Ko e Moʻoni Fekauʻaki mo ʻĀmaketoné

“Ko e ngaahi laumalie ʻo e fanga tevolo . . . ʻoku nau ʻalu atu ki he ngaahi tuʻi ʻo mamani kātoa, . . . pea naʻa ne fakataha kinautolu ki he potu ʻoku ui ʻi he lea faka-Hepelu ko Hamaketone.”—FAKAHĀ 16:14, 16, Paaki Foʻou.

KO E ʻĀmaketoné, ʻa ia ʻoku liliu ʻi he taimi ʻe niʻihi ko e “Hāmaketone,” ko e hingoa ia ʻo ha feituʻu. Kae kehe, ko e feituʻu ko iá, ʻoku hā ngali naʻe ʻikai ke ʻi ai ha feituʻu pehē ia ʻi he māmaní.

Ko e hā leva ʻa e ʻuhinga moʻoni ʻo e foʻi lea “ʻĀmaketone”? Ko e hā ʻoku faʻa fakafekauʻaki ai ia mo ha meʻa ʻoku hoko, ʻo hangē ko ha tau?

Fakatahataha ʻi he Feituʻu ʻOku Ui ko ʻĀmaketone

Ko e muʻaki foʻi lea faka-Hepelū ko e Har-Magedon ʻoku ʻuhinga fakafoʻileá ko e “Moʻunga ʻo Mekito.” Neongo ʻoku ʻikai ke ʻi ai ha moʻunga pehē, ʻoku ʻi ai ha feituʻu ʻoku ʻiloa ko Mekito. ʻOku tuʻu lelei ia ʻi ha fetaulakiʻanga ʻo ha ongo hala lalahi ʻi he tokelau hihifo ʻo e feituʻu ko ia naʻe nofoʻi ʻe he puleʻanga ʻo ʻIsileli ʻo e kuonga muʻá. Ko ha ngaahi tau lahi ʻa ia naʻe taʻetoeveiveiua ʻa hono olá naʻe fakahoko ia ʻo ofi ʻi he feituʻu ko iá. Ko ia ai, naʻe hoko leva ʻa e hingoa Mekitó ʻo fakafekauʻaki mo e taú.a

Kae kehe, ko e ʻuhinga moʻoni ʻo e Mekitó, ʻoku ʻikai ko e ʻuhinga ia pe ko e hā ʻa e ngaahi tau naʻe fai aí, ka ki he ʻuhinga naʻe fai ai ʻa e ngaahi tau ko iá. Ko Mekitó ko e konga ia ʻo e Fonua ʻo e Talaʻofá naʻe ʻoange ʻe he ʻOtua ko Sihová ki he kau ʻIsilelí. (ʻEkisoto 33:1; Siosiua 12:7, 21) Naʻá ne fuakava ki he kakai ko iá te ne maluʻi kinautolu mei he faʻahinga te nau ʻohofi kinautolú, pea naʻá ne fakahoko ia. (Teutalōnome 6:18, 19) Ko e fakatātaá, ko Mekito naʻe maluʻi fakaemana ai ʻe Sihova ʻa e kau ʻIsilelí mei he kau tau fakatūʻuta ʻa Tuʻi Siapini ʻo Kēnaní pea mo ʻene ʻeikitau ko Sīselá.—Fakamaau 4:14-16.

Ko ia ai, ko e foʻi lea “Hāmaketone,” pe “ʻĀmaketone,” ʻoku ʻi ai hono ʻuhinga mahuʻinga fakaefakatātā. ʻOku fekauʻaki ia mo ha fepaki, ʻa ia ʻoku fetaulaki ai ha ongo ivi mālohi ʻe ua.

Ko e kikite ʻi he tohi Fakahaá ʻoku fakamatala ai ki ha taimi ʻi he kahaʻu ofi maí ʻa ia ʻe ueʻi ai ʻe Sētane mo e fanga tēmenioó ʻa e ngaahi puleʻanga fakaetangatá ke nau fakatahatahaʻi ʻa ʻenau kau taú, ʻo ʻoatu ai ha pole fakafetau ki he kakai ʻa e ʻOtuá mo ʻenau ngāué. Ko e ʻohofí ni ʻe iku ai ki he mate ʻa e kakai ʻe laui miliona ʻi hono ikunaʻi ʻe he ʻOtuá ʻa e kau fakatūʻutá.—Fakahā 19:11-18.

Ko e hā ʻe fakatupunga ai ʻe he ʻOtuá, ʻa ia ʻoku fakamatalaʻi ʻe he Tohi Tapú ʻoku “ʻAloʻofa, Tuai-ki-he-houhau, pea Fonu-ʻi-he-kelesi,” ʻa e mate ʻa ha fuʻu tokolahi ʻo e faʻahinga ʻo e tangatá? (Nehemaia 9:17) Ke mahinoʻi ʻa e ngaahi ngāue ʻa e ʻOtuá, ʻoku fiemaʻu ke tau tali ha fehuʻi ʻe tolu: (1) Ko hai ʻokú ne kamataʻi ʻa e taú? (2) Ko e hā ʻoku kau ai ki ai ʻa e ʻOtuá? (3) Ko e hā ʻa e ola tuʻuloa ʻe hoko ʻi he fepaki ko ení ki he māmaní pea mo e faʻahinga ʻoku nofo aí?

1. KO HAI ʻOKÚ NE KAMATAʻI ʻA E TAÚ?

Ko e tau ʻo ʻĀmaketoné ʻoku ʻikai ko ha ngāue fakaaoao ia ʻa e ʻOtuá. ʻI hono kehé, ʻe maluʻi ʻe he ʻOtuá ʻa e kakai leleí mei he faʻahinga te nau laiki kinautolú. Ko e kau fakaaoao ʻi he fepaki ko ení ko e “ngaahi tuʻi ʻo e kotoa ʻo e māmani kuo nofoʻí,” ʻa ia ko e kau taki ia ʻo e māmaní. Ko e hā ʻoku nau fai ai ʻa e ʻohofí? Koeʻuhí, ʻi he hangē ha pule faitākiekiná, ʻe filioʻi holo ʻe Sētane ʻa e ngaahi fakafofonga fakapuleʻangá mo fakakautaú ke nau ʻohofi ʻaki honau kotoá ʻa e faʻahinga ʻoku lotu ki he ʻOtua ko Sihová.—Fakahā 16:13, 14; 19:17, 18.

ʻI he vakai atu ki hono fakamamafaʻi ʻa e tauʻatāina ʻo e leá mo e lotú ʻi he ngaahi fonua ʻe niʻihi he ʻaho ní, ko e foʻi fakakaukau ko ia ʻe taʻofi ʻe he ngaahi puleʻangá pea naʻa mo haʻanau feinga ke fakaʻauha ha faʻahinga kulupu fakalotu pē ʻe hā ngali taumamaʻo ia. Kae kehe, ko e ngaahi ʻohofi peheé naʻe hoko ia lolotonga ʻa e senituli hono 20 pea ʻoku lolotonga hoko ia.b Naʻa mo e meʻá ni, ʻoku ʻi ai ha ongo faikehekehe lalahi ʻe ua ʻi he vahaʻa ʻo e ngaahi ʻohofi ki muʻá pea mo e taha ko ia ʻoku felāveʻi mo ʻĀmaketoné. ʻUluakí, ko e lahi ʻo e ʻohofí ʻe fakaemāmani lahi. Uá, ko e fakafeangai ʻe fai ʻe Sihova ko e ʻOtuá ʻe lahi mamaʻo ange ia ʻi ha fakafeangai pē kuó ne fai ʻi he kuohilí. (Selemaia 25:32, 33) ʻOku fakamatalaʻi ʻe he Tohi Tapú ʻa e fepaki ko ení ko e “tau ʻo e ʻaho lahi ʻo e ʻOtuá ko e Māfimafi-Aoniú.”

2. KO E HĀ ʻOKU KAU AI KI AI ʻA E ʻOTUÁ?

ʻOku akoʻi ʻe Sihova ʻa e faʻahinga ʻoku lotu ange kiate iá ke nau nofo melino pea ke ʻofa ki honau ngaahi filí. (Maika 4:1-3; Mātiu 5:43, 44; 26:52) Ko ia ʻe ʻikai te nau toʻo meʻatau ke maluʻi kinautolu ʻi he taimi ʻe hoko mai ai ʻa e ʻohofi anga-kakaha ko ení. Kapau ʻe ʻikai kau mai ʻa e ʻOtuá ke fakahaofi ʻa hono kakaí, ʻe tafiʻi atu kinautolu. Ko ia ai, ko e huafa pe ongoongo ʻo Sihova ko e ʻOtuá ʻe ʻi he tuʻunga fakatuʻutāmaki. Kapau ʻe malava ʻa e kau fakaaoaó ke fakaʻauha ʻa Hono kakaí, ʻe ʻai ai ʻa Sihova ke hā ngali ʻoku taʻeʻofa, faitaʻetotonu, pe ʻikai lava ke ne fai ha tokoni. Ko ha ola pehē ʻoku taʻemalava moʻoni ia!—Saame 37:28, 29.

ʻOku ʻikai finangalo ʻa e ʻOtuá ke fakaʻauha ha taha, ko ia ʻokú ne ʻoatu ha fakatokanga totonu ki he meʻa te ne faí. (2 Pita 3:9) Fakafou ʻi he ngaahi fakamatala ʻoku fakatolonga ʻi he Tohi Tapú, ʻokú ne fakamanatu ki he tokotaha kotoa, ʻi he kuohilí naʻá ne faisāuni ai ʻi he taimi naʻe ʻohofi ai ʻa hono kakaí. (2 Tuʻi 19:35) ʻOku toe fakatokanga mai ʻa e Tohi Tapú, ʻi he kahaʻú ʻi he taimi ʻe ʻohofi ai ʻe Sētane mo e faʻahinga ko ia ʻo e tangatá ʻokú ne tākiekina holó ʻa e kakai ʻa e ʻOtuá, ʻe toe kau mai ʻa Sihova ʻo ne ngāueʻaki ʻa hono mālohí ke fakafepakiʻi ʻaki ʻa e faʻahinga ʻoku nau fakamanamanaʻi ʻa hono kakaí. Ko hono moʻoní, naʻe tomuʻa tala fuoloa ʻe he Folofola ʻa e ʻOtuá ʻe fakaʻauha ʻe Sihova ʻa e fulikivanú. (Palōveepi 2:21, 22; 2 Tesalonaika 1:6-9) ʻI he taimi ko iá, ʻe ʻikai ha toe filingaua ʻi he ʻatamai ʻo e kau ʻohofí ko ʻenau faitaú naʻe fai ia mo e Māfimafi-Aoniú tonu.—ʻIsikeli 38:21-23.

3. KO E HĀ ʻA E OLA TUʻULOA ʻE HOKO ʻI HE FEPAKI KO ENÍ?

Ko e ola ʻo e tau ʻo ʻĀmaketoné ʻe fakahaofi ai ʻa e moʻui ʻe laui miliona. Ko hono moʻoní, ko ha talateu atu ia ki ha vahaʻa taimi ʻo e melino ʻi he māmaní.—Fakahā 21:3, 4.

ʻOku fakamatala ʻa e tohi ʻa Fakahaá ʻo fekauʻaki mo ha “fuʻu kakai lahi” ʻoku ʻikai lava ke lau ʻa ia te nau hao moʻui atu ʻi he fepaki ko ení. (Fakahā 7:9, 14) ʻI he malumalu ʻo e tataki ʻa e ʻOtuá, ʻe tokoni ʻa e faʻahingá ni ke toe fakafoki ʻa e foʻi māmaní ki he ngaahi tuʻunga ʻo e Palataisí naʻe muʻaki fakataumuʻa ki ai ʻe Sihová.

ʻOku tau ʻiloʻi pe ʻe hoko mai ʻafē ʻa hono ʻohofi ko eni ʻa e kakai ʻa e ʻOtuá?

[Fakamatala ʻi lalo]

[Fakatātā ʻi he peesi 6]

Kuo maluʻi ʻe Sihova ko e ʻOtuá ʻa hono kakaí ʻi he kuohilí

[Fakatātā ʻi he peesi 7]

ʻE toe maluʻi ʻe Sihova ʻa hono kakaí, lolotonga ʻa e tau ʻo ʻĀmaketoné