Ko ʻEtau Fakapapau—Ke Tulimui ki he Founga ʻa Sihova ki he Moʻuí
1 Ko hono fakaeʻa ʻo e ngaahi Fakataha-Lahi “Founga ʻa e ʻOtuá ki he Moʻuí” ko e fakapapau ia naʻe fai ʻi he malanga fakaʻosí. Naʻe kamata ʻaki ʻa hono fakahā: “Ko kitautolu . . . ʻoku tau loto-taha ʻaufuatō ko e founga ʻa e ʻOtuá ko e founga lelei taha ia ʻo e moʻuí.” Fakamanatuʻi ʻa e niʻihi ʻo e ngaahi poini mahuʻinga ʻi he fakapapau ko ia ʻa ia naʻa tau lea ai, “ʻIO!”
2 Ko ʻetau fakapapau ia ke maʻa maʻu pē ʻi he ʻao ʻo Sihová, ʻo ʻikai ha ʻila mei he māmaní. Te tau hokohoko atu ke fakamuʻomuʻa ʻa e finangalo ʻo e ʻOtuá ʻi heʻetau moʻuí. ʻI hono ngāueʻaki ʻene Folofolá, ko e Tohitapú, ko hotau tatakí, ʻe ʻikai ai te tau afe ki toʻomataʻu pe ki toʻohema, ʻo fakapapauʻi ai ko e founga pē ʻa e ʻOtuá ʻoku lelei tahá ʻi he founga ʻa e māmaní.
3 Ko e māmaní fakalūkufua ʻoku nau taʻetokaʻi ʻa e founga ʻa e ʻOtuá ki he moʻuí pea utu ʻa hono ngaahi nunuʻá. (Sel. 10:23) Ko ia, kuo pau ke tau hokohoko atu ke hoko ʻo akoʻi ʻe hotau Tokotaha Faiako Maʻongoʻongá, ko Sihova, ʻa ia ʻokú ne pehē: “Ko ʻeni ʻa e hala, fou ai.” (Ai. 30:21) Ko e founga ʻa Sihova ki he moʻuí, hangē ko ia ʻoku fokotuʻu mai ʻi he ngaahi Konga Tohitapú, ʻoku lelei taha ʻi he tafaʻaki kotoa pē. Ke tulimui ki he founga ko iá, ʻoku mātuʻaki fiemaʻu ke tau ngāueʻaki kakato ʻa e kotoa ʻo e meʻa ʻoku akoʻi kiate kitautolu ʻe Sihová.
4 Polokalama Akoʻi Lelei Taha ʻa Sihová: ʻOku akoʻi mai ʻe Sihova kiate kitautolu ʻa e taumuʻa moʻoni ʻo e moʻuí pea mo e founga ke ngāueʻaki ai ʻetau moʻuí ki he lelei tahá. ʻOkú ne akoʻi mai kiate kitautolu ʻa e founga ke fakaleleiʻi ai ʻa e anga ʻo ʻetau moʻui fakaefakakaukaú, fakaeʻulungāngá, mo e fakalaumālié. ʻOkú ne akoʻi kitautolu ki he founga ke moʻui melino ai mo hotau ngaahi tokouá, hotau fāmilí, pea mo hotau kaungā tangatá. ʻOkú ne fai ʻeni ʻo fakafou mai ʻi heʻene tohi, ko e Tohitapú, pea fakafou mai ʻi heʻene kautahá.
5 Ko ʻetau ngaahi fakataha ʻi he fakatahaʻangá ʻoku mahuʻinga lahi ki he meʻá ni. ʻI heʻetau maʻu maʻu pē mo kau ki he ngaahi fakataha kotoa ʻe nimá, ʻoku tau maʻu ai ʻa e akoʻi fakalūkufua ʻi he tuʻunga ko e kau faifekau ʻo e ongoongo leleí pea mo ha ako mafamafatatau lelei ʻi he moʻui faka-Kalisitiané. (2 Tim. 3:16, 17) ʻOku tokonaki mai ʻe hotau Faiako Maʻongoʻongá ʻa e akoʻi fakateokalati lahi ange ʻo fakafou ʻi he ngaahi ʻasemipilií mo e ngaahi fakataha-lahí. ʻOku totonu ko ʻetau taumuʻá ke ʻoua ʻaupito ʻe liʻaki ha fakataha pe ko ha konga kapau ko ʻetau tuʻunga moʻui leleí mo e ngaahi tuʻungá ʻokú ne fakaʻatā ai kitautolu ke kau ki ai.
6 ʻOfa ke tau hokohoko atu tōtōivi ʻi he tulimui ki he founga ʻa e ʻOtuá ki he moʻuí ʻi he ngaahi ʻaho ʻoku hanga maí, ʻo fai kotoa ki hono fakahīkihikiʻi ʻa Sihová pea ki he ʻaonga tuʻuloa maʻatautolú!—Ai. 48:17.