Ko ha Līpooti ʻA Ia ʻOku Lelei!

Ko e fakamoʻoni ʻo e tāpuaki ʻa Sihová ʻoku hā ia ʻi he tupu ʻi he malaʻe ʻi Nuʻu Silá.

Lolotonga ʻa e taʻu fakangāue 2002, naʻe maʻu ai ʻe he vaʻa Nuʻu Silá ha tupu peseti ʻe 1 ʻi he kau malangá. ʻIkai ko ia pē, ko e līpooti ngāue mei Sepitema ki Tīsemá ʻoku hā ai naʻe kamata lelei ʻaupito ʻa e taʻu fakangāue 2003.​—Pal. 15:30.

Lolotonga ʻa ʻOkatopa mo Nōvema fakatouʻosi, naʻe tupu ai ʻa e kau malangá fakakātoa, ʻuluakí ʻaki ʻa e peseti ʻe 1, ʻi he kau malanga ʻe toko 12,496 naʻe līpooti ʻi ʻOkatopá, pea toe tupu ʻaki ʻa e peseti ʻe 2, ʻi he toko 12,784 naʻe līpooti ʻi Nōvemá. ʻI he tali ki he fakalototoʻa ki ha līpooti fakamākukanga lolotonga ʻa e vahaʻa taimi mālōloó, naʻa mau fiefia ai ke sio ki he tupu peseti ʻe 2.7 ʻi he līpooti ʻi Tīsema ki he 2002 mei he māhina tatau ʻi he 2001.

Ko ia ai, ʻoku ʻi ai ʻa e malava lelei ke hokohoko atu ʻa e tupú!

Lolotonga ʻa Sepitemá, naʻe fai ai ʻa e ngaahi ako Tohitapu ʻe 5,576, ko ha tupu peseti ʻe 3.7 ia mei he māhina tatau he taʻu kuo ʻosí. Ko e tupu lelei ko eni ʻi he ngaahi ako Tohitapú naʻe hokohoko atu ia ʻi ʻOkatopa mo Nōvema ʻi hono līpooti ʻa e ngaahi ako ʻe 5,707 mo e 5,868 ʻi he ongo māhina ko iá.

ʻOku mahino ʻoku kei ʻi ai pē ʻa e kakai tokolahi ʻi hotau malaʻe kuo vaheʻi maí ʻoku nau holi ke ako ʻa e ngaahi moʻoni faka-Tohitapú. ʻOku mau fakalototoʻaʻi atu ai kimoutolu ke hokohoko atu ʻa e tokangataha ki hono ngāueʻaki ʻa e Tohitapú ʻi hoʻomou ngāue fakafaifekaú, fakataha mo hono tuʻuaki ha ngaahi ako Tohitapu ʻi ʻapi ʻi he faingamālie kotoa pē.