“Ko Sihova ko Hoku Tokoni”
1 ʻI he taimi naʻe fekauʻi atu ai ʻe Sīsū ʻa ʻene ʻuluaki kau ākongá, naʻá ne tala ange kiate kinautolu: “Vakai, ʻoku ou tuku atu kimoutolu ke mou hange ko e fanga sipi ʻi he lotolotonga ʻo e fanga ulofi.” (Mt. 10:16) Naʻe fakatupunga ʻe he meʻa ko iá ke nau hoko ai ʻo manavasiʻi pea nau holomui? ʻIkai. Naʻa nau ngāueʻaki ʻa e ʻulungāanga naʻe fakahā ki mui ʻe he ʻapositolo ko Paulá ʻi he taimi naʻá ne tala ange ai ki he kaungā Kalisitiané: “ʻOku tau malohi ai ke lea ʻo pehe, Ko e ʻEiki [“Sihova,” NW] ko hoku tokoni; ʻe ʻikai te u manavahe: ko e ha tū ha meʻa ʻe fai kiate au ʻe ha tangata?” (Hep. 13:6) Naʻa nau fiefia ke lau kinautolu ʻoku taau ke ngaohikoviʻi koeʻuhi ko e huafa ʻo Sīsuú, pea naʻa nau hokohoko atu ʻo ʻikai ke foʻi ʻi hono akoʻi mo hono talaki ʻo e ongoongo leleí.—Ng. 5:41, 42.
2 ʻI he ʻahó ni ko e ngāue fakamalanga ʻi māmani lahí kuo mei ngata. Hangē tofu pē ko ia naʻe tala ki muʻa ʻe Sīsuú ʻoku tau hoko ʻo fehiʻanekinaʻi ʻe he ngaahi puleʻangá kotoa. (Mt. 24:9) Ko ʻetau ngāue fakamalangá kuo fakafepakiʻi mo manukiʻi, pea kuo aʻu ʻo tapui ia ʻi he ngaahi konga ʻe niʻihi ʻo e māmaní. Kapau ʻoku siʻi ʻetau tuí, ʻe lava ke tau ongoʻi ilifia. Kae kehe, ʻi hono ʻiloʻi ko Sihova ko hotau Tokoní ʻokú ne fakaivifoʻou kitautolu pea ʻai ke tau mālohi ke kītaki.
3 Ko e loto-toʻá ko e tuʻunga ia ʻo e hoko ʻo mālohi, taʻemāluʻia mo e loto-lahi. Ko e fehangahangai ia ʻo e manavaheé, ilifiá mo e loto-siʻí. Kuo fiemaʻu maʻu pē ʻe he kau ākonga ʻa Sīsuú ha loto-toʻa ke kātaki. ʻOku mātuʻaki fiemaʻu ia kiate kitautolu ke hao ai mei he hoko ʻo loto-foʻi ʻi he ngaahi ʻulungāanga mo e ngaahi tōʻonga ʻo ha māmani fakafili ki he ʻOtuá. He fakalototoʻa ē kiate kitautolu ke fakakaukau atu ki he faʻifaʻitakiʻanga māʻolunga taha ʻa Sīsuú ko ha tokotaha ikuna ʻo e māmaní! (Sione 16:33) Manatuʻi foki, ko e kau ʻapositoló ʻa ia naʻa nau fehangahangai mo e ngaahi ʻahiʻahi kakahá naʻa nau talaki taʻemāluʻia: “ʻOku totonu pe ke fai ki he pule ʻa e ʻOtua ʻi he pule ʻa e tangata.”—Ng. 5:29.
4 Ko Kitautolu ʻOku ʻIkai ko e Haʻa Holomui: ʻOku totonu ke tau feinga ke tauhi maʻu ha fakakaukau pau ki heʻetau ngāué. (Hep. 10:39) Manatuʻi maʻu pē ʻoku fekau atu kitautolu ʻe Sihova ko ha fakahāhā ʻo ʻene ʻofa mo e faimeesi ki he kotoa ʻo e faʻahinga ʻo e tangatá. ʻOku ʻikai ʻaupito te ne kole ki heʻene kau sevānití ke nau fai ha faʻahinga meʻa ʻoku ʻikai ke ne fakahoko ha taumuʻa ʻaonga. Ko e meʻa kotoa pē kuo vaheʻi mai kiate kitautolu ke faí ʻe hoko ia ko e lelei fakaʻaufuli maʻá e faʻahinga ʻoku nau ʻofa ki he ʻOtuá.—Loma 8:28.
5 Ko ha fakakaukau fakatuʻamelie te ne tokoniʻi kitautolu ke tau hanganaki kumi ki he faʻahinga hangē ha sipí ʻi hotau feituʻú. ʻE lava ke tau fakakaukau atu ki he loto-noa ʻoku fakahāhā ʻe he kakaí ko ha fakahaaʻi ia ʻo ʻenau fakatuʻatamakí mo e ʻikai ha ʻamanakí. ʻAi ke ueʻi kitautolu ʻe heʻetau ʻofá ke tau hoko ʻo kaungāongoʻi mo kātaki. ʻI he taimi kotoa pē ʻoku tau tuku ai ha ngaahi tohi, pe ʻi he tafaʻaki ʻe tahá ʻoku tau ʻiloʻi ha mahuʻingaʻia lahi ange, ko ʻetau taumuʻá ke fai leva ha toe ʻaʻahi pea langaʻi ha mahuʻingaʻia lahi ange. ʻOku ʻikai ʻaupito fiemaʻu ke tau veiveiua ʻi heʻetau malava ke kamata ha ako Tohi Tapú pe ke hoko ʻo ola lelei ʻi hono fai iá. ʻI hono kehé, ʻoku totonu ke tau kumi maʻu pē mo faʻa lotu ki he tokoni mo e fakahinohino ʻa Sihová, ʻo tuipau te ne tokoniʻi kitautolu.
6 ʻOku tau tui mālohi ʻe vakaiʻi ʻe Sihova ʻa e ngāué ʻo aʻu ki hono ngataʻangá. (Fakafehoanaki mo e Filipai 1:6.) Ko ʻetau falala kakato kiate ia ko hotau Tokoní ʻoku fakaivimālohiʻi ai kitautolu, koeʻuhí ke “ʻoua naʻa ta fiu ʻi he failelei.”—Kal. 6:9.