ʻE Liliu Hoʻomou Ngaahi Taimi ki he Fakatahá?

ʻI ha ngaahi tuʻunga ko e ngaahi fakatahaʻanga ʻe niʻihi ʻoku nau ngāueʻaki pē ʻa e Kingdom Hall tataú kuo nau loto-lelei ke feʻunuaki pe fai ha fakatonutonu ki he ngaahi taimi ʻoku fai ai ʻa e fakatahá, ʻoku totonu ke fai leva ia ʻi he kamataʻanga pē ʻo Sanualí. Ko ha loto-lelei ke fengāueʻaki fakataha mo e fokotuʻutuʻu kuo fokotuʻú ʻoku fakahaaʻi ai ʻa e ʻofa mo e fakaʻatuʻi. ʻOku faʻa hoko ʻa e liliu ʻi he ngaahi taimi ki he fakatahá ke fakafaingamālieʻi taautaha ai koe, ʻo ʻai ai ʻa e maʻu fakatahá ke faingamālie ange.

ʻI he tafaʻaki ʻe tahá, ko e liliu ʻoku hoko ʻi he taʻu ní ʻe ʻikai nai ke feʻungamālie ia mo hoʻo taimi-tēpile ngāué. ʻE fiemaʻu ha feʻunuaki ʻi hoʻo founga anga-mahení ʻa ia ʻe ʻikai nai ke fuʻu feʻunga. ʻI he loto-lelei ʻa e tokotaha kotoa pē ke fengāueʻakí ʻoku fakahaaʻi ai ʻa e houngaʻia ki he fokotuʻutuʻú kotoa, ʻa ia ʻoku hoko ai ʻa e ʻaonga fakalūkufua kiate kinautolu kotoa ʻoku kau ki aí.

Ko ia, ko e feʻunuaki hono hoko ʻo e ngaahi taimi ki he fakatahá ʻe lahi ange nai ʻa ʻene meimei tatau mo hoʻo manakó. ʻI he taimi tatau pē, ʻoku fakalototoʻaʻi koe ke ke fai ha fakatonutonu ki he fiemaʻu fakafoʻituituí koeʻuhi ka ke maʻu maʻu pē ʻa e ngaahi fakataha fakauiké ʻo fakatatau ki he taimi-tēpile kuo ʻosi fakapapauʻi ʻe he fakatahaʻangá. Feinga ke manatuʻi ʻa e anga ʻo e vakai ʻa e tangata tohi sāme ko Tēvitá, ʻa ia naʻá ne fakahā: “Ne u fiefia ʻi heʻenau pehe kia kita, “Tau o ki he fale ʻo Sihova.””​—Sāme 122:1.