Tokoniʻi ʻa e Niʻihi Kehé Ke Nau Fakalāngilangiʻi ʻa Sihova

¹ ʻOku fanongonongo ha pōpoaki mātuʻaki mahuʻinga ki he kakai ʻi he māmaní kotoa: “Mou manavahē ki he ʻOtua, pea tuku kololia kiate ia; he kuo hokosia ʻa e taimi oʻene fakamāu: pea mou hū kiate ia naʻa ne ngaohi ʻa e langi mo e fonua mo e tahi mo e ngaahi matavai ʻo e ngaahi vaitafe.” (Fkh. 14:​6, 7) Ko hotau monū ia ke kau ʻi he fanongonongo ko iá. Ko e hā ʻoku fiemaʻu ke ʻiloʻi ʻe he kakaí fekauʻaki mo Sihova koeʻuhi ke nau manavahē ai mo lotu kiate iá?

² Ko Hono Huafá: ʻOku fiemaʻu ke malava ʻe he kakaí ʻo fakafaikehekeheʻi ʻa e huafa ʻo e ʻOtua moʻoni pē tahá mei he ngaahi ʻotua loi tokolahi ʻoku fai ki ai ʻa e lotu he ʻaho ní. (Teu. 4:​35; 1 Kol. 8:​5, 6) Ko hono moʻoní, naʻe ngāueʻaki ʻe he kau hiki Tohitapú ʻa e huafa ʻiloa ʻo Sihová ʻo laka hake he tuʻo 7,000. Lolotonga ʻoku tau ngāueleleiʻaki ʻa e ʻiloʻiló ʻi he taimi ʻoku tau ngāueʻaki ai ʻa e huafa ʻo e ʻOtuá, ʻoku ʻikai ʻaupito totonu ke tau fufū ia pe fakaʻehiʻehi mei hono ngāueʻaki iá. Ko e finangalo ʻo e ʻOtuá ki he faʻahinga ʻo e tangatá kotoa ke nau hoko ʻo ʻiloʻi hono huafá.​—Sāme 83:18.

³ Ko Hono ʻUlungāngá: Ke fakalāngilangiʻi ʻa Sihova, ʻoku fiemaʻu ke ʻiloʻi ʻe he kakaí pe ko e faʻahinga ʻOtua fēfē ia. Kuo pau ke tau ʻai ke nau maheni mo ʻene ʻofa tuʻu-ki-muʻá, poto māʻolungá, fakamaau totonu haohaoá, mo e mālohi māfimafi-aoniú, fakataha mo ʻene mēsí, ʻaloʻofá, mo hono ngaahi ʻulungaanga fakaofo kehé. (Eki. 34:​6, 7) Kuo pau ke nau toe ako ke maʻu ha manavahē lelei ki he ʻOtuá, ke ʻapasiaʻi ia, ʻo ʻiloʻi ko ʻenau moʻuí tonu ʻoku fakatuʻunga ia ʻi hono maʻu ʻa e hōifua ʻa Sihová.​—Sāme 89:7.

⁴ ʻUnuʻunu Ofi ki he ʻOtuá: Ke fakahaofi ʻi he fakamaau ka hoko mai ʻa e ʻOtuá, kuo pau ke ui ʻa e kakaí kia Sihova ʻi he tui. (Loma 10:​13, 14; 2 Tes. 1:8) ʻOku kau ki heni ʻa e meʻa lahi ange ia ʻi hono maʻu pē ha ʻilo fekauʻaki mo e huafa pea mo e ʻulungaanga ʻo e ʻOtuá. Kuo pau ke tau tokoniʻi ʻa e kakaí ke nau fakatupulekina ha vahaʻangatae fakafoʻituitui mo Sihova, ʻo falala kiate ia ʻaki honau lotó kotoa. (Pal. 3:​5, 6) ʻI heʻenau ngāueʻaki ʻa e meʻa ʻoku nau akó, hanga ki he ʻOtuá ʻi he lotu fakamātoato, pea aʻusia ʻene tokoní ʻi heʻenau moʻuí, ʻe tupulekina ai ʻenau tuí, ʻo tokoniʻi ai kinautolu ke ʻunuʻunu ofi kia Sihova.​—Sāme 34:8.

⁵ ʻOfa ke tau talaki faivelenga ʻa e huafa ʻo e ʻOtuá pea tokoniʻi ʻa e niʻihi kehé ke nau falala kakato mo manavahē kiate ia. ʻOku kei malava ke tau tokoniʻi ʻa e tokolahi ange ke nau hoko ʻo ʻiloʻi ʻa Sihova pea fakalāngilangiʻi ia ʻi he tuʻunga ko honau “ʻOtua fakamoʻuiʻanga.”—Sāme 25:5.

Fakahaaʻi ʻa e Houngaʻia ki he Ngaahi Koloa Fakateokalatí

¹ ʻI hono fai ʻa e ngaahi fokotuʻutuʻu ke monomono ʻa e temipalé, naʻe fakaongoongoleleiʻi ʻe Tuʻi Siosaia ʻa e faʻahinga ko ia naʻe vaheʻi ke nau fai ʻa e ngāué, ʻi heʻene pehē: “Nae ikai ha eke e fai kiate kinautolu i he gaahi baaga nae atu ki ho nau nima, koeuhi naa nau fai agatonu be.” (2 Tuʻi 22:​3-7, PM) Ko e houngaʻia naʻe maʻu ʻe he kau tangata ko iá ki he ngaahi meʻa toputapú naʻe hā mahino ia ʻi he founga ʻo ʻenau ngāueʻaki ʻa e ngaahi koloa naʻe tuku kia kinautolú. ʻI he ʻahó ni, ʻi heʻetau kau ki he ngāue māʻoniʻoni ʻo e ongoongo lelei ʻa e ʻOtuá, ʻoku fiemaʻu tatau ke tau fakahaaʻi ʻa e anga-tonu ʻi hono ngāueʻaki ʻa e ngaahi koloa ʻoku ʻomai kia kitautolú.

² ʻI he Malaʻe Fakafaifekaú: Ko e houngaʻia ʻi he pōpoaki mātuʻaki mahuʻinga ʻoku ʻi heʻetau ʻū tohí mo e lāuʻilo ki he fakamole ʻoku kau ki hono ngaohi iá ʻokú ne fakatupunga ai ke tau fakamahuʻingaʻi lahi ia. ʻOku ʻikai totonu ke tau tuʻuaki tavale ʻetau ʻū tohí ki he faʻahinga ʻoku ʻikai te nau fakahaaʻi ha houngaʻia moʻoni ki he pōpoaki ʻa e Tohitapú. Kapau ʻoku fakahaaʻi ʻe ha taha ha mahuʻingaʻia siʻisiʻi ʻi he ongoongo leleí, te tau tuʻuaki nai kiate ia ha tuleki kae ʻikai ko e ʻū tohi kehé.

³ Tufaki ʻa e ʻū tohí ʻi ha founga ʻoku fakahaaʻi ai ʻa e tokanga ki hono mahuʻingá. Fakaʻehiʻehi mei hono tuku ia ʻi ha ngaahi feituʻu kakai ʻa ia ʻe hoko ai ʻo movete takai holo pē. Ke fakaʻehiʻehi mei hono fakamoleki noaʻiá, vakaiʻi ʻa e meʻa ʻokú ke maʻu ʻi ʻapí ki muʻa ke toe ʻomai ha ʻū tohi lahi ange. Kapau ʻokú ke maʻu tuʻumaʻu ha toenga lahi ʻo e ʻīsiu taki taha ʻo e ʻū makasiní, vakaiʻi ke holoki hoʻo ʻotá.

⁴ ʻŪ Tohi ke Ngāueʻaki Fakafoʻituitui: ʻOku totonu ke tau ʻota pē ʻa e ʻū tohi ʻoku tau fiemaʻu moʻoní. ʻOku tautefito ʻa e totonu ke tau fakaʻehiʻehi mei hono kole ʻa e ngaahi Tohitapu takafi molū, Reference Bible, mo e ʻū tohi lalahi kehé, hangē ko e Concordance, Index, ongo voliume Insight, mo e tohi Proclaimers, ʻa ia ʻoku ngaohi kotoa ia ʻi he tuʻunga fakamole lahi.

⁵ ʻOkú ke manatuʻi ke tohiʻi ho hingoá mo e tuʻasilá ʻi hoʻo ngaahi tatau fakafoʻituitui ʻo e ʻū tohí? ʻOku tokoni eni ke fakasiʻisiʻi ai ʻa e fiemaʻu ke toe maʻu ha ngaahi fetongi ki he ʻū tohi ʻoku tukuhalaʻí. Kapau ʻe mole haʻo tohi hiva, Tohitapu, pe tohi ako, te ke maʻu nai ia ʻi he ʻū meʻa mole ʻoku tānaki ʻi he Fale Fakatahaʻangá pe feituʻu ʻasemipilií.​—Luke 15:​8, 9.

⁶ Tau feinga ke ngāue fakapotopoto ʻaki ʻetau ʻū tohí. Ko ha founga eni ke fakahāhā ai ʻetau faitotonu ʻi hono ngāueʻaki ʻetau ngaahi koloa ʻo e Puleʻangá ʻa ia kuo tuku mai ʻe Sihova kia kitautolú.​—Luke 16:10.