Falala kia Sihova ki ha Mālohi
1 ʻI he ngaahi ʻuhinga lahi, ʻoku fiemaʻu ke tau falala kia Sihova. Ko hono malangaʻi ʻa e ongoongo leleí ʻi he “mamani katoa” ko ha ngāue pole ia. (Mt. 24:14) ʻOku tau faitau hokohoko mo hotau kakano taʻehaohaoá. (Loma 7:21-23) ʻIkai ngata aí, “ko ʻetau milimilisino . . . mo e houʻeiki fakaleveleva [mahulu hake ʻi he tangatá] ʻo e fakapoʻuli ni.” (Ef. 6:11, 12) ʻOku hā mahino, ʻoku tau fiemaʻu ha tokoni. ʻOku lava fēfē ke tau maʻu ha mālohi meia Sihova?
2 ʻI he Lotu: ʻOku foaki tauʻatāina ʻe Sihova hono laumālie māʻoniʻoni mālohí ki heʻene kau sevāniti ʻoku nau kole iá. (Luke 11:13) ʻOku siʻi ʻa hoʻo tuipau ki hoʻo malava ke faifakamoʻoni mei he fale ki he fale, ʻi he halá pe ʻi he telefoní? ʻOkú ke loto-siʻi fekauʻaki mo e faifakamoʻoni ʻikai ʻi he founga anga-mahení? ʻOku fakasiʻisiʻi ʻe he loto-noa ʻo e kakai ʻi he feituʻú ʻa hoʻo faivelengá? Fēfē kapau ʻoku tenge koe ke fakangaloku ʻa hoʻo tuí pe anga-tonú? Falala kia Sihova. Lotu ʻo kole ha mālohi.—Fili. 4:13.
3 ʻI he Ako Fakafoʻituitui: Hangē ko ʻetau maʻu ʻa e mālohi ʻi he kai ʻo e meʻakai fakamatelié, ʻoku pehē pē hono fakaivimālohiʻi fakalaumālie kitautolu ʻi heʻetau kai maʻu pē ʻi he Folofola ʻa e ʻOtuá pea ʻi he ngaahi tohi ʻa e “tamaioeiki agatonu mo boto.” (Mt. 4:4; 24:45, PM) ʻI hano ʻeke ange pe ko e hā naʻá ne ʻoange kiate ia ʻa e mālohi ke kātaki ai ʻi ha ngaahi taʻu ʻi he pilīsone malu ʻi Siainá ʻo ʻikai ha Tohitapú, naʻe pehē ʻe Stanley Jones: “ʻOku lava ke tau tuʻu maʻu ʻi he tuí. Ko ia ai, ʻoku fiemaʻu ke tau ʻuluaki ako. Heʻikai te tau maʻu ha mālohi ʻi loto kapau ʻoku ʻikai te tau ako.”
4 ʻI he Maʻu Fakatahá: ʻI ha fakataha faka-Kalisitiane ʻi he ʻuluaki senitulí, ko Siutasi mo Sailosi naʻe “lahi ʻena lea heʻena tokoni ʻa e kāinga mo poupou honau loto.” (Ng. 15:32) Hangē pē ʻi he ʻaho ní, ko e meʻa ʻoku tau fanongo ai ʻi he ngaahi fakatahá ʻokú ne fakalolotoʻi ʻetau houngaʻia ʻia Sihová, langa hake ʻetau tuí pea fakaʻaiʻai kitautolu ʻi he ngāue fakafaifekaú. Ko e ngaahi fakatahá ʻokú ne ʻomai kitautolu ke tau fetuʻutaki maʻu ai pē mo hotau “kaungāngāue ki he puleʻanga ʻo e ʻOtuá,” ʻa ia ʻoku nau hoko ko hotau “tokoni fakaivimālohí.”—Kol. 4:11, NW.
5 ʻOku tau fiemaʻu ha tokoni ʻi he “ngaahi taimi faingataʻa ke fekuki mo ia” ko ʻení. (2 Tim. 3:1) ʻI he fekauʻaki mo e faʻahinga ʻoku nau maʻu ʻa e mālohi meia Sihová, ʻoku fakapapauʻi mai kiate kitautolu: “Te nau puna ki ʻolunga ʻaki ʻa e ngaahi kapakau hangē ko e fanga ʻīkalé. Te nau lele pea ʻikai hoko ʻo ongosia; te nau luelue pea ʻikai helaʻia.”—Ai. 40:31, NW.