Ko Hono Malangaʻi ʻa e Puleʻangá ʻOku Tokoni Ia ke Fakahaofi Ai ha Moʻui!
1 Ko e ngāue mahuʻinga taha ia ʻoku fai ʻi he māmaní ʻi he taimi ní. Ko Sihova ko e ʻOtuá, Sīsū Kalaisi, pea mo e laui mano ʻo e kau ʻāngeló kuo nau fakahanga ʻenau tokangá ki he meʻá ni. Ko e hā ia, pea ko e hā hono ʻuhinga ʻoku fiemaʻu ai iá? Ko hono malangaʻi ʻo e Puleʻangá, pea ʻoku tokoni ia ke fakahaofi ai ha moʻui!—Loma 1:16; 10:13, 14.
2 ʻOku ongoʻi nai ʻe he kakai ʻe niʻihi ʻe lava ke tau tokoni lelei ange ki he niʻihi kehé kapau te tau feinga ke fakaleleiʻi ʻa e māmani takatakai ʻia kitautolú. ʻOku femoʻuekina ʻa e tokolahi ʻi he ngaahi feinga ke maʻu ʻa e melinó, fakamoʻui ha ngaahi mahaki, pe fakaleleiʻi ʻa e tuʻunga fakaʻekonōmiká. Ka ko e hā ʻa e meʻa ʻe tokoni lahi taha ki he kakaí?
3 Ko ha Ngāue Mātuʻaki Mahuʻinga: ʻOku fakamatalaʻi ʻe he pōpoaki ʻo e Puleʻangá ʻataʻatā pē ʻa e taumuʻa ʻo e moʻuí, ʻa e tupuʻanga ʻo e faingataʻaʻia ʻa e tangatá, pea mo e ʻamanaki alafalalaʻanga pē taha ki he kahaʻú. ʻOku fakaivia ʻe he ongoongo leleí ʻa e kakaí ke nau hoko ko e ngaahi kaumeʻa ʻo Sihova pea mo maʻu foki ʻa e “melino ʻa e ʻOtuá ʻa ia ʻoku māʻolunga ʻi he fakakaukau kotoa pē.” (Fili. 4:7, NW) Ko e pōpoaki pē ʻo e Puleʻangá ʻokú ne tokonaki mai ʻa e tataki ʻaonga ke tokoni ki he kakaí ke fekuki ai mo e ngaahi palopalema ʻo e moʻui he taimi ní peá ne fakamatala fekauʻaki mo e founga ke hao moʻui atu ʻi he taimi ʻe fakaʻauha ai ʻa e māmani fulikivanú ʻi he kahaʻú. (1 Sione 2:17) ʻIkai ʻoku tuha kotoa ia mo e feinga ʻoku lava ke tau fai ki hono malangaʻi ʻa e Puleʻangá?
4 Ke fakatātaaʻi: Ko e hā ʻa e founga lelei taha ke tokoniʻi ʻaki ha kolo ʻoku māʻumohe ʻa hono kakaí ka ʻoku ʻi ha tuʻunga fakatuʻutāmaki ʻi ha veʻe ʻā-maka tāpuni-vai ʻoku vave ke pā mai? Ko hano ohu ha vai mei he ʻā-maka tāpuni-vai ngāvaivai? Ko hono teuʻi fakaʻofoʻofa ʻa e kolo naʻe teu ʻauhá? ʻIkai! Kuo pau ke fakaʻaaki ʻa e kakai he koló, ʻo fakatokanga fekauʻaki mo e fakatuʻutāmaki ʻoku tuʻunuku maí, pea tokoni ke haofaki! Ko e faʻahinga ʻoku mohe fakalaumālie he ʻaho ní ʻoku nau ʻi ha tuʻunga mātuʻaki fakatuʻutāmaki. (Luke 21:34-36) Koeʻuhi ʻoku vave ke mole atu ʻa e fokotuʻutuʻu ko ʻeni ʻo e ngaahi meʻá, tau feinga ke malanga ʻaki ʻa e fakavavevave tahá ki he tokotaha kotoa te tau malavá!—2 Tim. 4:2; 2 Pita 3:11, 12.
5 Kītaki ʻi he Ngāue ko ʻEní: Tau vakaiʻi ha ngaahi founga ke aʻu ai ki ha kakai tokolahi ange ʻoku loto-moʻoní mo e ongoongo leleí—ki honau ngaahi ʻapí, ʻi he halá, fakafou ʻi he telefoní, pea mo e founga ʻikai anga-mahení. Ko e ngāue kuo ʻomai ʻe Sihova kiate kitautolu ke faí ko e ngāue mahuʻinga taha ia ʻoku lava ke tau faí. Kapau te tau fakahoko faivelenga ia, te tau ‘fakamoʻui kitautolu mo kinautolu foki ʻoku fanongo kiate kitautolú.’—1 Tim. 4:16.