Vahevahe mo e Niʻihi Kehé ʻo Fakatatau ki Heʻenau Ngaahi Fiemaʻú

¹ ʻOku fai ʻe Sihova ha tokonaki ke fakafoʻou ʻetau ngaahi fiemaʻu fakalaumālié ʻo fakafou mai ʻi he “tamaioeiki” anga-tonú. (Mt. 24:​45-​47, PM) Ko e lahi ʻo e ngaahi tokonakí ni ʻoku ʻi he ngaahi tohí, Tohitapú, ngaahi voliumé, ngaahi vitioó, kāsete hikí, mo e ngaahi tisiketi komipiuta ki he fekumi faka-Tohitapú. Ko e meʻa ʻoku tokonaki ʻe Sihová ʻoku feʻunga maʻu pē ʻo ʻikai ke maumauʻi noaʻia. ʻOkú ne ʻamanekina meiate kitautolu ke tau fevahevaheʻaki, ʻo fakapapauʻi ko e tokotaha kotoa pē ʻokú ne maʻu ʻa e ʻaonga tatau.

² Ko e kotoa ʻo e tokonaki peheé ʻoku ngaohi ia ʻi ha totongi fakaepaʻanga lahi ʻaupito. Ko e ngaahi fakamole ko ʻení ʻoku tokonaki mai ia ʻe he fetokouaʻaki ʻi māmani lahí. ʻOku tautefito ʻa ʻene moʻoni ʻení talu mei he kamata ʻo e fokotuʻutuʻu ʻa e kautahá ki hono tufaki taʻetotongi ʻa e ngaahi tohí, ʻo fakatuʻunga kakato ʻi he ngaahi tokoni loto-fiefoaki ke faiʻaki ʻa e fakamolé. Tānaki atu ki aí, ko e ngaahi vaʻa lahi ʻoku nau maʻu ʻa e ngaahi tokonakí ni mei he Sōsaietí ʻi ha totongi siʻisiʻi ʻa ia ʻe malava ai ki he ngaahi tokouá ke maʻu ʻa ia ʻoku nau fiemaʻu ki he ngaahi fakatahá pea mo e ngāue fakamalangá neongo ʻoku fakangatangata ʻa e ngaahi meʻa fakamatelie ʻoku nau maʻú.

³ Founga ʻe Lava ke Tau Tokoni Aí: ʻE lava ke tau fanongo ki he akonaki ʻa Paulá ke vahevahe mo e niʻihi kehé “fakatatau ki heʻenau ngaahi fiemaʻú.” (Loma 12:​13, NW) ʻI he taimi ʻoku tau fai ai ha tokoni fakapaʻanga ki he ngāue ʻi māmani lahí, ʻoku tau vahevahe fakahangatonu ai mo hotau ngaahi tokoua takatakai ʻi he māmaní. ʻI hono maʻu ʻa e fakakaukau ko ʻení, kuo fili ai ha niʻihi ke vaheʻi ha paʻanga feʻunga ke tokoni ki he ngāue ʻi māmani lahí he māhina taki taha, ʻo hangē ko ia ʻoku nau fai ki he ngaahi fakamole ʻa e Fale Fakatahaʻangá. ʻOku nau ʻiloʻi ko e ngaahi tokoni ko iá ʻoku ngāueʻaki ia ʻo ʻikai ki hono pulusi ʻo e ngaahi tohí pē ka ki he toe ngaahi tafaʻaki kotoa pē ʻo e ngāué. Fakaʻuta atu ki he ʻaonga lahi ʻo ʻetau fetokouaʻaki ʻi māmani lahí ʻe hoko kapau ʻe kau ʻa e tokolahi ange ki he foungá ni ʻi ha tuʻunga tuʻumaʻu.

⁴ ʻIkai ngata aí, ʻe lava ke tau vahevahe mo kinautolu ʻaki ʻa e ʻikai ke fuʻu hulu ʻi he taimi ʻoku tau kole ai ʻa e ngaahi meʻa ʻa ia ʻe ala maʻu maʻatautolú. Ko hono ʻota pē ʻa e meʻa ʻoku tau fiemaʻu paú ʻe fakaʻatā ai hotau ngaahi tokoua ʻi he feituʻu kehé ke maʻu ʻa e ngaahi tokonaki fakalaumālie ʻa ia ʻoku nau fiemaʻú foki ke tauhi ai ke mālohi pea mo laka ki muʻa hono malangaʻi ʻa e ongoongo leleí ʻi honau tafaʻaki ʻi he māmaní.​—Hep. 13:16.

⁵ ʻOku totonu ke tautefito ʻetau manatú ʻi he taimi ʻoku tau kole ai ʻa e ngaahi meʻa ʻoku ngaohi ʻi ha fakamole lahi ki ai ʻa e Sōsaietí. ʻOku kau heni ʻa e ngaahi vitiō, ngaahi CD-ROM, ngaahi tohi lalahí, ngaahi voliumé, pea mo e ngaahi tukuhau ki he kāseté. ʻI he ʻikai ke kole ha meʻa ʻe taha ki he mēmipa taki taha ʻi he ʻapí, ʻe lava ke ngāueʻaki ʻe he fāmilí fakakātoa ʻa e taha pē? Kapau ʻe fakangatangata ʻa e meʻa te tau ʻave maʻatautolú, ʻe fakaʻatā ai ʻa e niʻihi kehé ke maʻu ʻa e ngaahi meʻa lelei tatau mo ia ʻoku tau fiefia aí.​—Fili. 2:4.

⁶ Ko e totongi ʻo e ngaahi tohi ʻoku tau tufa ʻi he malaʻe malangá, ʻoku fakakakato nai ia ʻaki ʻa e ngaahi tokoni ki he ngāue ʻa e Sōsaietí ʻi māmani lahí ʻe kitautolu ʻi he Fale Fakatahaʻangá pea mo e faʻahinga mahuʻingaʻia ʻoku nau tali iá. Kae kehe, ʻi he fekauʻaki mo e ngaahi tohi ʻoku tau fiemaʻu ki heʻetau ngāueʻaki fakafoʻituituí, kau ai ʻa e ngaahi tohi hivá, ngaahi Yearbook, ngaahi Tohitapu takafi molū, pea mo e hā fua, ʻoku ʻikai te tau ʻamanekina ʻa e faʻahinga mei tuʻá ke nau tokangaʻi mai ʻetau ngaahi fiemaʻú. Ko e kau sevāniti fakatapui ʻa Sihová ko e ʻuluaki matavai ia ʻo e poupou fakapaʻanga ko ʻení. ʻI hono maʻu ʻa e fakakaukau ko iá, ʻoku fakafuofuaʻi nai ʻe he kau malanga tokolahi ʻa e totongi ʻo e ngaahi meʻá ni kapau naʻe ngaohi fakakomēsiale, pea te nau foaki leva ha meʻaʻofa ʻo fakatatau ki ai. Ko e fakatātaá, ko e Tohitapu tapa koula takafi moluú ʻe lava ke totongi $20 pe lahi ange, ko ha tohi maʻuʻanga fakamatala tatau ʻe $40 nai pe lahi ange, ko ha tohimāhina takafi fakalanu ʻe fakatau atu nai ia ʻo ʻikai toe siʻi hifo ʻi he $5, ko ha ʻenisaikolopētia ʻi he CD-ROM ko hono mahuʻingá ʻoku $50 ki he $100 pe lahi ange ai, ko e ngaahi fasi compact disc ʻoku ʻiloa hono totongí ʻoku ofi ʻi he $20, pea ko e ngaahi vitiō ʻe niʻihi ʻoku faʻa fakatau atu ia ʻo toe lahi ange. Ko ha ʻikai malava ke fai ha tokoni feʻunga ki he fua ʻo e fakamolé ʻe fakangatangata leva ai ʻa e meʻa naʻe mei malava ke fakahoko ʻe he kautahá ki hono fakalahi atu ʻa e ngāué ʻi māmani lahi.

⁷ Naʻe fakahā ʻe Sīsū ko ʻene kau ākonga moʻoní ʻe ʻilo fakapapau ia ʻi heʻenau feʻofaʻakí. (Sione 13:​34, 35) Ko ʻetau nima-homo ʻi he foaki fakamatelié, pea mo ʻetau taʻesiokita ʻi he fevahevaheʻaki mo e niʻihi kehé ʻo fakatatau ki heʻenau ngaahi fiemaʻú, ko ha ngaahi founga lelei moʻoni ia ke fakamoʻoniʻi ai kitautolu ko e kau Kalisitiane moʻoni.