Founga ke Ngāueʻaki Ai ʻa e Ngaahi Sīpinga Tuʻuakí

1. ʻOku totonu ke fēfē ʻetau vakai ki he ngaahi sīpinga tuʻuaki ʻoku tokonaki maí?

¹ Ko e ngaahi sīpinga tuʻuaki ʻo ʻetau ngaahi makasiní mo e ngaahi tohi kehé ʻoku hā maʻu pē ia ʻi he ʻEtau Ngāue Fakafaifekau ʻo e Puleʻanga. ʻI he kau ki he ngāue fakafaifekaú, ʻoku fiemaʻu ke ʻoua te tau toe leaʻaki tatau ʻa e ngaahi tuʻuaki ʻoku fokotuʻu mai ko ení ʻo hangē tofu pē ko ia ʻoku hikiʻí. ʻOku tokonaki kinautolú ko ha fakakaukau fakalūkufua ia ki he meʻa nai te tau leaʻakí. Te tau ola lelei ange maʻu pē kapau te tau leaʻaki ʻa e ngaahi tuʻuakí ʻi he ngaahi lea pē ʻa kitautolú. Ko hono fakahaaʻi kitautolu ʻi ha ngaahi tōʻonga fakanatulá ʻoku tokoni ia ke ʻai ʻa e tokotaha-ʻapí ke ongoʻi fiemālie pea tapua atu ai ʻa e loto-moʻoni mo e tui pau.—2 Kol. 2:17; 1 Tes. 1:5.

2. Ko e hā ʻoku fiemaʻu ai ke tau fakakaukau ki he ngaahi anga fakafonuá ʻi heʻetau teuteu ʻa e ngaahi tuʻuakí?

² Feliliuaki Hoʻo Tuʻuakí: Ko e founga ʻo ʻetau tuʻuaki ʻa e ongoongolelei ʻo e puleʻangá ʻoku uesia lahi ia ʻe he ngaahi anga fakafonuá. ʻE lava ke ke fakafeʻiloaki koe ki he tokotaha-ʻapí peá ke toki fakahū ai hoʻo tuʻuakí ʻi he fetalanoaʻakí, pe ko e kakai ia ʻi ho feituʻu ngāué ʻoku nau ʻamanekina koe ke ke fakahangatonu pē ki he poiní? ʻOku kehekehe ia ʻi he feituʻu kotoa pē pea ʻi he taimi ʻe niʻihi ʻoku toe pehē pē foki ʻa e tokotaha kotoa. ʻOku toe fiemaʻu foki ʻa e ʻiloʻiló ʻi hono ngāueʻaki ʻa e ngaahi fehuʻí. Ko e ngaahi fehuʻi ʻoku feʻungamālie ʻi he ngaahi feituʻu ʻe niʻihí te ne ʻai nai ke ʻikai ongoʻi lelei ʻa e kakai ʻi he ngaahi feituʻu kehé. Ko ia ai, kuo pau ke tau ngāueʻaki ʻa e fakafuofua leleí pea ke feliliuaki ʻetau tuʻuakí ke feʻunga mo e meʻa ʻoku tali lelei fakalotofonuá.

3. Ko e hā ke tau fakakaukau ai ki he puipuituʻa mo e fakakaukau ʻa e faʻahinga ko ia ʻoku tau lea ki aí?

³ Tānaki atu ki aí, ʻoku fiemaʻu ke tau fakakaukau ki he puipuituʻa mo e fakakaukau ʻa e kakai ʻi hotau feituʻu ngāué ʻi heʻetau teuteu ki he ngāue fakamalangá. Ko e fakatātaá, ʻe hangehangē te ke fetalanoaʻaki nai mo ha Katolika līʻoa ʻi he Mātiu 6:​9, 10, ʻo kehe ia mei he founga ʻo haʻo fetalanoaʻaki pehē mo ha tokotaha ʻoku ʻikai anga-maheni mo e “Lotu ʻa e ʻEiki.” ʻI ha kiʻi fakakaukau lelei, ʻe lava ke tau faʻa feliliuaki ʻetau ngaahi tuʻuakí ke ʻai ke fakamānako ange ki he kakai ʻoku tau fetaulaki mo ia ʻi he ngāue fakafaifekaú.—1 Kol. 9:​20-23.

4. Ko e hā ʻoku fiemaʻu ai ʻa e teuteu leleí?

⁴ Naʻa mo haʻatau palani ke ngāueʻaki ʻa e sīpinga tuʻuakí ʻo meimei tatau pē mo ia ʻoku hikí, ʻoku ʻikai pē ke ʻi ai ha fetongi ia ʻo e teuteu leleí. ʻOku totonu ke tau lau fakalelei ʻa e kupu pe vahe ʻa ia ʻoku tau palani ke fakahāʻí pea sio ki he ngaahi poini te ne ueʻi nai ai ʻa e mahuʻingaʻiá. Pea fakakau leva ia ʻi heʻetau tuʻuakí. Fakafou pē ʻi heʻetau maheni mo e fakamatala lelei ʻi heʻetau ngaahi tohí ʻe lava ai ke tau tuʻuaki faivelenga atu kinautolu.

5. Ko e hā te tau teuteu nai ai ha tuʻuaki kehe, pea ʻe lava fēfē ke tau fai pehē?

⁵ Ngaahi Fakaofiofi Kehe: ʻOku fakangatangata nai kitautolu ke tau ngāueʻaki pē ʻa e ngaahi fakaofiofi ʻoku ʻomai ʻi he ngaahi sīpinga tuʻuakí? ʻIkai. Kapau ʻoku faingofua ange kia koe ke ngāueʻaki ha fakaofiofi kehe pe ko ha konga Tohi Tapu kehe, ngāueʻaki ia. Tautefito ki he ngaahi makasiní, fakasio ha ngaahi faingamālie ke fakahaaʻi ai ʻa e ngaahi kupu kehe ʻa ia ʻoku mahuʻinga makehe ki ho feituʻu ngāué. ʻI he taimi ʻoku fakahāhaaʻi ai ʻa e ngaahi tuʻuaki ngāue fakamalanga ʻi he Fakataha Ngāué, ʻe ʻi ai nai ʻa e ngaahi fokotuʻutuʻu ki hano fakahāhā ʻo ha faʻahinga fakaofiofi pē ʻe ola lelei ʻi he feituʻu ngāue fakalotofonuá. ʻI he founga ko ení ʻe tokoni kotoa nai ia ke tuʻuaki ola lelei atu ai ʻa e ongoongo leleí.

Meʻa ke Leaʻaki Fekauʻaki mo e Ngaahi Makasiní

Ko e Taua Leʻo San. 15

“Ko e kotoa ʻo kitautolú ʻoku tau holi ki ha moʻui lelei ange maʻa kitautolu mo ʻetau fānaú, ka ko e tokolahi ʻoku nau ongoʻi ʻoku ʻikai hanau mālohi ke aʻusia ia. ʻOkú ke fakakaukau ʻe lava ke tau puleʻi hotau kahaʻú? [Tuku ke ne tali.] Ko e makasini ko ení ʻoku fakahaaʻi ai mei he Tohi Tapú ʻoku ʻikai ke tau hala he mālohi ka ko hotau kahaʻú ʻoku fakatuʻunga ia ʻi heʻetau ngaahi fili ʻoku tau fai he taimi ní.” Lau ʻa e Teutalonome 30:19.

Awake! San. 22

“ʻI heʻetau fetaulaki mo e ngaahi palopalema fakaemoʻuileleí, ko e kotoa ʻo kitautolú ʻoku tau houngaʻia ʻi ha toketā ʻokú ne tokanga fekauʻaki mo ʻetau ngaahi ongoʻí. Ka ʻokú ke fakakaukau ʻoku tokolahi ʻa e kau mahaki ʻoku nau tuʻu ʻo tokanga ki he ngaahi ongoʻi ʻa ʻenau toketaá? [Tuku ke ne tali.] ʻOku sivisiviʻi ʻe he makasini ko ení ʻa e ngaahi pole ʻoku fetaulaki mo e kau toketaá pea mo e meʻa ʻoku fakatatali mai ʻe he kahaʻú maʻá e kau ngāue faitoʻó.” Lau ʻa e Aisea 33:24.

Ko e Taua Leʻo Fep. 1

“ʻIkai nai ʻoku fakahohaʻa ko e tokolahi ʻo e kakai ʻi he ʻaho ní ko e kau maʻukovia kinautolu ʻo e fakafeʻātungiá mo e fakamālohí? [Lave ki ha fakatātā ʻo ha meʻa ʻoku hokosia fakalotofonua, pea tuku ke ne tali.] Ko e makasini ko ení ʻoku lāulea ai ki he anga ʻo e vakai ʻa e ʻOtuá ki he moʻui ʻa e faʻahinga ʻo e tangatá. ʻOku toe fakamatalaʻi ai ʻa e founga te ne fakahaofi ai kitautolu mei he faingataʻaʻia ʻoku hā ʻi he ʻaho ní.” Lau ʻa e Sāme 72:​12-14.

Awake! Fep. 8

“Ko e taha ʻo e ngaahi pole lalahi ʻoku tau fetaulaki mo ia ʻi he ʻaho ní ko e fekuki mo e loto-mafasiá. ʻIkai ʻokú ke loto-tatau nai mo ia? [Tuku ke ne tali.] Naʻe kikiteʻi totonu ʻe he Tohi Tapú ko e meʻa ʻeni ʻe hokó. [Lau ʻa e 2 Timote 3:1.] Ko e makasini ko ení ʻoku tokonaki mai ai ʻa e ngaahi fokotuʻu ʻaonga ʻe lava ke tokoniʻiʻaki koe mo ho fāmilí ke fekuki mo e loto-mafasiá.”