Feohi Tuʻumaʻú—Ko Hoʻo Tōʻongá Ia?
1 ʻOku tala mai kia kitautolu ʻe he tohi Tohitapu ʻa Siopé fekauʻaki mo e taimi “naʻe omi ai ʻa e ngaahi foha ʻo e ʻOtua ke ha kia Sihova, pea haʻu ʻa Setane foki ʻi honau lotolotonga.”—Siope 1:6.
2 Neongo naʻe kau, pe naʻe ʻi ai ʻa Sētane ʻi he fakataha ko iá, naʻe ʻikai ke fakafeohi ia. Ke feohí ʻoku ʻuhingá ke “ʻai hato hoa; fakahaaʻi ʻa ʻete loto-tatau; fakatahataha ki ha taumuʻa tatau.”
3 Feohi pe Kau Pē ki Ai? Ko ia ai, ʻokú ke feohi pe kau pē ki ai? Ko e ʻapositolo ko Paulá, ʻi he ʻuluaki senitulí, naʻá ne tohi fekauʻaki mo e niʻihi ʻo hono kaungālotú ʻa ia naʻa nau fakatupulekina ha tōʻonga ʻo hono liʻaki ʻo ʻikai kau ki he ngaahi fakatahá. Kae kehe, ko hano sivisiviʻi ʻa e ngaahi lea ʻa Paulá ʻoku fakahaaʻi ai naʻá ne hohaʻa lahi ange ʻi he hoko pē ʻo ʻi ai ʻi he ngaahi fakatahataha faka-Kalisitiané.
4 Naʻá ne tohi: “Pea ke tau fetokangaʻaki, ke fefakaʻaiʻaiʻaki ʻa kitautolu ki he feʻofaʻaki mo e ngaue lelei: ʻo ʻoua naʻa tau liʻaki ʻetau ngaahi fakataha, ʻo hange ko e anga ʻo e niʻihi; ka mou feenginakiʻaki [“fefakalototoʻaʻaki,” NW] pea ʻasili he ʻoku mou sio ki he fakaofiofi mai ʻa e ʻaho.”—Hep. 10:24, 25, fakaʻītali ʻamautolu.
5 Fakafou ʻi heʻetau ngaahi tali teuteuʻi lelei mo loto-moʻoni ʻi he ngaahi fakatahá, ʻoku tau langa hake ai ʻa e niʻihi kehe ʻoku ʻi aí, pea ʻi he taimi tatau, ʻoku tau talaki fakahāhā ai ʻetau loto-tatau mo e meʻa ʻoku akoʻí. (Hep. 10:23) Ko e fakamoʻoni lahi ange ʻo ʻetau hoko ko e kau feohi moʻoní ʻe lava ke fakahaaʻi ia ʻi heʻetau kau faivelenga ʻi he hivá mo hono fakahaaʻi ʻa e felotoi ʻi loto mo e ngaahi lotú. ʻE lava foki ke tau nofo ʻi he hili ʻa e ngaahi fakatahá ke fai ha fakaongoongolelei mo e fakalototoʻa.—Ng. 20:11.
6 “Tau O”: ʻI he felāveʻi mo e lotu fakaefakatahaʻangá, naʻe fakahaaʻi ʻe he tokotaha-tohi-saame ko Tēvitá ʻa e fakakaukau feʻungamālie ʻi heʻene pehē: “Ne u fiefia ʻi heʻenau pehe kia kita, Tau o ki he fale ʻo Sihova.” (Sāme 122:1) ʻI he pehē “Tau o,” naʻá ne fakahaaʻi ai naʻá ne mahuʻingaʻia ʻi he meʻa lahi ange ia ʻi heʻene kau pē ki aí. Naʻá ne ongoʻi ha tokanga fakataha mo ha fāʻūtaha ʻi he taumuʻá mo hono kaungālotú. ʻOfa ke ueʻi tatau kitautolu ʻi heʻetau fakatupulekina ʻa e tōʻonga ʻo e feohi tuʻumaʻú.—Fili. 3:16.