Ngaahi Fakatamaki Fakanatulá​—Fakamoʻoni ʻOku Anga-Fakamamahi ʻa e ʻOtuá?

MEʻA ʻOKU LEAʻAKI ʻE HE KAKAÍ: “ʻOku puleʻi ʻe he ʻOtuá ʻa e māmaní, ko ia ʻokú ne fakatupunga ʻa e ngaahi fakatamaki fakanatulá; ko ia ai, kuo pau pē ʻokú ne anga-fakamamahi.”

MEʻA ʻOKU LEAʻAKI ʻE HE TOHI TAPÚ: “Ko e māmaní kotoa ʻoku tokoto ia ʻi he mafai ʻo e tokotaha fulikivanú.” (1 Sione 5:19) Ko hai ʻa e “tokotaha fulikivanú”? ʻOku tala mai ʻi he Tohi Tapú ko Sētane. (Mātiu 13:19; Maʻake 4:15) ʻOku faingataʻa ke tui ki ai? Fakakaukau ki heni: Kapau ʻoku maʻu ʻe Sētane ʻa e mālohi ki he māmaní, ʻokú ne tākiekina leva ʻa e faʻahinga ʻo e tangatá ke nau hoko ʻo siokita, mānumanu, mo sio nounou ʻo hangē ko iá. ʻIkai ʻe tokoni ia ke fakamatalaʻi ʻa e ʻuhinga ʻoku mātuʻaki ngāuekoviʻaki ai ʻe he tangatá hono ʻātakaí tonu ʻi he māmaní? ʻOku fakatokanga mai ʻe he kau mataotao tokolahi ko hono ngāuekoviʻaki ʻo e ʻātakaí ʻoku nau fakahoko nai ha ngafa ʻi he ngaahi fakatamaki fakanatulá, pe ko hono fakatupunga ia, ʻai ke kovi ange, pe ko hono ʻai ʻa e sōsaieti ʻo e tangatá ke tuʻu laveangofua ange.

Ko e hā leva ʻa e ʻuhinga ʻoku fakaʻatā ai ʻe he ʻOtuá ʻa Sētane ke ne fai ʻa e fuʻu tākiekina lahi pehē? Ko e talí ʻe foki pē ki he kamataʻanga ʻo e hisitōlia ʻo e tangatá, ʻi he taimi naʻe angatuʻu ai ʻa ʻetau ʻuluaki ongo mātuʻá ki he ʻOtuá ko hona Pulé. Ko e tokolahi taha ʻo e faʻahinga ʻo e tangatá kuo nau muimui ʻi he ʻalunga tatau talu mei ai. Ko e fili ko iá—ʻa hono talitekeʻi ʻa e pule ʻa e ʻOtuá—kuo ʻai ai ʻa e māmani ʻo e faʻahinga ʻo e tangatá ki he nima ʻo e fili ʻo e ʻOtuá, ʻa Sētane. Ko ia naʻe ui ʻe Sīsū ʻa Sētane ko e “pule ʻo e māmaní.” (Sione 14:30) ʻE pule ʻa Sētane ʻo taʻengata? ʻIkai!

ʻOku ʻikai taʻemahuʻingaʻia mo taʻetokanga ʻa Sihovaa ki he faingataʻa ʻoku fakatupunga ʻe Sētané. Ko hono moʻoní, ʻoku ueʻi loloto ʻa e ʻOtuá ʻi he faingataʻaʻia ʻa e tangatá. Ko e fakatātaá, ʻi he fekauʻaki mo e ngaahi taimi faingataʻa naʻe hoko ki he puleʻanga ʻIsilelí, ʻoku pehē ʻe he Tohi Tapú ʻo kau ki he ʻOtuá: “ʻI he mamahi kotoa naʻe hoko kiate kinautolu naʻe hoko ha mamahi ki Heʻene ʻAfio.” (ʻAisea 63:9) Kuo fokotuʻutuʻu ʻe he ʻOtuá ke fakangata ʻa e pule anga-fakamamahi ʻa Sētané—ʻi he vave tahá! Kuó ne fakanofo hono ʻAló, ʻa Sīsū Kalaisi, ke hoko ko ha Tuʻi faitotonu mo māʻoniʻoni ʻo taʻengata.

ANGA HOʻO KAUNGA KI AÍ: Neongo kuo ʻikai lava ʻe he pule ʻa Sētané ke maluʻi ʻa e kakaí mei he ngaahi fakatamaki fakanatulá, ʻe lava ia ʻe he pule ʻa Sīsuú. Naʻe ngāue ʻa Sīsū he taimi ʻe taha ke maluʻi ʻene kau ākongá lolotonga ha matangi mālohi. ʻOku pehē ʻe he fakamata ʻa e Tohi Tapú: “Naʻá ne . . . valokiʻi ʻa e matangí peá ne pehē ki he tahí: ‘ʻEi! Fakalongolongo!’ Pea naʻe tuʻu leva ʻa e matangí, pea naʻe hoko ha fuʻu tofukī.” Naʻe pehē ʻe he kau ākongá: “Ko hai moʻoni eni? Naʻa mo e matangí mo e tahí ʻokú na talangofua kiate ia.” (Maʻake 4:37-41) Ko e meʻa ko ia naʻe hokó ʻoku ʻomai ai kia kitautolu ʻa e falala-pau ʻe maluʻi ʻe Sīsū ʻa e kotoa ʻo e faʻahinga talangofua ʻo e tangatá lolotonga ʻene pule ko e Tuʻí.—Taniela 7:13, 14.