona tapú, ʻokú ke ʻiloʻi nai ʻoku faingataʻa ke ikuʻi ʻa e tōʻonga ko iá. Ko e hā ʻe tokoni? Fakakaukau angé ki he uesia kiate koe ʻa e tōʻonga kovi ko iá. Lau ʻa e Mātiu 22:37-39, pea lāulea leva ki he anga ʻo e hoko ʻa e tapaká pe ngāueʻaki ʻa e faitoʻo kona tapú ʻo uesia . . .

• ha vahaʻangatae ʻo ha taha mo Sihova.

• ʻa e fāmili ʻo ha tokotaha pea mo e faʻahinga ʻoku feohi mo iá.

Fokotuʻu ha palani ke ikuʻi ha tōʻonga koví.a Huluʻi ʻa e VITIOÓ.

VITIŌ: Hoko ʻo Mapuleʻi-Kita (2:47)

Lau ʻa e Filipai 4:13, pea lāulea leva ki he fehuʻi ko ení:

• ʻOku lava fēfē ke hoko ʻa e lotu tuʻumaʻú, ako Tohi Tapú mo e maʻu maʻu pē ʻa e ngaahi fakatahá ʻo ʻoange ki ha tokotaha ʻa e mālohi ke ikuʻi ha tōʻonga kovi?

5. Faitau mo e ngaahi fakakaukau mo e tōʻonga taʻemaʻá

Lau ʻa e Kolose 3:5, pea lāulea leva ki he ngaahi fehuʻi ko ení:

• ʻOku anga-fēfē ʻetau ʻilo ko e ʻata fakalieliá, feʻaveʻaki pōpoaki taʻetaau ʻi he telefoni toʻotoʻó mo e fakalielia-toko-tahá ʻoku taʻemaʻa ʻi he vakai mai ʻa Sihová?

• ʻOkú ke fakakaukau te tau lava ʻo maʻa fakaeʻulungaanga ʻo hangē ko ia ʻoku ʻamanekina mai ʻe Sihová? Ko e hā hono ʻuhingá?

Sio angé ki he founga ʻoku lava ai ke tau faitau mo e ngaahi fakakaukau taʻemaʻá. Huluʻi ʻa e VITIOÓ.

VITIŌ: Fai ha Ngāue ke Hanganaki Maʻa (1:51)

Naʻe ngāueʻaki ʻe Sīsū ha talanoa fakatātā ke fakahaaʻi ai kuo pau ke tau fakapapauʻi ke fai ʻa e meʻa ʻoku fiemaʻu ke nofoʻaki maʻa fakaeʻulungaanga. Lau ʻa e Mātiu 5:29, 30, pea lāulea leva ki he fehuʻi ko ení:

• Naʻe ʻikai ke pehē ʻe Sīsū ia ke tau ʻai kitautolu ki ha tuʻunga fakatuʻutāmaki fakaesino, ka naʻá ne ʻuhingá ʻoku fiemaʻu ke tau fai ha ngāue papau. Ko e hā ha ngāue pau ʻoku lava ke fai ʻe ha taha ke fakaʻehiʻehi ai mei he fakakaukau taʻemaʻá?b

Kapau ʻokú ke fāinga ke ikuʻi ʻa e ngaahi fakakaukau taʻemaʻá, ʻoku fakamahuʻingaʻi ʻe Sihova hoʻo feingá. Lau ʻa e Saame 103:13, 14, pea lāulea leva ki he fehuʻi ko ení:

• Kapau ʻokú ke fāinga ke ikuʻi ha tōʻonga taʻemaʻa, ʻoku anga-fēfē hono fakalototoʻaʻi koe ʻe he konga Tohi Tapu ko ení ke hokohoko atu hoʻo faitau?

ʻOua ʻe foʻi!

Te ke fakakaukau nai, ‘Naʻá ku tō, sai ia, heʻikai ke u toe feinga.’ Kae fakakaukau ki heni: Ko ha tokotaha lova ʻokú ne hekea pea tō. ʻOku ʻikai ʻuhinga iá kuó ne foʻi he lová pe te ne toe foki ʻo kamata foʻoú. ʻI he tuʻunga meimei tatau, ko ha toó ʻoku ʻikai ʻuhinga iá kuó ke foʻi ʻi he faitau ke ikuʻi ha tōʻonga koví. ʻOku lava ke ke kei ongoʻi lelei ʻi he fakalakalaka kuó ke fai. Ko e toó ko e konga pē ia ʻo e feinga ke ikuʻi ʻa e tōʻonga koví. ʻOua ʻe foʻi! ʻI he tokoni ʻa Sihová, ʻoku lava ke ke ikuʻi ʻa e tōʻonga koví.

FAKANOUNOU

ʻOku tau fakahōifua kia Sihova ʻi heʻetau tauhi hotau sinó, ʻatamaí mo ʻetau tōʻongá ke maʻa.

Fakamanatu

• Ko e hā ʻoku mātuʻaki mahuʻinga ai ke maʻá?

• ʻE lava fēfē ke ke maʻa fakaesinó?

• ʻE lava fēfē ke ke tauhi hoʻo fakakaukaú mo hoʻo tōʻongá ke maʻá?

AKO LAHI ANGE

Ko e hā ha ngaahi meʻa faingofua ʻoku lava ke ke fai ke ke maʻa fakaesino neongo hoʻo masivá?

Moʻui Lelei mo e Haisini​—Fanofano ʻo e Nimá (3:01)

Sio ki he meʻa ʻoku lava ke ke faí ke taʻofi hoʻo ifí.

“Founga ke Tuku Ai ʻa e Ifí” (ʻĀ Hake!, Siulai 2010)

Sio ki he nunuʻa ʻo e ʻata fakalieliá.

“ʻAta Fakalieliá​—ʻOku Sai Pē pe ʻOku Fakatupu Maumau?” (Toʻo mei he Ko e Taua Leʻo)

Sio angé ki he founga hono hanga ʻe ha tangata ʻo ikuʻi hono maʻunimā ia ʻe he ʻata fakalieliá.

“Naʻá Ku Tō Tuʻo Lahi Peá U Toki Lavameʻa” (Ko e Taua Leʻo Fika 4 2016)