Tofa Totonu ʻa e Folofola ʻa e ʻOtuá

¹ ʻI he faifakamoʻoni ki ha ʻōfisa, naʻe “hanga ʻa Filipe ʻo lea, ʻo kamata mei he potu tohi [pau] ʻene malangaʻaki ʻa Sisu kiate ia.” (Ng. 8:35) Naʻe hanga ʻe Filipe ʻo “tofa totonu ʻa e folofola ʻo e moʻoni.” (2 Tim. 2:15) Kae kehe, ʻi he ʻahó ni, kuo fakatokangaʻi ʻe he kau ʻovasia fefonongaʻakí ʻoku tātātaha ke ngāueʻaki ʻe he kau malanga tokolahi ʻa e Tohitapú ʻi he taimi ʻo ʻenau faifakamoʻoní. ʻOkú ke ngāueʻaki ʻa e Tohitapú ʻi hoʻo ngāue fakafaifekaú?

² Ko e Folofola ʻa e ʻOtuá ko e matavai ia ʻo e meʻa kotoa pē ʻoku tau tui ki ai mo akoʻí. (2 Tim. 3:​16, 17) Ko e meʻa ia ʻokú ne tohoakiʻi ʻa e kakaí kia Sihova pea akoʻi kinautolu ki he moʻuí. Ko e ʻuhinga ia ʻoku mahuʻinga ai ke tau ngāueʻaki ʻa e Tohitapú ʻi heʻetau ngāue fakafaifekaú kae ʻoua ʻe talanoa pē fekauʻaki mo e ngaahi tuʻunga-lea ʻoku tau mahuʻingaʻia aí. (Hep. 4:​12) Koeʻuhi ko e tokolahi taha ʻo e kakaí ʻoku siʻi ʻenau ʻilo fekauʻaki mo e Tohitapú, ʻoku fiemaʻu ke tau lau mei ai ke fakahaaʻi kia kinautolu ʻa e tataki ʻaonga ʻokú ne ʻomaí pea mo e kahaʻu ʻokú ne ʻomai ki he faʻahinga ʻo e tangatá.

³ Lau Hangatonu mei he Tohitapú: Te ke ʻahiʻahi nai ke ʻalu ki he matapaá taʻeʻiai ha kato fakamoʻoni. ʻE lava ke ke tuku ʻa e tohi tefito ʻokú ke fakaʻamu ke tuʻuakí ʻi ha meʻa faʻoʻanga pepa pea toʻotoʻo ʻa e Tohitapú pe faʻo ʻi ho kató. Pea ʻi he taimi ʻokú ke fakakau ai ha taha ʻi hoʻo fetalanoaʻakí, ʻe lava ke ke toʻo hake ʻa e Tohitapú ʻo ʻikai fakatupunga ʻa e tokotahá ke ne ongoʻi ʻokú ke feinga ke fai ha malanga. Tuʻu ʻi ha founga ʻa ia ʻe lava ke muimui ai hoʻo tokotaha fanongó ʻi hoʻo Tohitapú. Mahalo te ke kole ange ke ne lau leʻo-lahi ha foʻi veesi. ʻE lava ke ʻi ai ha maongo loloto ange ʻi he taimi ʻoku lava ke ne sio ai ki he meʻa ʻoku leaʻaki ʻe he Tohitapú kae ʻikai ko e fanongo pē kia koe. Ko e moʻoni, ke tokoniʻi ia ke ne mahinoʻi ʻa e ʻuhinga ʻo e konga tohí, fakamamafaʻi ʻa e ngaahi foʻi lea ʻoku fakahaaʻi ai ʻa e fakakaukaú.

⁴ Ko ha Tuʻuaki Konga Tohitapu ʻe Taha: Hili hono fakafeʻiloaki koé, te ke pehē nai: “ʻOku hanga ʻa e kakaí ki he ngaahi matavai kehekehe ki ha fakahinohino ʻi heʻenau moʻuí. Ko e hā ʻokú ke ongoʻi ko e matavai lelei taha ia ʻo e tataki ʻaongá? [Tuku ke ne tali.] Ko e hā hoʻo fakakaukau fekauʻaki mo e fakamatala ko ení? [Lau ʻa e Palovepi 2:​6, 7, pea tuku ke ne tali.] Kuo fakamoʻoniʻi ʻoku taʻefeʻunga ʻaupito ʻa e poto fakaetangatá, ʻi hono tataki ʻa e tokolahi ke siva ʻenau ʻamanakí. Neongo ia, ko e poto ʻo e ʻOtuá, kuo fakamoʻoniʻi ʻoku alafalalaʻanga mo ʻaonga maʻu pē ia.” Fakahaaʻi leva ʻa e tohi ʻokú ke tuʻuakí, pea fakamamafaʻi mei ai ha fakatātā ʻe taha ʻo e poto ʻaonga ʻo e ʻOtuá.

⁵ Naʻe ngāueʻaki ʻe Sīsū ʻa e ngaahi Konga Tohitapú ke tokoniʻi ʻa e faʻahinga loto-totonú. (Luke 24:32) Naʻe fakamoʻoniʻi Fakatohitapu ʻe Paula ʻa e ngaahi meʻa naʻá ne akoʻí. (Ng. 17:​2, 3) Ko ʻetau tuipau mo e fiefia ʻi he ngāue fakafaifekaú ʻe tupulekina ia ʻi heʻetau hoko ʻo toe pōtoʻi ange ai pē ʻi hono tofa totonu ʻa e Folofola ʻa e ʻOtuá.

Fiemaʻu ki Heʻetau Ngāue Fakafaifekaú ʻa e Fakapotopoto Faka-Kalisitiané

¹ Kuo fakamatalaʻi ʻa e fakapotopotó ko “ha ongoʻi vēkeveke fekauʻaki mo e meʻa ke fai pe leaʻaki koeʻuhi ke tauhi maʻu ʻa e ngaahi vahaʻangatae lelei mo e niʻihi kehé pe fakaʻehiʻehi mei he fakatupu ʻitá.”

² Ko e fakapotopoto faka-Kalisitiané kuo pau ke mafamafatatau ia mo e tuʻumaʻú. Kuo pau ke ʻoua ʻaupito te ne fakangaloku ʻa e moʻoní pe hōloa ki ha tuʻunga kalofanga. Ki he niʻihi, ko e pōpoaki ʻa e Tohitapú, tatau ai pē pe ʻoku fēfē hono fakahokó, ʻe fakatupu ʻita ia.

³ ʻIkai ko ia pē, ko e fakapotopoto faka-Kalisitiané ʻoku ueʻi ia ʻe he fua ʻo e laumālie ʻo e ʻOtuá. (Kal. 5:​22, 23) ʻOku ʻikai fokotuʻu ʻa e ʻofá ke ne fakatupunga ʻa e loto-ʻitá. Ko ha tokotaha anga-lelei te ne feangai anga-mokomoko mo e niʻihi kehé. Ko ha taha ʻokú ne maʻu ʻa e mapuleʻi-kitá ʻoku anga-mokomoko ai pē ia ʻi he malumalu ʻo e ngaahi tuʻunga faingataʻá, ko hono olá, ʻoku fakamatalaʻi ʻi he Palovepi 15:​18 (PM): “Oku lolomi ae feiteitani eia oku fakatotoka ki he ita.”

⁴ ʻI he tuʻunga ko e ngaahi tokoni ki he fakapotopoto ʻi he ngāue fakafaifekaú ʻoku ʻomai ai ʻa e ngaahi fakamanatu hono hokó:

◼ Fakamamafaʻi ʻa e ngaahi tafaʻaki pau ʻo e pōpoaki ʻa e Tohitapú

◼ Feinga ki ha tuʻunga felotoi.

◼ ʻOua ʻe fakaanga pe fakahalaia, ʻo tāpuniʻi ai ʻa e ʻatamai ʻo e tokotaha-ʻapí.

◼ Hoko ko ha tokotaha fanongo lelei. ʻOua ʻe hoko ʻo puleʻi ʻa e fetalanoaʻakí.

◼ Fakakaukau ki he vakai ʻa e tokotaha kehé.​—1 Kol. 9:​20-22.

◼ ʻOku fiemaʻu ʻi he fakapotopotó ʻa e taimiʻi totonu. ʻI he taimi ʻe niʻihi ʻoku lelei tahá ke tukunoaʻi ʻa e meʻa ʻoku leaʻakí, ke tuku ʻa e ngaahi meʻa ʻe niʻihi ki ʻamui ange.​—Sione 16:12.

◼ ʻOku ʻikai fiemaʻu ke fakahalaʻi ʻa e taʻeloto pe fakamatala hala kotoa pē.

⁵ ʻI hono tefitó, ʻoku ʻikai fiemaʻu ke te ako maʻuloto ha lisi lōloa ʻo ha ngaahi tuʻutuʻuni. Hoko ʻo fakaʻatuʻi. Fakahāhā ʻa e ʻofá. Fai ki he niʻihi kehé ʻo hangē ko ia te ke loto ke nau fai mai kiate koé.​—Mt. 7:12.