“Husepāniti Fiefia ʻo ha Uaifi Fakaʻofoʻofa”

ʻI HE taimi ki he taimi, ʻoku tukuakiʻi fakahangatonu ʻe he kakai ʻe niʻihi ʻa e Kau Fakamoʻoni ʻa Sihová ki hono maumauʻi ʻo e ngaahi nofo malí. Kae kehe, ko e ngaahi nofo mali lavameʻa tokolahi ʻa ia ko e hoa mali pē ʻe taha ko e taha ia ʻo e Kau Fakamoʻoni ʻa Sihová ʻoku nau fakahaaʻi ʻoku ʻikai ʻaupito moʻoni eni. Ko hono ngāueʻaki ʻa e akonaki ʻa e Tohitapú ʻi he moʻui fakafāmilí ʻoku ʻai ai ʻa e nofo malí ke fiefia, hangē ko ia ʻoku fakahaaʻi ʻe he tohi hoko hake naʻe pulusi ʻi ha nusipepa Falanisē.

“ʻI he meimei taʻu ʻe 28 he taimí ni, kuó u hoko ai ko e husepāniti fiefia ʻo ha uaifi fakaʻofoʻofa ʻa ia ko e taha ʻo e Kau Fakamoʻoni ʻa Sihová. Naʻá ne tauhi hake ʻeku fānau ʻe toko nima, ʻa ia ko e toko ua ai naʻe ʻikai ko ʻene fānau totonu, ʻi he tokanga pea mo e ʻofa lahi tatau. ʻI heʻeku hoko he taimí ni ko ha talēkita ʻo ha kautaha ʻoku ʻi ai ʻa e kau ngāue ʻe toko 45, ʻoku lava ke u fakapapauʻi atu kiate kimoutolu kuó ne tokoni lahi ʻaupito ki he lavameʻa ʻa hoku lakangá. Ko e ʻuhinga ia ʻi he taimi naʻáku sio ai ʻi ha kupu ʻi heʻemau nusipepa tuʻumaʻú ʻoku hā ai ʻa e Kau Fakamoʻoni ʻa Sihová ko ha fakamanamana ki he potu fonua Lot-et-Garonne, naʻá ku fili ke ʻoatu kiate kimoutolu ha fakamoʻoni māʻolunga.”

ʻOku toe pehē ʻe he tohí: “ʻOku ʻikai ke nau ifi pe konā. Ko ha fakamanamana ʻeni? Ko e kau Kalisitiane kātaki kinautolu ʻo ʻikai ke nau fakakavengaʻiʻaki ha taha pē ʻa e ngaahi lao ʻoku nau muimui ki aí. Ka, ko ha faʻifaʻitakiʻanga kinautolu ʻi he ngaahi feituʻu lahi. . . . ʻOku ʻikai ke nau kau ʻi ha ngaahi meʻa fakatupu-mā fakaepaʻanga pe feʻaveʻaki holo ʻo e faitoʻo kona tapú. ʻOku ʻikai ke nau fai ha fuakava ʻo e ʻikai fai ʻa e fehokotaki fakasinó, pea ʻoku ou fakapapauʻi atu kiate kimoutolu, ʻoku nau moʻui ʻi ha founga moʻui anga-maheni. . . .

“ʻE lelei nai ke ke ʻeke mai kiate au: Ko ia, ko e hā ʻoku ʻikai ko ha taha ai koe ʻo e Kau Fakamoʻoni ʻa Sihová? Koeʻuhí he ʻoku fiemaʻu ʻa e tui faka-Kalisitiane mo e ngaahi ʻulungaanga anga-tonu, pea ʻoku ʻikai faingofua hono maʻu ʻeni ʻi he lotolotonga ʻo e tokolahi taha ʻo e kakaí.”

Te Ke Tali Lelei ha ʻAʻahi?

Naʻa mo e māmani faingataʻá ni, ʻe lava ke ke maʻu ʻa e fiefiá fakafou he ʻilo totonu mei he Tohitapú ʻo kau ki he ʻOtuá, ko hono Puleʻangá, mo ʻene taumuʻa fakaofo ki he faʻahinga ʻo e tangatá. Kapau te ke tali fiefia ha toe fakamatala pe te ke loto ke ʻaʻahi atu ha tokotaha ke fai ha ako Tohitapu taʻetotongi mo koe ʻi ho ʻapí, kātaki tohi ki he International Bible Students Association, Box 673, Apia, Samoa, pe ko ha tuʻasila feʻungamālie ʻa ia ʻoku hā ʻi he peesi 2.