ʻAi ke ʻIloa ʻa e Moʻoni Fekauʻaki mo Sīsuú

¹ Ko e kau Kalisitiane paní, ʻi hono tokoniʻi ʻe honau takanga ko e fanga sipi kehé, ʻoku “nau puke maʻu ʻenau fakamoʻoni kia Sisu.” (Fkh. 12:17) Ko ha ngāue mahuʻinga eni, koeʻuhí he ko e fakamoʻuí ʻoku malava ia fakafou ʻiate ia pē.​—Sione 17:3; Ng. 4:​12.

² ‘Ko e Hala, ko e Moʻoni, pea mo e Moʻui’: “Ko au pe ko e Hala, pea mo e Moʻoni mo e Moʻui,” ko e lea ia ʻa Sīsuú. “ʻOku ʻikai haʻu ha taha ki he Tamai ka ʻi heʻene fou ʻiate au.” (Sione 14:6) Fakafou ʻia Sīsū pē, “ko e hala,” ʻe lava ke tau fakaofiofi ai ki he ʻOtuá ʻi he lotu pea maʻu ha vahaʻangatae fakahōifua mo Ia. (Sione 15:16) Ko Sīsū ʻa e “moʻoni” he ko e ngaahi kikite mo e ngaahi ʻata ʻoku ʻi he Ngaahi Konga Tohitapu Faka-Hepeluú naʻe hoko ʻo moʻoni ia ʻiate ia. (Sione 1:​17; Kol. 2:​16, 17) Ko e moʻoni, ko e taumuʻa tefito ʻo e kikite moʻoní ke fakamaama ʻa hono ngafa tefito ʻi hono fakahoko ʻa e taumuʻa ʻa e ʻOtuá. (Fkh. 19:10) ʻIkai ko ia pē, ko Sīsū ʻa e “moʻui.” Ke maʻu ʻa e tāpuaki ʻo e moʻui taʻengatá, kuo pau ke ngāueʻi ʻe he tokotaha kotoa ʻa e tui ki heʻene feilaulau huhuʻí.—Sione 3:​16, 36; Hep. 2:9.

³ ʻUlu mo e Tuʻi ʻOku Pule: Kuo pau ke toe ʻiloʻi ʻe he kakaí ʻa e mafai fakahoko ngāue kāfakafa kuo tuku ʻe Sihova ki hono ʻAló. Kuo fokotuʻu ʻa Sīsū ko e Tuʻi ʻo e Puleʻanga ʻo e ʻOtuá—‘ʻe fai kiate ia ʻe he ngaahi kakaí ʻenau tukuloló.’ (Sen. 49:10) Tānaki atu ki ai, kuo fakanofo ia ʻe Sihova ko e ʻUlu ʻo e fakatahaʻangá. (Ef. 1:​22, 23) ʻOku fiemaʻu ke tau tokoniʻi ʻetau kau ako Tohitapú ke nau mahinoʻi ʻa e founga ʻo hono tataki ʻe Sīsū ʻa e fakatahaʻangá pea ngāueʻaki ʻa e “tamaioeiki agatonu mo boto” ke tokonaki mai ʻa e “mea kai [fakalaumālié] i hono taimi totonu.”—Mt. 24:​45-47, PM.

⁴ Taulaʻeiki Lahi Mohu Meesi: ʻI hono hokosia ʻa e ngaahi ʻahiʻahi mo e mamahi ʻi he tuʻunga ko ha tangatá, ‘ʻoku lava ai ʻa Sīsū ke tokoni kiate kinautolu ʻoku ʻahiʻahiʻí.’ (Hep. 2:​17, 18) He fakalotomāfana moʻoni ē ki he faʻahinga taʻehaohaoa ʻo e tangatá ke ʻiloʻi ʻoku ongoʻi ʻe Sīsū honau ngaahi vaivaiʻangá pea ʻokú ne hūfekina ʻi he anga-ʻofa kinautolu! (Loma 8:​34) Makatuʻunga ʻi he feilaulau huhuʻi ʻa Sīsuú pea fakafou ʻi heʻene ngaahi ngāue ko e Taulaʻeiki Lahí, ʻe lava ke tau fakaofiofi ai kia Sihova “ʻaki ʻa e lea tauʻatāina” koeʻuhi ke maʻu ʻa e “tokoní ʻi hono taimi totonu.”—Hep. 4:​15, 16, NW.

⁵ ʻOfa ke hanga ʻe heʻetau ngaahi feinga ke fakaʻilo ki he niʻihi kehé ʻa e moʻoni fekauʻaki mo Sīsuú ʻo ueʻi kinautolu ke nau talangofua pea tauhi kiate ia fakataha mo kitautolu.​—Sione 14:​15, 21.

Tokoni ki Hoʻo ʻOvasia ʻi he Ako Tohi ʻa e Fakatahaʻangá

¹ Ko kitautolu taki taha ʻoku tau maʻu ʻa e ngaahi ʻaonga lahi mei he Ako Tohi ʻa e Fakatahaʻangá. Naʻa tau lāulea ʻi he māhina kuo ʻosí ki he anga ʻo hono fakahoko ʻe he ʻovasia Ako Tohi ʻa e Fakatahaʻangá ʻa hono ngafá. Ka ko e hā ʻe lava ke tau fai ke tokoni kiate ia pea tau maʻu ʻaonga ai kitautolu tonu pea mo e niʻihi kehé?

² Maʻu ʻi he Uike Kotoa Pē: Koeʻuhi ʻoku tauhi ke tokosiʻi pē ʻa e ngaahi kulupu ako tohí, ko hoʻo ʻi aí ʻoku mahuʻinga. ʻAi ko hoʻo taumuʻá ia ke maʻu ia ʻi he uike kotoa pē. ʻE lava ke ke toe tokoni ʻaki hoʻo tauhi taimí, he ʻoku fakaʻatā ʻe he meʻá ni ʻa e ʻovasiá ke ne kamata ai ʻa e fakatahá ʻi ha founga maau.​—1 Kol. 14:40.

³ Ngaahi Tali Fakatupu Langa Hake: Ko e toe founga ʻe taha ʻe lava ke ke tokoni aí ko e teuteu lelei pea mo hono fai ha ngaahi tali fakatupu langa hake. Ko e ngaahi tali ʻoku fakahangataha ki he foʻi poini pē ʻe tahá ʻoku faʻa lelei tahá, pea ʻoku toe fakalotolahiʻi foki ʻe he meʻá ni ʻa e niʻihi kehé ke nau tali. Fakaʻehiʻehi mei he feinga ke kāpui ʻa e meʻa kotoa ʻi he palakalafí. Kapau ʻoku maongo ki ho lotó ha foʻi poini ʻi he fakamatalá, ʻai ke toe lelei ange ʻa e lāuleá ʻaki hono vahevahe atu ʻa hoʻo fakakaukaú ʻi ha tali.​—1 Pita 4:​10.

⁴ Kapau ʻokú ke maʻu ʻa e monū ko hono lau ʻa e ngaahi palakalafí maʻá e kulupú, tōtōivi ʻi hono fakahoko ʻa e konga ko iá. Ko e lautohi leleí ʻoku tokoni ia ki he lavameʻa ʻa e akó.—1 Tim. 4:​13.

⁵ Faifakamoʻoni Fakakulupú: Ko e ngaahi fakataha ki he malaʻe ngāué ʻoku fai ia ʻi he ngaahi feituʻu ako tohi lahi, pea ko hoʻo poupouʻi ʻa e ngaahi fokotuʻutuʻu ko ení ʻoku tokoniʻi ai ʻa e ʻovasiá ʻi heʻene takimuʻa ʻi he ngāue fakaʻevangelioó. Vakai ki he ngaahi fokotuʻutuʻu ko ení ko e ngaahi faingamālie ia ke ʻunuʻunu ofi ange ai ki ho fanga tokouá pea ke fakalotolahiʻi kinautolu.

⁶ Ngaahi Līpooti Malaʻe Ngāué: Ko hono ʻoatu vave ʻa hoʻo līpooti malaʻe ngāué ʻi he ngataʻanga ʻo e māhina taki taha ko e toe founga ia ʻe taha ke tokoni ai ki he ʻovasiá. Te ke ʻoatu hangatonu nai hoʻo līpōtí kiate ia pe ki hono tokoní. ʻE ʻave leva ʻe he ʻovasia Ako Tohi ʻa e Fakatahaʻangá ʻa e ngaahi līpōtí ki he sekelitalí.

⁷ Ko hoʻo ngāue fāitaha mo hoʻo ʻovasia Ako Tohi ʻi he Fakatahaʻangá ʻe ʻikai ke taʻefakahoungaʻi. Hiliō he meʻa kotoa, ʻe lava ke ke fakapapauʻi ko Sihová te ne ‘ʻi he laumālie ʻokú ke fakahāhaá.’​—Fili. 4:​23, NW.