Ko ha Vakai Ofi Ange ki he Ngaahi Talatupuʻa Fekauʻaki mo e Maté

ʻI HE kotoa ʻo e hisitōliá, kuo puputuʻu mo manavahē ai ʻa e tangatá ʻi he ʻamanaki fakapōpōʻuli ki he maté. ʻIkai ko ia pē, ko e manavahē ki he maté kuo tafunaki ia ʻe ha tuifio ʻo e ngaahi fakakaukau fakalotu loí, ngaahi anga fakafonua manakoá, mo e ngaahi tui fakafoʻituitui kuo tongi loloto. Ko e palopalema ʻi he manavahē ki he maté ko e malava ko ia ke ne fakangata ʻa ʻete malava ke fiefia ʻi he moʻuí pea toʻo ʻa ʻete falala ʻoku ʻi ai ha ʻuhinga ʻo e moʻuí.

Ko e lotu tukufakaholó ʻoku tautefito ʻa hono fakaangaʻi ki hono ʻohake ʻo e ngaahi talatupuʻa manakoa fekauʻaki mo e maté. ʻI hono sivisiviʻi ha niʻihi siʻi ʻo e ngaahi meʻá ʻi he tokoni ʻa e moʻoni faka-Tohitapú, sio angé pe ʻe lava ke māʻalaʻala ai ʻa hoʻo ngaahi tui fakafoʻituitui fekauʻaki mo e maté.

Talatupuʻa 1: Ko e maté ʻa e ngataʻanga fakanatula ʻo e moʻuí.

“Ko e maté . . . ko ha konga tefito ia ʻo ʻetau moʻuí,” ko e lau ia ʻa e tohi ko e Death​—The Final Stage of Growth. Ko e ngaahi fakamatala hangē ko ení ʻoku tapua mei ai ʻa e tui ko e maté ʻoku fakanatula pē, ko e ngataʻanga fakanatula ia ʻo e meʻamoʻui kotoa pē. Ko hono olá, ko ha tui pehē kuó ne ohi ha filōsofia fakaefakaʻauha mo ha tōʻonga fakasio-faingamālie ʻi he tokolahi.

Ka ko e moʻoni ko e maté ʻa e ngataʻanga fakanatula ʻo e moʻuí? ʻOku ʻikai ke tui pehē ʻa e kotoa ʻo e kau fakatotoló. Hangē ko ení, ko Calvin Harley, ko ha faipaiolosī ʻokú ne ako ki he hoholo ʻa e tangatá ke motuʻá, naʻá ne pehē ʻi ha fakaʻekeʻeke ʻoku ʻikai te ne tui ia ko e tangatá “kuo fakapolokalamaʻi ia ke mate.” Ko e faisaienisi ki he sisitemi maluʻí ko William Clark naʻá ne pehē: “Ko e maté ʻoku ʻikai pau ke hoko ia ko ha konga ʻo e ʻuhinga ʻo e moʻuí.” Pea ko Seymour Benzer ʻo e Akoʻanga Tekinolosia ʻa Kalefōniá, ʻokú ne pehē “ʻe lava ke fakamatalaʻi lelei ange ʻa e hoholo ke motuʻá ʻo ʻikai ʻi he tuʻunga ko ha uasi ka ko e hokohoko ʻo e ngaahi meʻá, ʻa ia ʻoku lava ke tau ʻamanaki atu ke liliu.”

ʻI he taimi ʻoku ako ai ʻe he kau faisaienisí ʻa e faʻu ʻo e tangatá, ʻoku nau puputuʻu. ʻOku nau ʻiloʻi ai kuo tuku mai kia kitautolu ʻa e koloa mo e malava ʻa ia ʻokú ne lakasi mamaʻo ʻe ia ʻa e ngaahi fiemaʻu ʻi he vahaʻa taimi taʻu ʻe 70 ki he 80 ʻo ʻetau moʻuí. Ko e fakatātaá, kuo ʻiloʻi ʻe he kau saienisí ʻoku maʻu ʻe he ʻuto fakaetangatá ha malava fakaemanatu lahi fakaʻulia. Naʻe fakafuofua ʻe he tokotaha fakatotolo ʻe taha ʻoku lava ke puke ʻe hotau foʻi ʻutó ha fakamatala “te ne fakafonu ai ha ngaahi voliume nai ʻe ua noa miliona, ʻo lahi tatau ia mo e meʻa ʻoku ʻi he ngaahi laipeli lalahi taha ʻi he māmaní.” ʻOku tui ʻa e kau faisaienisi niuloni ʻe niʻihi ʻi he lolotonga ʻo ha vahaʻa taimi ʻoku fakaʻavalisi ki ai ʻa e moʻuí, ʻoku ngāueʻaki ai ʻe ha tokotaha ʻa e 1/100 pē ʻo e peseti ʻe 1 (.0001) ʻo e tuʻunga malava ʻo hono ʻutó. ʻOku feʻungamālie ai ke ʻeke, ‘Ko e hā ʻoku tau maʻu ai ha foʻi ʻuto fakataha mo ha malava lahi pehē lolotonga iá ʻoku tau ngāueʻaki pē ha kiʻi falakiseni valevale ʻo ia ʻi he vahaʻa taimi ʻoku fakaʻavalisi ki ai ʻa e moʻuí?’

Toe fakakaukau ki he anga ʻo e taʻefakanatula ʻa e tali ʻa e tangatá ki he maté! Ki he tokolahi tahá, ko e mate ʻa ha uaifi, ko ha husepāniti, pe ko ha kiʻi tama ʻe lava ke hoko ko e meʻa fakalotomamahi taha ia ʻoku hoko ʻi he moʻuí. Ko e faʻunga fakaeongo fakakātoa ʻa e kakaí ʻoku faʻa uesia ia ʻi ha taimi lōloa ʻi he hili ha mate ʻa ha tokotaha ne ʻofeina lahi. Naʻa mo e faʻahinga ʻoku nau taukaveʻi ʻoku fakanatula ʻa e maté ki he tangatá ʻoku faingataʻa ke nau tali ʻa e fakakaukau, ko ʻenau maté tonu ʻe ʻuhinga ia ko e ngataʻanga ʻo e meʻa kotoa pē. Ko e British Medical Journal naʻe lau ai fekauʻaki mo “ha fakamahalo fakaemataotao anga-maheni, ʻoku loto ʻa e tokotaha kotoa pē ke moʻui ʻi he lōloa taha ʻe ala lavá.”

ʻI he vakai atu ki he tali fakalūkufua ʻa e tangatá ki he maté, ko ʻene malava fakaofo ke manatu mo akó, mo ʻene fakaʻamu ʻi loto ki ʻitānití, ʻikai ʻoku hā mahino naʻe ngaohi iá ke moʻui? Ko e moʻoni, naʻe fakatupu ʻe he ʻOtuá ʻa e tangatá, ʻo ʻikai ko e maté ʻa e ikuʻanga fakanatulá, kae fakataha mo e ʻamanaki ke hokohoko atu ʻa e moʻuí ʻo taʻengata. Fakatokangaʻi ʻa e meʻa naʻe fokotuʻu ʻe he ʻOtuá ki he ʻuluaki ongo meʻa fakaetangatá ko hona kahaʻú: “Mo fakatupu, mo fakatokolahi, mo fakafonu ʻa mamani, pea ikuna ia: pea mo pule ki he ika ʻo e tahi, mo e manupuna ʻo e langi, pea mo e meʻa moʻui kotoa pe ʻoku totolo ʻi he fonua.” (Senesi 1:28) Ko ha kahaʻu fakaofo mo tuʻuloa moʻoni ē ko ia!

Talatupuʻa 2: ʻOku ʻave ʻe he ʻOtuá ʻa e kakaí ʻi he maté ke nau fakataha mo ia.

Ko ha faʻē taʻu 27 ʻa ia naʻe tuʻunuku ki he maté pea tuku mai ha fānau ʻe toko tolu naʻá ne tala ange ki ha tāupoʻou Katolika: “ʻOua te ke haʻu ʻo tala mai kiate au ko e finangalo eni ʻo e ʻOtuá kiate aú. . . . ʻOku ou fehiʻa ʻaupito ʻi he tala mai ʻe ha taha kehe kiate au ʻa e meʻá ni.” Neongo ia, ko e meʻa eni ʻoku akoʻi ʻe he ngaahi lotu lahi fekauʻaki mo e maté​—ʻoku ʻave ʻe he ʻOtuá ʻa e kakaí ke nau ofi ange kiate ia.

ʻOku mātuʻaki anga-fakamamahi moʻoni ʻa e Tokotaha-Fakatupú ʻo ne taaʻi taʻeongoʻi kitautolu ʻaki ʻa e maté, ʻi he ʻafioʻi ʻoku fakalotomamahiʻi kitautolu ʻe he meʻá ni? ʻIkai, ʻoku ʻikai pehē ʻa e ʻOtua ʻo e Tohitapú. Fakatatau ki he 1 Sione 4:​8, “ko e ʻOtua ko e ʻOfa.” Fakatokangaʻi ʻoku ʻikai ke pehē ia ai ko e ʻOtuá ʻokú ne maʻu ʻa e ʻofá pe ko e ʻOtuá ʻoku ʻofa, ka ʻoku pehē ai ko e ʻOtuá ko e ʻofa. ʻOku mātuʻaki lahi, mātuʻaki moʻonia, mātuʻaki haohaoa ʻa e ʻofa ʻa e ʻOtuá, ʻo mātuʻaki hūhū fakaʻāuliliki ia ʻi hono ʻulungāngá mo ʻene ngaahi tōʻongá ʻo lava ai ke lea totonu ʻaki fekauʻaki mo ia ko e fakasino tonu ia ʻo e ʻofá. ʻOku ʻikai ko ha ʻOtua eni ʻokú ne ʻave ʻa e kakaí ʻi he maté ke nau hoko ai ʻo ofi kiate ia.

Kuo ʻai ʻe he lotu loí ʻa e tokolahi ke nau puputuʻu fekauʻaki mo e feituʻu pea mo e tuʻunga ʻo e kau maté. Ko hēvani, heli, pulekatolio, Limipō—ko eni mo e ngaahi feituʻu kehekehe ʻo ʻalu mei heʻene taʻealamahinoʻí ki he tuʻunga fakamanavahē ʻaupito. ʻI he tafaʻaki ʻe tahá, ko e Tohitapú ʻokú ne tala mai kia kitautolu ʻoku ʻikai ʻilo ha meʻa ʻe he maté; ʻoku nau ʻi ha tuʻunga ʻoku meimei tatau ʻaupito mo e mohé. (Koheleti 9:​5, 10; Sione 11:​11-​14) Ko ia ai, ʻoku fiemaʻu ke ʻoua te tau hohaʻa fekauʻaki mo e meʻa ʻoku hoko kia kitautolu ʻi he hili ʻa e maté, ʻo hangē pē ko e ʻikai haʻatau hohaʻa ʻi heʻetau sio ki ha taha ʻoku mohe maʻu. Naʻe lea ʻa Sīsū fekauʻaki mo e taimi ʻa ia ko e “kakai kotoa pe ʻoku ʻi he ngaahi faʻitoka” te nau “ʻalu atu” ki ha moʻui foʻou ʻi ha māmani palataisi.​—Sione 5:​28, 29; Luke 23:43.

Talatupuʻa 3: ʻOku ʻave ʻe he ʻOtuá ʻa e fanga kiʻi fānaú ke nau hoko ko e kau ʻāngelo.

Ko Elisabeth Kübler-Ross, ʻa ia naʻe ako ki he faʻahinga tāutaha ʻoku puke lahí, naʻá ne lave ki ha toe tui anga-maheni ʻe taha ʻi he lotolotonga ʻo e kakai lotú. ʻI hono fakahaaʻi ha meʻa moʻoni naʻe hoko, naʻá ne fakamatalaʻi ai ʻoku “taʻefakapotopoto ke tala ki ha kiʻi leka ne mole ʻa hono tuongaʻané, ʻoku ʻofaʻi lahi ʻe he ʻOtuá ʻa e fanga kiʻi tamaiki tangatá ʻo ne ʻave ai ʻa kiʻi Johnny ki hēvani.” Ko ha fakamatala pehē ʻoku ʻoatu ai ha vakai hala ki he ʻOtuá pea ʻoku ʻikai ke tapua atu ai ʻa hono ʻulungāngá mo hono angá. ʻOku hoko atu ʻa Dr. Kübler-Ross: “ʻI he taimi naʻe tupu hake ai ʻa e kiʻi taʻahine ko ení ʻo hoko ko ha fefiné naʻe ʻikai ʻaupito te ne maʻu ha fakaleleiʻanga ki heʻene ʻita ki he ʻOtuá, ʻa ia ne iku ai ki ha mahaki ʻāvanga fua ʻi he mole ʻa ʻene kiʻi tamasiʻí tonu ʻi he hongofuluʻi taʻu ʻe tolu ki mui ai.”

Ko e hā ke ʻave ai ʻe he ʻOtuá ha kiʻi leka ke maʻu ai ha ʻāngelo ʻe taha—ʻo hangē ia kuo fiemaʻu ʻe he ʻOtuá ha kiʻi leka ʻo lahi ange ia ʻi he fiemaʻu ʻa e ongo mātuʻa ʻa e kiʻi leká? Kapau naʻe moʻoni ʻoku ʻave ʻe he ʻOtuá ʻa e fānaú, ʻikai ʻe ʻai ʻe he meʻa ko iá ia ke hoko ko ha Tokotaha-Fakatupu taʻeʻofa mo siokita? ʻI he kehe mei he tui peheé, ʻoku pehē ʻe he Tohitapú: “Ko ʻofa ko e tupu mei he ʻOtua.” (1 Sione 4:7) ʻE fakatupunga ʻe ha ʻOtua ʻofa ha mole ʻa ia naʻa mo e faʻahinga ʻo e tangata ʻoku ʻi ha tuʻunga tāú ʻe ʻikai te nau makātakiʻi ia?

Ko ia ko e hā ʻoku mate ai ʻa e fānaú? Ko e konga ʻo e tali ʻa e Tohitapú ʻoku hiki ia ʻi he Koheleti 9:​11: “ʻOku hokonoa ki he faʻahinga kotoa pe ʻa e faingamalie mo e tuʻutamaki.” Pea ʻoku tala mai kia kitautolu ʻe he Sāme 51:5 ko kitautolu kotoa ʻoku tau taʻehaohaoa, ʻo angahalaʻia mei he taimi ʻo hotau feitamaʻí, pea ko e ikuʻanga leva ki he tangatá kotoa ko e mate ʻi he ngaahi tupuʻanga kehekehe. ʻI he taimi ʻe niʻihi ʻoku hoko ʻa e maté ia ki muʻa ʻi hono fanauʻí, ʻo iku ai ki he fāʻeleʻi mai kuo mate. ʻI he ngaahi tuʻunga kehe, ʻoku mate ai ʻa e fānaú koeʻuhi ko ha ngaahi tuʻunga fakamamahi pe ko e hoko ha ngaahi fakatuʻutāmaki pea nau mate ai. ʻOku ʻikai ke kaunga ʻa e ʻOtuá ki he ngaahi ikuʻanga peheé.

Talatupuʻa 4: ʻOku fakamamahiʻi ʻa e kakai ʻe niʻihi ʻi he hili ʻa e maté.

ʻOku akoʻi ʻe he ngaahi lotu lahi ʻe ʻalu ʻa e fulikivanú ki ha afi ko heli pea fakamamahiʻi taʻengata ai. ʻOku totonu mo Fakatohitapu ʻa e akonaki ko ení? Ko e vahaʻa taimi ʻo e moʻui fakaetangatá ʻoku fakangatangata pē ki he taʻu ʻe 70 pe 80. Neongo kapau kuo halaia ha taha koeʻuhi ko ha fulikivanu lahi ʻi he kotoa ʻo ʻene moʻuí, ʻe hoko ʻa e fakamamahi taʻengatá ko ha tautea totonu ia? ʻIkai. ʻE hoko ko ha fakamaau taʻetotonu fakaʻaufuli ke fakamamahiʻi taʻengata ha tangata ki he ngaahi angahala naʻá ne fai ʻi ha taimi nounou ʻo ʻene moʻuí.

Ko e ʻOtuá pē ʻe lava ke ne fakahaaʻi ʻa e meʻa ʻoku hoko hili e mate ʻa e kakaí, pea kuó ne fai ia ʻi heʻene Folofola kuo tohí, ko e Tohitapú. Ko e meʻa eni ʻoku leaʻaki ʻe he Tohitapú: “Hange ko e mate [ʻa e manú] ʻoku pehe ʻa e mate [ʻa e tangatá]; pea ko e moʻui pe taha ʻoku ʻiate kinautolu kotoa; . . . ʻOku ʻalu kotoa ki ha potu pe taha; ʻoku mei he efu kotoa pe, pea ʻoku foki kotoa pe ki he efu.” (Koheleti 3:​19, 20) ʻOku ʻikai ha lave heni ki ha afi ko heli. ʻOku foki ʻa e tangatá ki he efú—ki he ʻikai ke ʻi ai—ʻi heʻenau maté.

Ke hoko ʻo fakamamahiʻi, kuo pau ke ʻilo ki ai ʻa e tokotahá. ʻOku ʻilo ha meʻa ʻe he maté? ʻOku toe ʻomai ʻe he Tohitapú ʻa e talí: “He ko e kau moʻui ʻoku nau ʻilo ai pe te nau pekia; ka ko e kau pekia ʻoku ʻikai te nau ʻilo ha momoʻi meʻa, pea ʻoku ʻikai te nau kei sio totongi: he kuo mole ʻa e manatu kiate kinautolu.” (Koheleti 9:5) ʻOku ʻikai malava ki he kau maté, ʻa ia ʻoku “ʻikai te nau ʻilo ha momoʻi meʻa,” ke nau hokosia ha langa lahi ʻi ha feituʻu.

Talatupuʻa 5: ʻOku ʻuhinga ʻa e maté ko e ngataʻanga tuʻuloa ia ʻo ʻetau ʻi aí.

ʻOku ngata ʻetau ʻi aí ʻi he taimi ʻoku tau mate aí, ka ʻoku ʻikai ʻuhinga eni ia ʻoku ngata moʻoni ai ʻa e meʻa kotoa pē. Naʻe ʻiloʻi ʻe he tangata loto-tōnunga ko Siopé te ne ʻalu ki he faʻitoká, ʻa Seoli ʻi he taimi te ne mate aí. Kae fanongo ki heʻene lotu ki he ʻOtuá: “Taumaiā ke ke faʻo au ʻi Hetesi [“Seoli,” NW]! ʻO ke fufū au kaeʻoua ke lolou hoʻo houhau na! ʻO ke tuʻutuʻuni haku taimi, pea toki manatu mai! Ka pekia ha tangata, te ne toe moʻui koa? . . . Te ke toki ui, pea te u tali atu ʻe au.”​—Siope 14:​13-​15.

Naʻe tui ʻa Siope kapau te ne loto-tōnunga ʻo aʻu ki he maté, ʻe manatuʻi ia ʻe he ʻOtuá pea ʻe faai atu ʻo fokotuʻu ia. Ko e tui eni ʻa e kau sevāniti kotoa ʻa e ʻOtuá ʻi he kuonga muʻá. Ko Sīsū tonu naʻá ne fakapapauʻi ʻa e ʻamanaki ko ení pea fakahaaʻi ʻe ngāueʻaki ia ʻe he ʻOtuá ke ne fokotuʻu hake ʻa e maté. Ko e ngaahi lea tonu ʻa Kalaisí ʻoku ʻomai ai kia kitautolu ʻa e fakapapau ko ení: “ʻOku ʻunu mai ha taimi, ʻa ia ʻe fanongo ai ki hono leʻo [ʻo Sīsuú] ʻe he kakai kotoa pe ʻoku ʻi he ngaahi faʻitoka, pea te nau ʻalu atu mei ai; ko kinautolu naʻe ngaue lelei, ki he toetuʻu ke moʻui, ko kinautolu naʻe fai kovi, ki he toetuʻu ke fakamāu.”​—Sione 5:​28, 29.

Kuo vavé ni ʻaupito ke toʻo ʻe he ʻOtuá ʻa e fulikivanu kotoa pea fokotuʻu ha māmani foʻou ʻi he malumalu ʻo e tuʻunga-pule fakahēvaní. (Sāme 37:​10, 11; Taniela 2:​44; Fakahā 16:​14, 16) Ko e olá ʻe ʻi ai ha palataisi ʻi he māmaní kotoa, ʻo nofoʻi ʻe he kakai ʻoku nau tauhi ki he ʻOtuá. ʻI he Tohitapú ʻoku tau lau ai: “Pea ongo mai ha fuʻu leʻo mei he taloni, ʻoku ne pehē, Ko eni, ko e tapanekale ʻo e ʻOtua, ʻoku tuʻu mo e kakai. Pea ʻe nofo hono Sikaina mo kinautolu, pea te nau nofo ko hono kakai; pea ʻe nofo ʻe he ʻEne ʻAfio, ko e ʻOtua ʻoku kau maʻanautolu, ʻio, ko honau ʻOtua. Pea te ne holoholo ʻa e loʻimata kotoa pē mei honau mata; pea ʻe ʻikai toe ai ha mate, pea ʻe ʻikai toe ai ha mamahi, pe ha tangi, pe ha ongosia; kuo mole ʻa e ngaahi meʻa muʻa.”​—Fakahā 21:​3, 4.

ʻAtā mei he Manavaheé

Ko e ʻilo fekauʻaki mo e ʻamanaki ʻo e toetuʻú fakataha mo e ʻiloʻi ʻo e Tokotaha ʻa ia ko e matavai ʻo e tokonaki ko iá ʻe lava ke ne fakafiemālieʻi koe. Naʻe talaʻofa ʻa Sīsū: “ʻE faifai pea mahino kiate kimoutolu ʻa e moʻoni, pea ʻe fakatauʻatāina ʻa kimoutolu ʻe he moʻoni.” (Sione 8:​32) ʻOku kau ai ʻa e fakaʻatā kitautolu mei he manavahē ki he maté. Ko Sihova pē ʻa e toko taha ʻe lava moʻoni ke ne liliu ʻa e tuʻunga ʻo e hoholo ke motuʻá pea mo e maté pea ʻomai kia kitautolu ʻa e moʻui taʻengatá. ʻE lava ke ke tui ki he ngaahi talaʻofa ʻa e ʻOtuá? ʻIo, ʻe lava koeʻuhí ʻoku hoko maʻu pē ʻa e Folofola ʻa e ʻOtuá. (Aisea 55:11) ʻOku mau fakalotolahiʻi koe ke ako lahi ange fekauʻaki mo e ngaahi taumuʻa ʻa e ʻOtuá ki he faʻahinga ʻo e tangatá. ʻE fiefia ʻa e Kau Fakamoʻoni ʻa Sihová ke tokoniʻi koe.

[Fakamatala ʻi he peesi 6]

Ko e palopalema ʻi he manavahē ki he maté he ʻe lava ke ne taʻofi ʻa ʻete malava ke fiefia ʻi he moʻuí

[Saati ʻi he peesi 7]

[Fakatātā ʻi he peesi 8]

Ko hono ʻiloʻi ʻa e moʻoni fekauʻaki mo e maté ʻokú ne fakaʻatā kitautolu mei he manavaheé

[Maʻuʻanga ʻo e Tā ʻi he peesi 5]

Kau fakatau tuʻunga​—Giampolo/The Doré Illustrations For Dante’s Divine Comedy/Dover Publications Inc.