Kau Saiāniti ʻi he Māmaní

ʻE FĒFĒ hoʻo fakakaukau ʻo kapau ʻe luelue hangatonu atu ha taha kiate koe pea ʻoku māʻolunga tatau ia mo e ʻaofi ho falé? ʻOku pau ko ha saiāniti ʻa e tokotaha ko iá! ʻI he taimi ʻe taha naʻe ʻi ai moʻoni ʻa e kau saiāniti ʻi he māmaní. ʻOku fakahā ʻe he Tohitapú ko ʻenau ngaahi tamaí ko e kau ʻāngelo mei hēvani. Ka naʻe malava fēfē ʻa e meʻá ni?

Manatuʻi, ko e ʻāngelo kovi ko Sētané naʻá ne femoʻuekina he fakatupu ʻa e faingataʻaʻiá. Naʻa mo e kau ʻāngelo ʻa e ʻOtuá naʻá ne feinga ke ʻai kinautolu ke nau faikovi. Faifai atu pea naʻe kamata ke fakaongo ha kau ʻāngelo ʻe niʻihi kia Sētane. Naʻa nau tuku leva ʻa e ngāue naʻe ʻoange ʻe he ʻOtuá ke nau fai ʻi hēvaní. Pea naʻa nau ʻalu hifo ki māmani ʻo ʻai ha sino fakaetangata kiate kinautolu. ʻOkú ke ʻiloʻi hono ʻuhinga naʻa nau fai pehē aí?

ʻOku pehē ʻe he Tohitapú naʻa nau fai ia koeʻuhi naʻe mamata ʻa e ngaahi foha ko ʻeni ʻo e ʻOtuá ki he kau fefine talavou ʻi he māmaní pea naʻa nau saiʻia ke nofo mo kinautolu. Ko ia naʻa nau haʻu ki māmani ʻo nau mali mo e kau fefiné ni. ʻOku fakahā ʻe he Tohitapú naʻe hala ʻa e meʻa ko ení, koeʻuhi he naʻe ngaohi ʻe he ʻOtuá ia ʻa e kau ʻāngeló ke nau nofo ʻi hēvani.

ʻI he taimi naʻe maʻu ai ʻe he kau ʻāngeló mo honau ngaahi uaifí ha ngaahi pēpē, naʻe kehe ʻa e ngaahi pēpē ko ʻení. Naʻe ʻikai te nau fuʻu hā kehe ʻi heʻenau kei pēpeé. Ka naʻa nau tupu ʻo lahi mo toe lahi ange, pea mālohi mo toe mālohi ange, pea aʻu ki he tuʻunga ko e kau saiāniti.

Naʻe kovi ʻa e kau saiāniti ko ʻení. Pea koeʻuhi ko ʻenau fuʻu lalahi mo mālohí, naʻa nau fakalaveaʻi ʻa e kakaí. Naʻa nau feinga ke fakamālohiʻi ʻa e tokotaha kotoa pē ke kovi ʻo hangē pē ko kinautolú.

Ne ʻosi mate ʻa ʻĪnoke, ka naʻe ʻi ai ʻa e tangata ʻe taha pē ʻi he māmaní he taimi ko iá naʻe lelei. Ko e hingoa ʻo e tangatá ni ko Noa. Naʻá ne fai maʻu pē ʻa e meʻa naʻe fiemaʻu ʻe he ʻOtuá ke ne faí.

ʻI ha ʻaho ʻe taha naʻe fakahā ʻe he ʻOtuá kia Noa kuo ofi ki he taimi te Ne fakaʻauha ai ʻa e kakai kovi kotoa pē. Ka ʻe fakahaofi ʻe he ʻOtuá ʻa Noa mo hono fāmilí mo e tokolahi ʻo e fanga manú. Tau sio ange ki he anga hono fai eni ʻe he ʻOtuá.