Founga ke ʻIloʻi Ai ʻa e Lotu Moʻoní

ʻOKU taukaveʻi ʻe he ngaahi lotu lahi tahá ko e meʻa ʻoku nau leaʻakí ko e haʻu mei he ʻOtuá. Ko ia ai, ʻoku lelei ke tau tokanga ki he ngaahi lea ʻa e ʻapositolo ʻa Sīsū ko Sioné, ʻa ia naʻá ne tohi: “Siʻi ʻofaʻanga, ʻoua te mou tui ki he laumalie fulipe, ka mou sivi pe ʻa e ngaahi laumalie, pe ʻoku mei he ʻOtua ia: he ʻoku tokolahi ʻa e kau palofita loi kuo ʻalu atu ki mamani.” (1 Sione 4:1) ʻE lava fēfē ke tau siviʻi ha meʻa ke ʻilo pe ko e haʻu mei he ʻOtuá?

Ko e meʻa kotoa pē ʻoku haʻu mei he ʻOtuá ʻoku tapua mai ai hono ʻulungāangá, tautefito ki hono ʻulungāanga tuʻu-ki-muʻá, ʻa e ʻofá. Ko e fakatātaá, ko hotau ongoʻanga ko e nāmuʻí, ʻa ia ʻokú ne ʻai ke tau malava ʻo namu-leleiʻia ʻi he ʻalaha ʻo e fanga kiʻi ʻakau fakanamuleleí, ngaahi matalaʻiʻakaú, pe ko ha foʻi mā foʻou naʻe taʻo, ko ha fakahāhā ia ʻo e ʻofa ʻa e ʻOtuá. Ko ʻetau malava ke sio ki he tō ʻa e laʻaá, ki ha kiʻi pepe, pe ko e malimali ʻa ha kiʻi tama ʻoku tapua mai ai ʻa e ʻofa ʻa e ʻOtuá kiate kitautolú. ʻOku hoko ʻa e meʻa tatau ʻi heʻetau malava ke fanongo ki ha fasi mālie, ki he leʻo ʻo ha manupuna, pe ki he leʻo ʻo ha tokotaha ʻokú te ʻofa ai. Naʻa mo hotau faʻunga fakaetangatá, neongo ʻene taʻehaohaoá, ʻoku tapua mai ai ʻa e ʻofa ʻa e ʻOtuá. Ko e ʻuhinga ia ʻoku tau faʻa hokosia ai ʻa e moʻoni ʻo e ngaahi lea ʻa Sīsuú: “ʻOku te monuʻia [pe fiefia] lahi ʻi he fai ha foaki atu, ʻi heʻete maʻu ha foaki mai.” (Ngāue 20:35) ʻOku tau fiefia ʻi hono fakahaaʻi ʻa e ʻofá koeʻuhi naʻe ngaohi kitautolu “i he imisi ʻo e ʻOtua.” (Senesi 1:27) Neongo ʻoku lahi ʻa e ngaahi ʻulungāanga kehe ʻo Sihová, ko e ʻofá ʻa e tafaʻaki tuʻu-ki-muʻa taha ʻo hono ʻulungāangá.

Ko e ngaahi tohi ʻoku haʻu mei he ʻOtuá ʻoku totonu ke tapua mai ai ʻene ʻofá. ʻOku lahi ʻa e ngaahi tohi motuʻa ʻa e ngaahi lotu ʻo e māmaní. ʻOku lahi fēfē hono tapua mai ʻe he ngaahi tohi peheé ʻa e ʻofa ʻa e ʻOtuá?

Ko hono moʻoní, ko e lahi taha ʻo e ngaahi tohi fakalotu motuʻá ʻoku siʻi ʻene fakamatala ʻo fekauʻaki mo e founga ʻo e ʻofa mai ʻa e ʻOtuá kiate kitautolú pe ko e founga ʻe lava ke tau ʻofa ai ki he ʻOtuá. Ko ia, ʻoku ʻikai maʻu ʻe he kakai ʻe laui miliona ha tali ʻi he taimi ʻoku nau ʻeke ai, “Ko e hā ʻoku tau sio ai ki he fakamoʻoni ʻo e ʻofa ʻa e ʻOtuá ʻi he fakatupú lolotonga iá ʻoku hokohoko atu pē ʻa e faingataʻaʻiá mo e koví?” ʻI he tafaʻaki ʻe tahá, ko e Tohi Tapú pē ʻa e tohi fakalotu motuʻa ʻokú ne fakamatalaʻi kakato ʻa e ʻofa ʻa e ʻOtuá. ʻOkú ne toe akoʻi mai kiate kitautolu ʻa e founga ke fakahāhā ai ʻa e ʻofá.

Ko e Tohi Fekauʻaki mo e ʻOfá

Ko e Folofola ʻa e ʻOtuá, ʻa e Tohi Tapú, ʻokú ne fakahaaʻi mai ʻa Sihova “ko e ʻOtua ʻo e ʻofa.” (2 Kolinito 13:11) ʻOku fakamatala ʻa e Tohi Tapú ki he founga naʻe ueʻi ai ʻe he ʻofá ʻa Sihova ke ne foaki ki he ʻuluaki ongo meʻa fakaetangatá ʻa e moʻui ʻoku ʻatā mei he puké mo e maté. Ka ko e angatuʻu ki he mafai ʻo e ʻOtuá naʻá ne fakahoko mai ʻa e faingataʻaʻiá ki he faʻahinga ʻo e tangatá. (Teutalonome 32:​4, 5; Loma 5:12) Naʻe ngāue ʻa Sihova ke toe fakafoki mai ʻa e meʻa naʻe molé. ʻOku pehē ʻe he Folofola ʻa e ʻOtuá: “Naʻe ʻofa pehe ʻa e ʻOtua ki māmāni, ko ia naʻa ne foaki hono ʻAlo tofu-pe-taha-ne-fakatupu, koeʻuhi ko ia kotoa pe ʻoku tui pikitai kiate ia ke ʻoua naʻa ʻauha, kae maʻu ʻa e moʻui taʻengata.” (Sione 3:16) ʻOku fakahaaʻi ʻe he Tohi Tapu Māʻoniʻoní ʻa e ʻofa ʻa e ʻOtuá ʻo toe lahi ange ʻi heʻene fakamatalaʻi ʻa e founga kuo tokonaki ai ʻe he ʻOtuá ha founga-pule haohaoa ʻi he toʻukupu ʻo Sīsuú ke toe fakafoki mai ʻa e melinó ki he faʻahinga talangofua ʻo e tangatá.—Taniela 7:​13, 14; 2 Pita 3:13.

ʻOku fakanounou mai ʻe he Tohi Tapú ʻa e ngafa ʻo e tangatá ʻi he ngaahi leá ni: “Te ke ʻofa ki he ʻEiki ko ho ʻOtua, ʻo fai ʻaki ʻa e kotoa ʻo ho loto, mo e kotoa ʻo ho laumalie, mo e kotoa ʻo ho ʻatamai. Ko eni ia ʻa e tuʻutuʻuni ʻoku mamafa taha mo tuʻukimuʻa. Pea ʻoku faʻahinga mo ia ʻa hono ua, Te ke ʻofa ki ho kaungaʻapi ʻo hange ko hoʻo ʻofa kiate koe. Ko e ongo tuʻutuʻuni ko eni ʻe ua ʻoku tautau ki ai ʻa e Lao kotoa.” (Mātiu 22:​37-40) ʻOku taukaveʻi ʻe he Tohi Tapú ko e fakamānavaʻi ia ʻe he ʻOtuá. Koeʻuhi ʻoku fakahaaʻi mahino mai ʻa hono ʻulungāangá, ʻoku lava ke tau fakapapauʻi ai ko e haʻu ia mei he “ʻOtua ʻo e ʻofa.”—2 Timote 3:16.

ʻI hono ngāueʻaki ʻa e tuʻunga ʻe taha ko ʻení, ʻe lava ke tau ʻiloʻi ai ko fē ʻa e ngaahi tohi motuʻa ʻoku haʻu moʻoni mei he ʻOtuá. ʻOku toe fakahaaʻi foki ʻe he ʻofá ʻa e kau lotu moʻoní, he ʻoku nau faʻifaʻitaki ki he ʻOtuá ʻi hono fakahāhā ʻa e ʻofá.

Founga ke ʻIloʻi Ai ʻa e Kakai ʻOku ʻOfa ki he ʻOtuá

ʻOku maeʻeeʻa lelei ʻa e faʻahinga ʻoku nau ʻofa moʻoni ʻi he ʻOtuá tautefito he taimí ni ʻi heʻetau moʻui ʻi he taimi ʻoku ui ʻe he Tohi Tapú ko e “kuonga fakamui.” ʻOku fakaʻaʻau ai ʻa e kakaí ʻo “nau ʻofa kiate kinautolu pe, te nau ʻofa ki he paʻanga, . . . ko e kau ʻofa ki he malie ʻo ʻikai ʻofa ki he ʻOtua.”—2 Timote 3:​1-4.

ʻE lava fēfē ke ke fakatokangaʻi ʻa e kakai ko ia ʻoku ʻofa ki he ʻOtuá? ʻOku pehē ʻe he Tohi Tapú: “Ko eni ia ʻa e ʻofa ki he ʻOtua, ʻa ʻetau tauhi ki heʻene ngaahi tuʻutuʻuni.” (1 Sione 5:3) Ko e ʻofa ki he ʻOtuá ʻokú ne ueʻi ʻa e kakaí ke nau fakaʻapaʻapaʻi ʻa e ngaahi tuʻunga fakaeʻulungāanga ʻa e Tohi Tapú. Hangē ko ʻení, ʻoku ʻi he Folofola ʻa e ʻOtuá ʻa e ngaahi lao ki he fehokotaki fakasinó mo e nofo malí. ʻOku fakaʻatā pē ʻa e fehokotaki fakasinó ʻi loto ʻi he nofo malí, pea ko e nofo malí ke tuʻuloa. (Mātiu 19:9; Hepelu 13:4) ʻI hono maʻu ʻe ha fefine ʻi Sipeini naʻe ako teolosia ha fakataha ʻa ia naʻe ako fakamākukanga ai ʻe he Kau Fakamoʻoni ʻa Sihová ʻa e ngaahi lao fakaeʻulungāanga ʻa e Tohi Tapú, naʻá ne pehē: “Naʻá ku mavahe mei ai mo e ongoʻi langa hake, ʻo ʻikai ngata pē mei he ngaahi malanga Fakatohitapu fakamāmá kae toe pehē foki ki he fāʻūtaha ʻoku ʻi he lotolotonga ʻo e kakaí ni, ʻenau tuʻunga māʻolunga fakaeʻulungāangá, mo honau ʻulungāanga leleí.”

Tānaki atu ki heʻenau ʻofa ki he ʻOtuá, ʻoku toe ʻiloʻingofua ʻa e kau Kalisitiane moʻoní ʻi he founga ʻoku nau fakahāhā ai ʻa e ʻofá ki honau ngaahi kaungāʻapí. Ko ʻenau ngāue mahuʻinga tahá ko e talanoa ki he niʻihi kehé ʻo fekauʻaki mo e ʻamanakiʻanga pē taha ki he faʻahinga ʻo e tangatá, ko e Puleʻanga ʻo e ʻOtuá. (Mātiu 24:14) ʻOku ʻikai ha meʻa ʻe lava ke ne ʻoatu ha ngaahi ʻaonga tuʻuloa ange ki honau ngaahi kaungāʻapí ka ko hono tokoniʻi kinautolu ke nau maʻu ʻa e ʻiloʻi ʻo e ʻOtuá. (Sione 17:3) ʻOku toe fakahāhaaʻi ʻe he kau Kalisitiane moʻoní ʻenau ʻofá ʻi he ngaahi founga kehe. ʻOku nau fakaaʻu atu ʻa e tokoni ʻaonga ki he faʻahinga ʻoku faingataʻaʻiá. Ko e fakatātaá, ʻi hono fakatupunga ʻe ha mofuike ha fakatamaki ʻi ʻĪtali, naʻe līpooti ai ʻe ha nusipepa fakalotofonua ʻo pehē ko e Kau Fakamoʻoni ʻa Sihová ʻoku nau “ngāue ʻi ha founga ʻaonga, ʻo nau fakaaʻu atu ha tokoni ki he faʻahinga ʻoku faingataʻaʻiá, ʻo ʻikai haʻanau tokanga fekauʻaki mo e lotu ʻoku nau kau ki aí.”

Tuku kehe ʻa e ʻofa ki he ʻOtuá mo e kaungāʻapí, ʻoku feʻofaʻaki ʻa e kau Kalisitiane moʻoní. Naʻe pehē ʻe Sīsū: “Ko e tuʻutuʻuni foʻou ʻoku ou tuku kiate kimoutolu, Ke mou feʻofaʻaki: hange ā ko ʻeku ʻofaʻi kimoutolu, ke pehē foki hoʻomou feʻofaʻaki. Ko e meʻa kó é ʻe ʻilo ai ʻe he kakai kotoa pē ko e kau ako kimoutolu aʻaku, ʻo kapau ʻe ai haʻamou feʻofaʻaki.”—Sione 13:​34, 35.

ʻOku ala fakatokangaʻi ʻa e kehe ʻa e feʻofaʻaki ʻa e kau Kalisitiane moʻoní? Naʻe fakakaukau pehē ha fefine tauhi-ʻapi ko Ema. ʻOkú ne ngāue ʻi La Paz, Polivia, ʻa ia ʻoku faʻa fakamavahevaheʻi ai ʻe he faikehekehe fakaefaʻahingá ʻa e koloaʻiá mei he masivá. Naʻá ne pehē: “Ko e fuofua taimi naʻá ku ʻalu ai ki ha fakataha ʻa e Kau Fakamoʻoni ʻa Sihová, naʻá ku sio ai ki he tangata teunga lelei fakamatāpule ʻoku tangutu ʻo talanoa mo ha fefine ʻInitia. Naʻe teʻeki ai ʻaupito te u sio ha meʻa pehē ki muʻa. ʻI he mōmeniti ko iá, naʻá ku ʻilo ai ko e ongo meʻá ni kuo pau pē ko e kakai ʻa e ʻOtuá.” ʻI he tuʻuunga meimei tatau, naʻe pehē ʻe ha kiʻi fefine Pelēsila ko Miriam: “Naʻe ʻikai te u ʻiloʻi ʻa e founga ke hoko ai ʻo fiefiá, naʻa mo e ʻi hoku fāmilí. Ko e fuofua taimi naʻá ku sio ai ki hono fakahāhā ʻa e ʻofá ko e lotolotonga ʻo e Kau Fakamoʻoni ʻa Sihová.” ʻI ʻAmelika, naʻe tohi ai ʻe ha talēkita ongoongo ʻo ha kautaha televīsone: “Kapau naʻe moʻui ʻa e kakai tokolahi ange ʻi he founga ʻoku fai ʻe hoʻomou lotú, heʻikai ke hoko ʻa e puleʻangá ni ʻo ʻi he tuʻunga ʻokú ne ʻi aí. Ko e toko taha faiongoongo au ʻoku ou ʻiloʻi ʻoku makatuʻunga hoʻomou kautahá ʻi he ʻofa pea mo e tui mālohi ki he Tokotaha-Fakatupú.”

Kumi ki he Lotu Moʻoní

Ko e ʻofá ko ha tafaʻaki makehe ia ʻo e lotu moʻoní. Naʻe fakatatau ʻe Sīsū ʻa e kumi ki he lotu moʻoní ki he kumi ki he hala totonú pea fili ke ʻaʻeva ai. Ko e hala pē ia ʻe taha ʻoku taki atu ki he moʻui taʻengatá. Naʻe pehē ʻe Sīsū: “Mou hu ʻi he matapa fāsiʻi: he ʻoku fālahi ʻa e matapa, pea ʻatā ʻa e hala, ʻoku fakatau ki mala, pea toko lahi ʻa e kakai ʻoku hū atu ai: koeʻuhi ʻoku fāsiʻi ʻa e matapa, pea ʻefiʻefi ʻa e hala, ʻoku fakatau ki he moʻui; pea tokosiʻi ʻa e kakai ʻoku ʻilo ia.” (Mātiu 7:​13, 14) Ko e kulupu pē ʻe taha ʻo e kau Kalisitiane moʻoní ʻoku nau ʻaʻeva fāʻūtaha mo e ʻOtuá ʻi he hala ʻo e lotu moʻoní. Ko ia ai, ʻoku mahuʻinga pe ko fē ʻa e lotu ʻokú ke filí. Kapau ʻokú ke ʻilo ʻa e hala ko iá pea fili ke ʻalu ai, te ke maʻu ai ʻa e founga lelei taha ʻo e moʻuí, he ko e founga ia ʻo e ʻofá.—Efeso 4:​1-4.

Sioloto atu ki he fiefia ʻe lava ke ke maʻu ʻi hoʻo ʻaʻeva ʻi he hala ʻo e lotu moʻoní! ʻOku hangē ia ha ʻaʻeva mo e ʻOtuá. ʻE lava ke ke ako mei he ʻOtuá ʻa e potó mo e ʻofá ke ke maʻu ai ʻa e vahaʻangatae lelei mo e niʻihi kehé. ʻE lava ke ke ako meiate ia ʻo fekauʻaki mo e taumuʻa ʻo e moʻuí, pea ʻe lava ke ke mahinoʻi ai ʻa e ngaahi talaʻofa ʻa e ʻOtuá pea maʻu ha ʻamanaki ki he kahaʻú. ʻE ʻikai ʻaupito te ke fakaʻiseʻisa he kumi ki he lotu moʻoní!

[Fakatātā ʻi he peesi 5]

ʻI he lotolotonga ʻo e ngaahi tohi fakalotu motuʻá, ko e Tohi Tapú pē ʻokú ne fakahaaʻi ʻa e ʻofa ʻa e ʻOtuá

[Fakatātā ʻi he peesi 7]

ʻOku ala fakatokangaʻi ʻa e kau Kalisitiane moʻoní koeʻuhi ko ʻenau ngāueʻaki ʻa e ʻofá