Te Ke ʻI Ai?
1 Naʻe pehē ʻi he taimi ʻe taha ʻe ha Fakamoʻoni fuoloa: “Kapau te ke liʻaki ʻa e ʻaho ʻuluaki ʻo e fakataha-lahí, ʻoku ʻuhingá, kuó ke tō mei ha meʻa mātuʻaki lahi!” Ko e hā naʻá ne ongoʻi pehē aí? Koeʻuhí he ko e ʻuluaki ʻahó ko e kamataʻanga ia ʻo ha kaimeʻakai fakalaumālie lahi kuo teuteu mai ʻe he kautaha ʻa Sihová maʻatautolu. (Ai. 25:6) Ko ʻetau ʻi ai mei he kamatá pē ʻoku fakahaaʻi ai ʻoku tau loto-tatau mo e fakakaukau ʻa e tokotaha-tohi-sāmé: “Ne u fiefia ʻi heʻenau pehe kia kita, ‘Tau o ki he fale ʻo Sihová.’”—Sāme 122:1.
2 Kae kehe, ʻi he taʻu kuo ʻosí ʻi he niʻihi ʻo e ngaahi Fakataha-Lahi Fakavahe “Folofola Fakaekikite ʻa e ʻOtuá,” ko e kau maʻu fakataha ʻo e Falaité naʻe tokosiʻi moʻoni ʻaupito ange ia ʻi he Tokonakí mo e Sāpaté. ʻOku ʻuhingá ko ha peseti lahi ʻo hotau fanga tokouá naʻe ʻikai te nau fanongo ʻi he ngaahi konga ʻo e fakataha-lahí ʻa ia naʻe ʻomai ai ʻa e fakamatala mātuʻaki mahuʻinga ʻo fekauʻaki mo e folofola fakaekikité. Naʻa nau toe tukuange ai ʻa e feohi fiefia mo e kaungātuí.
3 ʻOua ʻe ʻAi ʻa e Ngāue Fakamāmaní Ke Ne Fakafeʻātungiaʻi: Ko e hohaʻa ʻo fekauʻaki mo e matuʻutāmaki ki ha ngāue ʻa ha taha ʻa e ʻuhinga naʻe ʻikai nai ai ke maʻu ʻe he niʻihi ʻa e Falaité. Kae kehe, kuo ʻilo ʻe he Kau Fakamoʻoni tokolahi ko honau kau pule ngāué ʻoku nau loto-lelei pē ke fengāueʻaki fakataha mo kinautolu ʻi he meʻá ni kapau te nau tomuʻa kole ʻi ha taimi ki muʻa ha taimi mālōlō. Ko ha pule ngāue ʻe taha naʻá ne fuʻu ʻohovale ʻi he fakapapauʻi mālohi ʻe ha tuofefine tāimuʻa ke ne maʻu ʻa e kotoa ʻo e ngaahi fakataha mo e ngaahi ʻasemipilī ʻa e fakatahaʻangá ʻo ne fakamoleki ai ʻa e ʻaho kakato ʻe taha ʻi heʻene fakataha-lahí!
4 ʻOku totonu ke ʻoua te ke pehē ʻe ʻikai ke ʻoatu ʻe hoʻo pule ngāué haʻo taimi mālōlō, pea ʻoku ʻikai totonu ke ke fakaʻosiʻaki ʻo pehē ko hono liʻaki ha ʻaho ʻe taha ʻo e fakataha-lahí ʻoku ʻikai ko ha fuʻu loko meʻa ia. ʻI he tuipau loto-moʻoni, mateuteu ke fakahā fakapotopoto ki ho pule ngāué mei he ngaahi Konga Tohitapú ʻa e ʻuhinga ʻoku hoko ai ʻa hono maʻu ʻo e fakataha-lahí ko e konga mahuʻinga ʻo hoʻo lotú. (Hep. 10:24, 25) Peá ke tuku hoʻo falala kakató ki he ngaahi talaʻofa ʻa Sihová, ʻo ʻiloʻi ko e hā pē ʻa e meʻa ʻokú ke fiemaʻu fakamatelié ʻe tokonaki atu ia kapau te ke hanganaki fakamuʻomuʻa ʻa e ngaahi fiemaʻu fakalaumālié ʻi hoʻo moʻuí.—Mt. 6:33; Hep. 13:5, 6.
5 Ko e kī tefitó ko e houngaʻia ʻi he “ngaahi meʻa ʻoku lelei lahi.” (Fili. 1:10, 11; Sāme 27:4) ʻOku ueʻi ai heni kitautolu ke tau fai ha ngaahi palani ke maʻu ʻa e ʻaonga kakato mei he tokonaki mātuʻaki mahuʻinga ko ʻeni meia Sihová. Kamata ʻa hono fai hoʻo ngaahi palani papaú he taimí ni, peá ke fakapapauʻi te ke ʻi ai ʻi he kotoa ʻo e ʻaho ʻe tolú!