Fāʻūtaha Faka-Kalisitiane Moʻoní​—Anga-Fēfē?

¹ Ko e hā ʻe lava ke ne fakafāʻūtahaʻi ʻa e kakai laka hake he toko ono milioná mei he fonua ʻe 234 pea mo e kulupu lea nai ʻe 380? Ko e lotu pē kia Sihova ko e ʻOtuá. (Mai. 2:​12; 4:​1-3) ʻOku ʻiloʻi ʻe he Kau Fakamoʻoni ʻa Sihová mei he meʻa ʻoku nau hokosia fakafoʻituituí ko e fāʻūtaha faka-Kalisitiane moʻoní ko ha meʻa moʻoni ia he ʻahó ni. ʻI he tuʻunga ko e “takanga pe taha” ʻi he malumalu ʻo hotau ‘tauhi pe ʻe tahá,’ ʻoku tau fakapapauʻi ke talitekeʻi ʻa e laumālie māvahevahe ʻo e māmani ko ení.—Sione 10:16; Ef. 2:2.

² Ko e taumuʻa papau ʻa e ʻOtuá ki he meʻamoʻui mohu ʻatamai kotoa pē ke nau hoko ʻo fāʻūtaha ʻi he lotu moʻoní. (Fkh. 5:​13) ʻI hono ʻiloʻi ʻa e mahuʻinga ʻo e meʻá ni, naʻe ʻai ʻe Sīsū ʻa e fāʻūtaha ʻa hono kau muimuí ko ha meʻa ia ke fai ki ai ʻa e lotu fakamātoato. (Sione 17:​20, 21) ʻE lava fēfē kia kitautolu taki taha ke tau tokoni ki he fāʻūtaha ʻa e fakatahaʻanga Kalisitiané?

³ Founga Hono Lavaʻi ʻo e Fāʻūtahá: ʻI he ʻikai ʻa e Folofola mo e laumālie ʻo e ʻOtuá, ʻe ʻikai ala maʻu ʻa e fāʻūtaha faka-Kalisitiané. Ko ʻetau ngāueʻaki ʻa e meʻa ʻoku tau lau ʻi he Tohitapú ʻoku fakaʻatā ai ʻa e laumālie ʻo e ʻOtuá ke tafe tauʻatāina mai ki heʻetau moʻuí. ʻOku ʻai ʻe he meʻá ni ke tau malava ʻo “tauhi ʻaki ʻa e noʻo ko e melino, ʻa e taha kuo fakatupu ʻe he Laumalie.” (Ef. 4:3) ʻOkú ne ueʻi kitautolu ke tau fefakamolemoleʻaki ʻi he ʻofá. (Kol. 3:​13, 14; 1 Pita 4:8) ʻOkú ke pouaki ʻa e fāʻūtahá ʻaki ʻa e fakalaulauloto ʻi he ʻaho taki taha ki he Folofola ʻa e ʻOtuá?

⁴ Ko ʻetau ngāue kuo tuku mai ke malanga mo ngaohi ākongá ʻokú ne toe fakafāʻūtahaʻi kitautolu. ʻI he taimi ʻoku tau ngāue ai mo e niʻihi kehé ʻi he ngāue fakafaifekau faka-Kalisitiané, “o feiga fakataha i he tui ki he ogoogolelei,” ʻoku tau hoko ai ko e ‘kaungāngaue ki he moʻoní.’ (Fili. 1:​27, PM; 3 Sione 8) ʻI heʻetau fai iá, ko e ngaahi haʻi fāʻūtaha ʻo e ʻofa ʻi he loto fakatahaʻangá ʻoku ʻai ai ke mālohi. Ko e hā ʻoku ʻikai ai ke fakaafeʻi ha tokotaha kuo ʻikai te mo ngāue fakataha ki muí ni ke ʻalu fakataha mo koe ʻi he malaʻe fakafaifekaú ʻi he uike ní?

⁵ He faitāpuekina ē ka ko kitautolu ʻi he hoko ko e konga ʻo e fetokouaʻaki fakavahaʻapuleʻanga moʻoni pē taha ʻi he māmaní he ʻaho ní! (1 Pita 5:9) Kuo hokosia fakahangatonu ʻe he laui afe ki muí ni ʻa e fāʻūtaha fakaemāmani lahi ko ení ʻi he ngaahi Fakataha-Lahi Fakavahaʻapuleʻanga “ʻAve ki he ʻOtuá ʻa e Lāngilangí.” ʻOfa ke tau tokoni taki taha ki he fāʻūtaha mahuʻinga ko ení ʻaki hono lau ʻa e Folofola ʻa e ʻOtuá he ʻaho taki taha, ʻi hono fakaleleiʻi ʻa e ngaahi faikehekehé ʻi he ʻofa, pea ʻi hono malangaʻi “loto taha” ʻa e ongoongo leleí.—Loma 15:6.

Kumi ki he Faʻahinga Tāú

¹ Ko e ngaahi fakahinohino ʻa Sīsū ki hono fakahoko ʻo e ngāue fakamalangá ʻoku ʻomai ai kia kitautolu ha pole. Naʻá ne pehē: “Ka mou ka aʻu ki ha kolo, pe ha vilisi, ʻeke pe ko hai ha taha ʻoku tāu.” (Mt. 10:11) ʻI he siʻi mo toe siʻi ange ʻa e taimi ʻo e kakaí he ʻahó ni ʻi ʻapí, ʻe lava fēfē ke tau fai ola lelei ʻa e kumi ko ení?

² ʻAnalaiso Ho Feituʻu Ngāué: Kamataʻaki hono ʻanalaiso ho feituʻu ngāué. Ko fē ʻa e taimi ʻoku ngalingali lahi taha ke ʻi ʻapi ai ʻa e kakaí? Ko fē ʻe lava ke maʻu ai kinautolu lolotonga ʻa e ʻahó? ʻOku ʻi ai ha ʻaho pau ʻo e uiké pe ko e taimi ʻo e ʻahó te nau hoko ʻo ongongofua lahi ange nai ai ki ha ʻaʻahi? Ko hono feʻunuʻaki hoʻo ngāue fakafaifekaú ki he founga-tuʻumaʻu pea mo e ngaahi tuʻunga ʻo e kakai ʻi he feituʻu ngāue fakalotofonuá ʻe lava ke ne tokoniʻi koe ke ke lavaʻi ai ʻa e meʻa lelei tahá.​—1 Kol. 9:​23, 26.

³ Kuo lavameʻa ʻa e kau malanga tokolahi ʻi he lolotonga ʻa e ngaahi muʻaki houa efiafí. ʻOku fiemālie lahi ange ai mo hehema ʻa e faʻahinga ʻi he ʻapí ke fanongo ʻi he taimi ko iá. ʻI he siʻi ʻa e ngaahi houa ʻahó lolotonga ʻa e ngaahi māhina momokó, ko e faifakamoʻoni telefoni (ʻi he feituʻu ʻoku fakaʻatā aí) ʻi he ngaahi efiafí ʻe fakamoʻoniʻi nai ʻa ʻene ola leleí. Ko hono ngāueʻi ʻa e feituʻu pisinisí mo e faifakamoʻoni ʻi he ngaahi feituʻu kakaí ko e toe ngaahi founga foki ia ke aʻu ai ki he kakaí mo e ongoongo leleí.

⁴ Lolotonga ha māhina ʻo e ngāue makehé, naʻe fokotuʻu ai ʻe ha fakatahaʻanga ʻe taha ʻa e faifakamoʻoni ʻi he hoʻatā efiafí ʻi he ngaahi ʻaho Tokonakí mo e Sāpaté mo e faifakamoʻoni efiafi ʻi he ngaahi ʻaho Pulelulú mo e Falaité. ʻOku nau toe fokotuʻutuʻu ʻa e faifakamoʻoni telefoní pea fokotuʻutuʻu ke ngāueʻi ʻa e feituʻu pisinisí. ʻOku fakatupunga ʻe he ngaahi fokotuʻutuʻu ko ení ʻa e loto-māfana lahi ʻaupito ki he ngāue fakafaifekaú ʻo fili ai ʻa e fakatahaʻangá ke hokohoko atu ia.

⁵ Toe ʻAʻahi Tōtōivi: Kapau ko ha pole ia ʻi ho feituʻu ngāué ke maʻu ʻa e kakaí ʻi ʻapi ʻi hoʻo toe fokí, feinga ke ʻai ha ʻapoinimeni pau ke toe ʻaʻahi ki ai ʻi he fakaʻosinga ʻo e ʻaʻahi taki taha, ʻo kau ai ʻa e muʻaki ʻaʻahí. Fakapapauʻi leva ke tauhi ʻa e ʻapoinimení. (Mt. 5:​37) Kapau ʻe feʻungamālie, te ke ʻeke nai ʻa e fika telefoni ʻo e tokotaha-ʻapí. ʻE lava foki ke tokoniʻi koe ʻe he meʻá ni ke toe fetuʻutaki ai mo e tokotahá.

⁶ Ko ʻetau ngaahi feinga tōtōivi ke kumi ki he faʻahinga tāú pea toe ʻaʻahi ki he mahuʻingaʻia ʻoku tau maʻú ʻe maʻu pau ai ʻa e tāpuaki ʻa Sihová.​—Pal. 21:5.